¹Mimi Paulo, Silwano na Timotheo, kwa jumuiya ya kanisa la Thesalonike, ambayo ni watu wake Mungu Baba yetu na wa Bwana Yesu Kristo.

²Tunawatakieni neema na amani kutoka kwa Mungu Baba yetu na kwa Bwana Yesu Kristo.[#1:2 Kama kawaida ya barua nyakati hizo, hii Barua kwa Wathesalonike inaanza kwa kumtambulisha mwandishi, na pia kwa namna inayofanana na 1Thes Silwano (Sila) na Timotheo wanatajwa. Taz 1Thes 1:1 maelezo.]

Hukumu wakati wa kuja kwake Kristo

³Ndugu, tunapaswa kumshukuru Mungu daima kwa ajili yenu. Inafaa kwetu kufanya hivyo kwani imani yenu inakua sana na kupendana kwenu kunaongezeka sana.

⁴Ndio maana sisi tunajivunia nyinyi katika makanisa ya Mungu. Tunaona fahari juu ya jinsi mnavyoendelea kuamini na kustahimili katika udhalimu wote na mateso mnayopata.[#1:4 Rejea 1Thes 1:6; 2:14; 3:3 (ambapo panatajwa wazi lazima ya mateso).]

⁵Hayo yote yanathibitisha kwamba hukumu ya Mungu ni ya haki, na matokeo yake, nyinyi mtastahili ufalme wake ambao kwa ajili yake mnateseka.

⁶Mungu atafanya jambo la haki: atawalipa mateso wale wanaowatesa nyinyi

⁷na kuwapeni nafuu nyinyi mnaoteseka, na sisi pia. Atafanya jambo hilo wakati Bwana atakapotokea kutoka mbinguni pamoja na malaika wake wenye nguvu[#1:7 Mat 25:31; Marko 8:38; taz 1Thes 3:11-13 maelezo.]

⁸na miali ya moto, kuwaadhibu wale wanaomkataa Mungu na wale wasiotii Habari Njema ya Bwana wetu Yesu.[#1:8 Katika A.K. picha au mfano wa moto ulitumiwa mara kwa mara kuandamana na kutokea au kuweko kwake Mungu (Kut 19:18; 24:17; Kumb 4:11-13; Eze 1:4; 8:2); katika mazingira mengine, picha ya moto inahusikana na hukumu, na hiyo ndiyo inayohusika hapa (aya 8-9). Rejea Isa 66:15; Mat 25:41; 1Kor 3:13-15.]

⁹Adhabu yao itakuwa kuangamizwa milele na kutengwa mbali na utukufu wake mkuu,

¹⁰wakati atakapokuja siku ile kupokea utukufu kutoka kwa watu wake na heshima kutoka kwa wote wanaoamini. Nyinyi pia mtakuwa miongoni mwao, kwani mmeuamini ule ujumbe tuliowaletea.

¹¹Ndiyo maana tunawaombeeni daima. Tunamwomba Mungu wetu awawezesheni kustahili maisha aliyowaitia muyaishi. Tunamwomba, kwa uwezo wake, atimize nia yenu ya kutenda mema na kukamilisha kazi yenu ya imani.

¹²Kwa namna hiyo, jina la Bwana wetu Yesu litapata utukufu kutoka kwenu, nanyi mtapata utukufu kutoka kwake kwa neema ya Mungu wetu na ya Bwana Yesu Kristo.