¹Муж же некий бе в кесарии, именем корнилий, сотник от спиры нарицающияся италийския,

²блгоговеин и бояйся Бога со всем домом своим, творяй милостыни многи людем и моляйся Богу всегда:

³виде в видении яве, яко в час девятый дне, ангела Божия сшедша к нему и рекша ему: корнилие.

⁴Он же воззрев нань и пристрашен быв рече: что есть, Господи? рече же ему: молитвы твоя и милостыни твоя взыдоша на память пред Бога:

⁵и ныне посли во июппию мужей и призови симона, нарицаемаго петра:

⁶сей странствует у некоего симона усмаря, емуже есть дом при мори: той речет тебе глаголы, в нихже спасешися ты и весь дом твой.

⁷И якоже отиде ангел глаголяй корнилию, пригласив два от рабов своих и воина благочестива от служащих ему

⁸и сказав им вся, посла их во июппию.

⁹Воутрие же, путьшествующым им и ко граду приближающымся, взыде петр на горницу помолитися, о часе шестем.

¹⁰Бысть же приалчен и хотяше вкусити: готовящым же онем, нападе нань ужас,

¹¹и виде небо отверсто и сходящ нань сосуд некий, яко плащаницу велию, по четырем краем привязан и низу спущаемь на землю,

¹²в немже бяху вся четвероногая земли и зверие и гади и птицы небесныя.

¹³И бысть глас к нему: востав, петре, заколи и яждь.

¹⁴Петр же рече: никакоже, Господи, яко николиже ядох всяко скверно или нечисто.

¹⁵И (се) глас паки к нему вторицею: яже Бог очистил есть, ты не скверни.

¹⁶Сие же бысть трищи: и паки взяся сосуд на небо.

¹⁷Якоже в себе недоумевашеся петр, что бы было видение, еже виде, и се, мужие посланнии от корнилиа, вопрошше и уведевше дом симонов, сташа пред враты

¹⁸и возглашше вопрошаху, аще симон, нарицаемый петр, зде странствует.

¹⁹Петру же размышляющу о видении, рече ему Дух: се, мужие трие ищут тебе:

²⁰но востав сниди и иди с ними, ничтоже разсуждая: зане аз послах их.

²¹Сошед же петр к мужем посланным к нему от корнилиа, рече: се, аз есмь, егоже ищете: кая есть вина, еяже ради приидосте?

²²Они же рекоша: корнилий сотник, муж праведен и бояйся Бога, свидетелствован от всего языка иудейска, увещен есть от ангела свята призвати тя в дом свой и слышати глаголы от тебе.

²³Призвав же их учреди: наутрие же петр востав иде с ними, и нецыи от братий, иже от июппии, идоша с ним:

²⁴и наутрие внидоша в кесарию. Корнилий же бе чая их, созвав сродники своя и любезныя други.

²⁵Якоже бысть внити петру, срете его корнилий, и пад на ногу его поклонися.

²⁶Петр же воздвиже его, глаголя: востани: и аз сам человек есмь.

²⁷И с ним беседуя, вниде и обрете собравшыяся многи:

²⁸рече же к ним: вы весте, яко не лепо есть мужу иудеанину прилеплятися или приходити ко иноплеменнику: и мне Бог показа ни единаго скверна или нечиста глаголати человека:

²⁹темже и без сумнения приидох призван: вопрошаю вы убо, коея ради вины посласте по мене?

³⁰И корнилий рече: от четвертаго дне даже до сего часа бех постяся и в девятый час моляся в дому моем: и се, муж ста предо мною во одежди светле

³¹и рече: корнилие, услышана бысть молитва твоя, и милостыни твоя помянушася пред Богом:

³²посли убо во июппию и призови симона, иже нарицается петр: сей странствует в дому симона усмаря близ моря: иже пришед возглаголет тебе.

³³Абие убо послах к тебе, ты же добре сотворил еси пришед: ныне убо вси мы пред Богом предстоим слышати вся повеленная тебе от Бога.

³⁴Отверз же петр уста, рече: поистинне разумеваю, яко не на лица зрит Бог,

³⁵но во всяцем языце бояйся его и делаяй правду приятен ему есть:

³⁶слово, еже посла сыном израилевым, благовествуя мир Иисус Христом: сей есть всем Господь:

³⁷вы весте глагол бывший по всей иудеи, наченшийся от галилеи, по крещении, еже проповеда иоанн:

³⁸Иисуса, иже от назарета, яко помаза его Бог Духом святым и силою, иже пройде благодателствуя и исцеляя вся насилованныя от диавола, яко Бог бяше с ним:

³⁹и мы есмы свидетеле всех, яже сотвори во стране иудейстей и во Иерусалиме: егоже и убиша, повешше на древе.

⁴⁰Сего Бог воскреси в третий день и даде ему явлену быти,

⁴¹не всем людем, но нам свидетелем преднареченным от Бога, иже с ним ядохом и пихом, по воскресении его от мертвых:

⁴²и повеле нам проповедати людем и засвидетелствовати, яко той есть нареченный от Бога судия живым и мертвым:

⁴³о сем вси пророцы свидетелствуют, оставление грехов прияти именем его всякому верующему в онь.

⁴⁴Еще же глаголющу петру глаголы сия, нападе Дух святый на вся слышащыя слово.

⁴⁵И ужасошася иже от обрезания вернии, елицы приидоша с петром, яко и на языки дар святаго Духа излияся:

⁴⁶слышаху бо их глаголющих языки и величающих Бога. Тогда отвеща петр:

⁴⁷еда воду возбранити может кто, еже не креститися сим, иже Дух святый прияша, якоже и мы?

⁴⁸Повеле же им креститися во имя Иисус Христово. Тогда молиша его пребыти у них дни некия.