¹Hekima ni kitabu cha amri za Mungu,

yeye ni sheria idumuyo milele.

Wanaomshikilia Hekima wataishi,

lakini watakaomwacha watakufa.

²Geuka, ewe Yakobo, umchukue Hekima;

tembea kuelekea mng'ao wa mwanga wake.

³Usimpe mtu mwingine fahari yako;

usiwape mataifa ya kigeni mapato yako.

⁴Heri yetu sisi, ee Israeli,

kwa maana tumejulishwa yampendezayo Mungu.

Ombolezo na matumaini ya Yerusalemu

⁵Jipeni moyo enyi watu wangu;

watu mnaolidumisha jina la Israeli.

⁶Nyinyi hamkuuzwa kwa watu wa mataifa muangamie,

bali mlitiwa mikononi mwa maadui zenu

kwa sababu mlimkasirisha Mungu.

⁷Mlimchokoza yeye aliyewaumba nyinyi,

kwa kutoa tambiko kwa pepo badala ya Mungu,

⁸Mlimsahau Mungu wa milele aliyewalea[#4:8 Jina “Mungu wa milele” ambalo lilitumiwa katika Mwa 21:33 na Isa 40:28 linatumiwa mara nyingi zaidi katika Biblia ya Kigiriki, na mara kwa mara katika kifupi kama “yeye aliye milele”, yaani: Mungu wa milele (taz Bar 4:10,14,20,22,24,35; 5:2; rejea pia 2Mak 1:25; Dan 13:42 (Kigiriki) na Rom 16:26).]

mkauhuzunisha mji wa Yerusalemu uliowatunzeni.

⁹Mji huo uliiona ghadhabu iliyokujia kutoka kwa Mungu,

ukasema: “Sikilizeni enyi jirani za Siyoni.

Mungu ameniletea huzuni kubwa,

¹⁰kwa maana nimeuona uhamisho wa watoto wangu,

ambao Mungu wa milele amewaletea.

¹¹Mimi niliwalea kwa furaha,

lakini nikawaacha waende kwa machozi na huzuni.

¹²Mtu na asifurahie mkasa wangu mimi mjane,

mimi niliyefiwa na watoto wengi.

Niliachwa mkiwa kwa sababu ya dhambi za wanangu,

kwa sababu waligeuka wakaiacha sheria ya Mungu.

¹³Hawakuzijali kanuni zake,

hawakufuata njia za amri za Mungu,

wala kupita katika njia ya uadilifu uliowaonesha.

¹⁴“Enyi jirani zake Siyoni, njoni.

Kumbukeni uhamisho wa wanangu, wa kiume na wa kike,

uhamisho aliowaletea Mungu wa milele.

¹⁵Maana alileta dhidi yao taifa la mbali,

taifa la watu katili na wa lugha ngeni,

wasio na heshima kwa wazee

wala huruma kwa watoto.

¹⁶Waliwachukua mbali wavulana wapenzi wa mjane,

wakaniacha pweke nimefiwa na binti zangu.

¹⁷Lakini mimi nawezaje kuwasaidieni?

¹⁸Ni yule tu aliyewaleteeni balaa hilo

ndiye awezaye kuwaokoeni mikononi mwa maadui zenu.

¹⁹Nendeni, watoto wangu, nendeni tu!

Mimi nimeachwa mpweke.

²⁰Nimevua vazi la amani,

nimevaa vazi la gunia la kuomba.

Nitamlilia Mungu wa milele siku zangu zote.

²¹Jipeni moyo enyi watoto wangu! Mlilieni Mungu

naye atawaokoeni makuchani mwa maadui.

²²Maana namtumainia Mungu wa milele awaokoeni.

na furaha imenijia kutoka kwake huyo Mtakatifu,

kwa sababu ya huruma itakayowajia karibuni,

kutoka kwa Mwokozi wenu, Mungu wa milele.

²³Kwa huzuni na machozi niliwaacheni mwende,

lakini Mungu atawarejesha kwangu kwa shangwe na furaha ya milele.

²⁴Kama jirani za Siyoni walishuhudia kutekwa kwenu,

sasa wataona mkipata wokovu kutoka kwa Mungu,

wokovu utakaowajieni kwa utukufu mkubwa,

kwa fahari ya Mungu wa milele.

²⁵Wanangu, vumilieni ghadhabu hiyo iliyowajieni kutoka kwa Mungu.

Maadui zenu wamewatesa,

lakini mtashuhudia karibuni kuangamizwa kwao,

nanyi mtakanyaga shingo zao kwa miguu yenu.

²⁶Wanangu wapendwa, mmetembea katika njia za taabu;

mlichukuliwa kama kundi la kondoo lililochukuliwa na maadui wakali.

²⁷Jipeni moyo, wanangu, na kumlilia Mungu,

kwani yeye aliyewaleteeni jambo hilo atawakumbukeni.

²⁸Kama vile mlivyokusudia kwenda mbali na Mungu,

vivyo hivyo rudini na kumtafuta kwa hamu mara kumi zaidi.

²⁹Hivyo, huyo aliyewaleteeni balaa hizi

atawaokoeni na kuwaleteeni furaha ya kudumu milele.”

³⁰“Jipe moyo, ee Yerusalemu.

Mungu aliyekupa jina lako atakufariji.

³¹Ole wao wale waliokutesa,

na waliofurahia kuanguka kwako!

³²Miji ile waliyoitumikia watoto wako kama watumwa itakuwa hali mbaya;

Mji ule uliowapokea watoto wako utapata balaa!

³³Kama mji huo ulivyoshangilia kuanguka kwako,

na kufurahia kuangamia kwako,

vivyo hivyo nao utapatwa na uchungu kwa kuangamia kwake.

³⁴Nitaondolea mbali majivuno yake juu ya wingi wa watu wake,

na kiburi chake kitageuka kuwa masikitiko.

³⁵Mimi Mungu wa milele nitamshushia moto utakaowaka kwa siku nyingi;

utakuwa makazi ya pepo kwa muda mrefu.

³⁶“Angalia upande wa mashariki, ee Yerusalemu,

uione furaha inayokujia kutoka kwa Mungu!

³⁷Tazama, watoto wako uliowaacha waende wanakuja nyumbani.

wanakuja pamoja kutoka mashariki na magharibi,

Kwa amri ya Mungu Mtakatifu,

wanakuja wakishangilia utukufu wake.”