¹Темже убо, братие, просим вы и молим о Христе Иисусе, якоже приясте от нас, како подобает вам ходити и угождати Богови, якоже и ходите, да избыточествуете паче:

²весте бо, какова повеления дахом вам Господем Иисусом.

³Сия бо есть воля Божия, святость ваша, хранити себе самех от блуда,

⁴и ведети комуждо от вас свой сосуд стяжавати во святыни и чести,

⁵а не в страсти похотней, якоже и языцы не ведящии Бога,

⁶и еже не преступати и лихоимствовати в вещи брата своего: зане мститель есть Господь о всех сих, якоже и прежде рекохом к вам и засвидетельствовахом.

⁷Не призва бо нас Бог на нечистоту, но во святость.

⁸Темже убо отметаяй не человека отметает, но Бога, давшаго духа своего святаго в нас.

⁹О братолюбии же, не требуете, да пишется к вам, сами бо вы Богом учени есте, еже любити друг друга:

¹⁰ибо творите то ко всей братии, сущей во всей македонии. Молим же вы, братие, избыточествовати паче,

¹¹и любезно прилежати, еже безмолвствовати и деяти своя и делати своима рукама, якоже повелехом вам:

¹²да ходите благообразно ко внешним и ни чесогоже требуете.

¹³Не хощу же вас, братие, не ведети о умерших, да не скорбите, якоже и прочии не имущии упования.

¹⁴Аще бо веруем, яко Иисус умре и воскресе, тако и Бог умершыя во Иисусе приведет с ним.

¹⁵Сие бо вам глаголем словом Господним, яко мы живущии, оставшии в пришествие Господне, не имамы предварити умерших:

¹⁶яко сам Господь в повелении, во гласе архангелове и в трубе Божии снидет с небесе, и мертвии о Христе воскреснут первее:

¹⁷потом же мы, живущии оставшии, купно с ними восхищени будем на облацех в сретение Господне на воздусе, и тако всегда с Господем будем.

¹⁸Темже утешайте друг друга в словесех сих.