Daudi anayahurumia maisha ya Shauli

¹Shauli aliporudi kutoka kupigana na Wafilisti, aliambiwa kuwa Daudi yuko kwenye mbuga za Engedi.

²Kisha Shauli aliwachukua askari 3,000 wateule waliokuwa bora zaidi katika nchi yote ya Israeli, akaenda kumtafuta Daudi na watu wake katika Miamba ya Mbuzimwitu.

³Shauli alipokuwa anasafiri, alifika kwenye pango moja lililokuwa karibu na zizi la kondoo, akaingia humo pangoni ili kujisaidia. Daudi na watu wake walikuwa wameketi ndani kabisa ya pango hilo.[#24:3 Taz Zab 57 (kichwa cha Zaburi katika Kiebrania); taz pia Zab 142 (kichwa cha Zaburi hiyo katika Kiebrania).]

⁴Watu wa Daudi wakamwambia, “Ile siku aliyokuambia Mwenyezi-Mungu kuwa atakuja kumtia adui yako mikononi mwako nawe umtendee utakavyoona inafaa, leo imefika.” Ndipo Daudi alipomwendea Shauli polepole kutoka nyuma, akakata pindo la vazi lake.[#24:4 Mara nyingine, katika Biblia, vazi la mtu au joho lake linaweza kuchukua hadhi ya huyo mtu mwenyewe: cheo chake, n.k. Taz k.m. 1Sam 18:4 ambapo kitendo cha Yonathani cha kumpa Daudi mavazi yake ni sawa na kumpa cheo chake (cha kuwa mfalme); 1Fal 19:19; 2Fal 2:14. Baadaye, Daudi alikitumia hicho kipande alichokata kama ushahidi (taz aya ya 11) kwamba alikuwa na nafasi ya kumdhuru Shauli lakini hakutaka kufanya hivyo (taz pia 26:12,16).]

⁵Daudi akaanza kufadhaika moyoni kwa sababu alikata pindo la vazi la Shauli kwa siri.[#24:5 Hali ya Daudi inakumbusha kile ambacho kila mtu anacho, yaani “dhamiri” ambayo humwezesha kila binadamu kutofautisha kati ya jema na baya.]

⁶Akawaambia watu wake, “Mwenyezi-Mungu anizuie nisimtendee kitendo kama hiki bwana wangu aliyepakwa mafuta na Mwenyezi-Mungu. Nisiunyoshe mkono wangu dhidi ya mtu ambaye Mwenyezi-Mungu amempaka mafuta.”

⁷Kwa maneno hayo, Daudi akawashawishi watu wake wasimdhuru Shauli; aliwakataza wasimshambulie. Kisha Shauli akasimama, akatoka pangoni akaendelea na safari yake.

⁸Baadaye, Daudi naye akainuka, akatoka pangoni na kumwita Shauli, “Bwana wangu mfalme!” Mfalme Shauli alipoangalia nyuma, Daudi aliinama hadi chini, akamsujudia Shauli.

⁹Kisha akamwambia, “Kwa nini unawasikiliza watu wanaokuambia, ‘Angalia! Daudi anataka kukudhuru?’

¹⁰Sasa tazama, leo umejionea kwa macho yako mwenyewe; ulipokuwa pangoni Mwenyezi-Mungu alikutia mikononi mwangu. Baadhi ya watu wangu waliniambia nikuue, lakini nilikuhurumia. Nikasema sitanyosha mkono wangu dhidi ya bwana wangu kwani yeye ameteuliwa na Mwenyezi-Mungu kwa kupakwa mafuta.

¹¹Tazama, baba yangu, angalia pindo hili la vazi lako mikononi mwangu; kwa kulikata pindo la vazi lako bila kukuua, unaweza sasa kujua kwa hakika kwamba mimi si mwovu wala mhaini. Mimi sijatenda dhambi dhidi yako ingawa wewe unaniwinda uniue.[#24:11 Shauli alikuwa baba mkwe wa Daudi (taz 18:21).]

¹²Mwenyezi-Mungu na aamue kati yangu, na wewe. Yeye akulipize kisasi lakini mimi kamwe sitanyosha mkono wangu dhidi yako.

¹³Kumbuka methali ya kale isemayo, ‘Kwa muovu hutoka uovu’; lakini sitanyosha mkono dhidi yako.

¹⁴Sasa wewe mfalme wa Israeli angalia mtu unayetaka kumwua! Je, unamfuatilia nani? Unamfuatilia mbwa mfu! Unakifuatilia kiroboto!

¹⁵Basi, Mwenyezi-Mungu na awe mwamuzi kati yangu na wewe. Yeye na aliangalie jambo hili, anitetee na kuniokoa mikononi mwako.”

¹⁶Daudi alipomaliza kusema, Shauli akasema, “Je, hiyo ni sauti yako mwanangu Daudi?” Shauli akalia kwa sauti.

¹⁷Kisha akamwambia Daudi, “Wewe una haki kuliko mimi; umenilipa mema, hali mimi nimekulipa maovu.

¹⁸Leo, umeonesha jinsi ulivyo mwema kwangu. Hukuniua ijapokuwa Mwenyezi-Mungu alinitia mikononi mwako.

¹⁹Je, mtu akimkamata adui yake atamwacha aende salama? Kwa lile ulilonitendea, Mwenyezi-Mungu na akupe tuzo jema!

²⁰Sasa nimejua ya kwamba hakika utakuwa mfalme wa Israeli, na ufalme wa Israeli utaimarishwa chini yako.[#24:16-20 Baada ya Shauli kuona huruma na wema wake Daudi, anatumia maneno mazuri (mwanangu) na kukiri kwamba Daudi atakuwa mfalme atakayefuata (23:17). Hata hivyo, Shauli bado atajaribu kumwangamiza (sura 26).]

²¹Lakini niapie kwa jina la Mwenyezi-Mungu kuwa hutawakatilia mbali wazawa wangu, wala kufutilia mbali jina langu katika jamaa ya baba yangu.”[#24:21 Shauli bila shaka alikuwa na hofu kwamba endapo Daudi atakuwa mfalme jamaa yake Shauli itatoweka na hakuna mtu atakayemkumbuka. Katika 20:14-15 Yonathani alimwomba Daudi namna hiyohiyo.]

²²Daudi akamwapia Shauli. Kisha Shauli akarudi nyumbani kwake, lakini Daudi na watu wake wakaenda kwenye ngome.