Yerusalemu baada ya kuangamia

¹Jinsi gani dhahabu yetu ilivyochujuka,

dhahabu safi kabisa ilivyobadilika!

Mawe ya thamani yametawanywa

yamesambaa barabarani kote.

²Watoto wa Siyoni waliosifika sana,

waliothaminiwa kama dhahabu safi,

jinsi gani sasa wamekuwa kama vyombo vya udongo,

kazi ya mikono ya mfinyanzi!

³Hata mbwamwitu huwa na hisia za mama

na kuwanyonyesha watoto wao;

lakini watu wangu wamekuwa wakatili,

hufanya kama mbuni nyikani.

⁴Midomo ya watoto wachanga imekauka kwa kiu,

watoto wanaomba chakula lakini hakuna anayewapa.

⁵Watu waliojilisha vyakula vinono

sasa wanakufa njaa barabarani.

Waliolelewa na kuvikwa kifalme

sasa wanafukua kwa mikono kwenye majaa.

⁶Watu wangu wamepata adhabu kubwa[#Taz Mwa 19:24]

kuliko watu wa mji wa Sodoma

mji ambao uliteketezwa ghafla

bila kuwa na muda wa kunyosha mkono.

⁷Vijana wa Siyoni walikuwa safi kuliko theluji,

walikuwa weupe kuliko maziwa.

Miili yao ilikuwa myekundu kama matumbawe,

uzuri wa viwiliwili vyao kama johari ya rangi ya samawati.

⁸Sasa sura zao ni nyeusi kuliko makaa,

wanapita barabarani bila kujulikana;

ngozi yao imegandamana na mifupa yao

imekauka, imekuwa kama kuni.

⁹Afadhali waliouawa kwa upanga

kuliko waliokufa kwa njaa,

ambao walikufa polepole

kwa kukosa chakula.

¹⁰Kina mama ambao huwa na huruma kuu[#Taz Kumb 38:57; Eze 5:10]

waliwapika watoto wao wenyewe,

wakawafanya kuwa chakula chao

wakati watu wangu walipoangamizwa.

¹¹Mwenyezi-Mungu alionesha uzito wa ghadhabu yake,

aliimimina hasira yake kali;

aliwasha moto huko mjini Siyoni

ambao uliteketeza misingi yake.

¹²Wafalme duniani hawakuamini

wala wakazi wowote wa ulimwenguni,

kwamba mvamizi au adui

angeweza kuingia malango ya Yerusalemu.

¹³Hayo yalisababishwa na dhambi za manabii wake,

yalitukia kwa sababu ya uovu wa makuhani wake

ambao walimwaga damu ya waadilifu mjini kwake.

¹⁴Walitangatanga barabarani kama vipofu,

walikuwa wamekuwa najisi kwa damu,

hata asiwepo mtu yeyote wa kuwagusa.

¹⁵Watu waliwapigia kelele wakisema:

“Tokeni, nendeni zenu enyi mlio najisi!

Tokeni, tokeni, msiguse chochote.”

Hivyo wakawa wakimbizi na kutangatanga;

watu wa mataifa walitamka:

“Hawa hawatakaribishwa kukaa kwetu!”

¹⁶Mwenyezi-Mungu mwenyewe aliwatawanya,

wala hatawajali tena.

Makuhani hawatapata tena heshima,

wazee hawatapendelewa tena.

¹⁷Tulichoka kukaa macho kungojea msaada;

tulikesha na kungojea kwa hamu

taifa ambalo halikuweza kutuokoa.

¹⁸Watu walifuatilia hatua zetu,

tukashindwa kupita katika barabara zetu.

Siku zetu zikawa zimetimia;

mwisho wetu ukawa umefika.

¹⁹Waliotufuatia walikuwa wepesi kuliko tai,

walitukimbiza milimani,

walituvizia huko nyikani.

²⁰Walimnasa yule ambaye maisha yetu yalimtegemea,

yule mfalme aliyewekwa wakfu wa Mwenyezi-Mungu,

yule ambaye tulisema: “Chini ya ulinzi wake

tutaishi miongoni mwa mataifa.”

²¹Wakazi wa Edomu, mwaweza kushangilia kwa sasa,

mwaweza kwa sasa kufurahi enyi wakazi wa Uzi;

lakini kikombe hiki cha adhabu kitawajia pia,

nanyi pia mtakinywa na kulewa,

hata mtayavua mavazi yenu!

²²Adhabu ya uovu wako ewe Siyoni imekamilika;

Mwenyezi-Mungu hatawaacha zaidi uhamishoni.

Lakini nyinyi Waedomu atawaadhibu kwa uovu wenu,

atazifichua dhambi zenu.