Hukumu juu ya mataifa jirani

¹Kauli ya Mwenyezi-Mungu:

Mwenyezi-Mungu ametamka siyo tu dhidi ya nchi ya Hadraki

bali pia dhidi ya Damasko.

Maana nchi ya Aramu ni mali ya Mwenyezi-Mungu,

kama vile yalivyo makabila yote ya Israeli.

²Hali kadhalika mji wa Hamathi unaopakana na Hadraki;

na hata miji ya Tiro na Sidoni

ingawaje yajiona kuwa na hekima sana.

³Mji wa Tiro umejijengea ngome kumbwa,

umejirundikia fedha kama vumbi,

na dhahabu kama takataka barabarani.

⁴Lakini Bwana ataichukua mali yake yote,

utajiri wake atautumbukiza baharini,

na kuuteketeza mji huo kwa moto.

⁵Mji wa Ashkeloni utaona hayo na kuogopa,

nao mji wa Gaza utagaagaa kwa uchungu;

hata Ekroni, maana tumaini lake litatoweka.

Mji wa Gaza utapoteza mfalme wake,

nao Ashkeloni hautakaliwa na watu.

⁶Mji wa Ashdodi utakaliwa na machotara.

Mwenyezi-Mungu asema hivi:

“Kiburi cha Filistia nitakikomesha.

⁷Nitawakomesha kula nyama yenye damu,

na chakula ambacho ni chukizo.

Mabaki watakuwa mali yangu,

kama ukoo mmoja katika Yuda.

Watu wa Ekroni watakuwa kama Wayebusi.

⁸Mimi mwenyewe nitailinda nchi yangu,

nitazuia majeshi yasipitepite humo.

Hakuna mtu atakayewadhulumu tena watu wangu,

maana, kwa macho yangu mwenyewe,

nimeona jinsi walivyoteseka.”

Mfalme wa amani

⁹Shangilieni sana enyi watu wa Siyoni!

Paazeni sauti, enyi watu wa Yerusalemu!

Tazama, mfalme wenu anawajieni,

anakuja kwa shangwe na ushindi!

Ni mpole, amepanda punda,

mwanapunda, mtoto wa punda.

¹⁰Atatokomeza magari ya vita nchini Efraimu,

na farasi wa vita kutoka mjini Yerusalemu;

pinde za vita zitavunjiliwa mbali.

Naye ataleta amani miongoni mwa mataifa;

utawala wake utaenea toka bahari hata bahari,

toka mto Eufrate hata miisho ya dunia.

Kurudishwa kwa watu wa Mungu

¹¹Mwenyezi-Mungu asema hivi:

“Kwa sababu ya agano langu nanyi,

agano lililothibitishwa kwa damu,

nitawakomboa wafungwa wenu

walio kama wamefungwa katika shimo tupu.

¹²Enyi wafungwa wenye tumaini;

rudini kwenye ngome yenu.

Sasa mimi ninawatangazieni:

Nitawarudishieni mema maradufu.

¹³Yuda nitamtumia kama uta wangu;

Efraimu nimemfanya mshale wangu.

Ee Siyoni! Watu wako nitawatumia kama upanga

kuwashambulia watu wa Ugiriki;

watakuwa kama upanga wa shujaa.”

¹⁴Mwenyezi-Mungu atawatokea watu wake;

atafyatua mishale yake kama umeme.

Bwana Mwenyezi-Mungu atapiga tarumbeta;

atafika pamoja na kimbunga cha kusini.

¹⁵Mwenyezi-Mungu wa majeshi atawalinda watu wake,

nao watawaangamiza maadui zao.

Watapiga kelele vitani kama walevi

wataimwaga damu ya maadui zao.

Itatiririka kama damu ya tambiko

iliyomiminwa madhabahuni kutoka bakulini.

¹⁶Wakati huo, Mwenyezi-Mungu, Mungu wao, atawaokoa,

maana wao ni kundi lake;

nao watang'aa katika nchi yake

kama mawe ya thamani katika taji.

¹⁷Jinsi gani uzuri na urembo wake ulivyo!

Wavulana na wasichana watanawiri

kwa wingi wa nafaka na divai mpya.