Wakufunzi wabaya wa Israeli

¹“Haya! Sikilizeni enyi makuhani!

Tegeni sikio, enyi Waisraeli!

Sikilizeni enyi ukoo wa kifalme!

Nyinyi mlipaswa kuzingatia haki,

badala yake mmekuwa mtego huko Mizpa,

mmekuwa wavu wa kuwanasa huko Tabori.

²Mmechimba shimo refu la kuwanasa huko Shitimu.[#5:2 Shimo lililochimbwa na kufunika kama mtego. Viongozi wa dini na serikali wamekuwa mtego kwa watu. Huwakamata na kuwafunga.; #5:2 Yawezekana ni Abeli Shitimu. Ilikuwa katika upande wa mashariki mwa bonde la mdomo wa mlima Yordani. Pia hekalu la Baal-Peori (taz Hes 25:1; Yos 2:1; 3:1).]

Lakini mimi nitawaadhibuni nyote.

³Nawajua watu wa Efraimu,

Waisraeli hawakufichika kwangu.

Nyinyi watu wa Efraimu mmefanya uzinzi,

watu wote wa Israeli wamejitia najisi.

Hosea aonya dhidi ya ibada za miungu

⁴“Matendo yao yanawazuia wasimrudie Mungu wao.

Mioyoni mwao wamejaa uzinzi;

hawanijui mimi Mwenyezi-Mungu.

⁵Kiburi cha Waisraeli chaonekana wazi;

watu wa Efraimu watajikwaa katika hatia yao,

nao watu wa Yuda watajikwaa pamoja nao.

⁶Watakwenda na makundi yao ya kondoo na ng'ombe,[#5:6 Taz 4:8,13; Isa 1:11-15; ling 3:5 na 5:15; Amu 5:4. Atakataa matambiko yao na kuwaadhibu. Taz Hos 5:15; Meth 1:28. Ling Yoh 7:34. Mungu alihitaji kutolewa kwa moyo wa kweli sawa na Agano lake. Taz Amo 5:21-22, 6:56; Isa 1:10-17; Yer 7:21-26; pia Meth 21:3.]

kumtafuta Mwenyezi-Mungu;

lakini hawataweza kumpata,

kwa sababu amejitenga nao.

⁷Wamevunja uaminifu kwa Mwenyezi-Mungu,[#5:7 Taz maelezo ya 5:3. Pia 1:2; 2:4. Ling Yer 2:27; wamegeukia Mungu.]

wamezaa watoto walio haramu.

Mwezi mwandamo utawaangamiza,

pamoja na mashamba yao.

Vita kati ya Yuda na Israeli

⁸“Pigeni baragumu huko Gibea,

na tarumbeta huko Rama.

Pigeni king'ora huko Beth-aveni.

Enyi watu wa Benyamini, adui yenu yuko nyuma!

⁹Siku nitakapotoa adhabu

Efraimu itakuwa kama jangwa!

Ninachotangaza miongoni mwa makabila ya Israeli,

ni jambo litakalotukia kwa hakika.

¹⁰Viongozi wa Yuda wamekuwa

wenye kubadili mipaka ya ardhi.

Mimi nitawamwagia hasira yangu kama maji.

¹¹Efraimu ameteswa,[#5:11 Aya hii maana yake sio dhahiri katika makala ya Kiebrania.]

haki zake zimetwaliwa;

kwani alipania kufuata upuuzi.

¹²Hivyo mimi Mungu niko kama nondo kwa Efraimu,

kama donda baya kwa watu wa Yuda.

¹³Watu wa Efraimu walipogundua ugonjwa wao,

naam, watu wa Yuda walipogundua donda lao,

watu wa Efraimu walikwenda Ashuru

kuomba msaada kwa mfalme mkuu;

lakini yeye hakuweza kuwatibu,

hakuweza kuponya donda lenu.

¹⁴Maana mimi nitakuwa kama simba kwa Efraimu,[#5:14 Vinyago vya wanyama vilivyokuwa vinaabudiwa kama mungu katika Asia ndogo. Taz 13:4-8.]

kama mwanasimba kwa watu wa Yuda.

Mimi mwenyewe nitawararua na kuondoka,

nitawachukua na hakuna atakayewaokoa.

¹⁵Nitarudi mahali pangu na kujitenga nao[#5:15 Waisraeli waliamini Mungu anakaa Mlimani Siyoni au hekaluni mwake. Taz Kumb 33 au Zab 18:6; 46:4.; #5:15 Mwenyezi-Mungu atawaacha mikononi mwa adui mpaka wajifunze kisha wamrudie. Taz 10:2; 14:1; ling Zab 63:1; 78:34, pia Amo 2:7,14; 3:5.]

mpaka wakiri kosa lao na kunirudia.

Taabu zao zitawafundisha wanitafute, wakisema: