Isaias 50

¹Sinabi ni Yahweh:[#Bar. 4:6.]

“Pinalayas ko ba ang aking bayan,

tulad ng isang lalaking pinalayas at hiniwalayan ang kanyang asawa?

Kung gayon, nasaan ang kasulatan ng ating paghihiwalay?

Pinagtaksilan ko ba kayo para maging bihag,

tulad ng amang nagbenta ng anak upang maging alipin?

Hindi! Nabihag kayo dahil sa inyong kasalanan,

itinapon kayo dahil sa inyong kasamaan.

²Bakit ang bayan ko'y hindi kumilos

nang sila'y lapitan ko para iligtas?

Nang ako'y tumawag isa ma'y walang sumagot.

Bakit? Wala ba akong lakas para iligtas sila?

Kaya kong tuyuin ang dagat sa isang salita lamang.

Magagawa kong disyerto ang ilog

upang mamatay sa uhaw ang mga isda roon.

³Ang bughaw na langit ay magagawa kong

kasing-itim ng damit-panluksa.”

Ang Pagsunod ng Lingkod ni Yahweh

⁴Ang Panginoong Yahweh ang nagturo sa akin ng aking sasabihin,

para tulungan ang mahihina.

Tuwing umaga'y nananabik akong malaman

kung ano ang ituturo niya sa akin.

⁵Binigyan ako ng Panginoong Yahweh ng pang-unawa,

hindi ako naghimagsik

o tumalikod sa kanya.

⁶Hindi ako gumanti nang bugbugin nila ako,[#Mt. 26:67; Mc. 14:65.]

hindi ako kumibo nang insultuhin nila ako.

Pinabayaan ko silang bunutin ang aking balbas

at luraan ang aking mukha.

⁷Hindi ko pinansin ang mga pag-insultong ginawa nila sa akin,

sapagkat ang Panginoong Yahweh ang tumutulong sa akin.

Handa akong magtiis,

sapagkat aking nalalaman na ako'y hindi mapapahiya.

⁸Ang Diyos ay malapit,[#Ro. 8:33-34.]

at siya ang magpapatunay na wala akong sala.

May mangangahas bang ako'y usigin?

Magharap kami sa hukuman,

at ilahad ang kanyang paratang.

⁹Ang Panginoong Yahweh mismo ang magtatanggol sa akin.

Sino ang makapagpapatunay na ako ay may sala?

Mawawalang lahat ang nagbibintang sa akin,

tulad ng damit na nginatngat ng insekto.

¹⁰Kayong lahat na may paggalang kay Yahweh,

at sumusunod sa utos ng kanyang lingkod,

maaaring ang landas ninyo ay maging madilim,

gayunma'y magtiwala kayo at umasa

sa kapangyarihan ng Diyos na si Yahweh.

¹¹Kayo namang nagbabalak magpahamak sa iba

ang siyang magdurusa sa inyong binabalak.

Kahabag-habag ang sasapitin ninyo

sapagkat si Yahweh ang gagawa nito.