Mga Awit 114

Awit ng Paggunita sa Exodo

¹Ang bayang Israel[#Exo. 12:51.]

sa bansang Egipto'y kanyang

inilabas,

nang ang lahing ito

sa bansang dayuhan lahat ay lumikas.

²Magmula na noon

ang lupaing Juda'y naging dakong banal,

at bansang Israel

ginawa ng Diyos na sariling bayan.

³Ang Dagat ng Tambo,[#Exo. 14:21; Jos. 3:16.]

nang ito'y makita, nagbigay ng daan,

magkabilang panig

ng Ilog ng Jordan ay tumigil naman.

⁴Maging mga bundok,

katulad ng tupa, ay pawang nanginig,

pati mga burol,

nanginig na parang tupang maliliit.

⁵Ano ang nangyari,

at ikaw, O dagat, nagbigay ng daan?

Ikaw Ilog Jordan,

bakit ang tubig mo ay tumigil naman?

⁶Kayong mga bundok,

bakit parang kambing na nagsisilundag?

Kayong mga burol,

maliit na tupa'y inyo namang katulad?

⁷Ikaw, O daigdig,

sa harap ni Yahweh, ngayon ay manginig,

dapat kang matakot

sapagkat darating ang Diyos ni Jacob,

⁸sa malaking bato[#Exo. 17:1-7; Bil. 20:2-13.]

nagpabukal siya ng saganang tubig,

at magmula roon

ang tubig na ito ay nagiging batis.