Mfalme Hezekia anaugua

¹Wakati huo, mfalme Hezekia aliugua sana karibu kufa. Ndipo nabii Isaya mwana wa Amozi, akamwendea, akamwambia, “Hivi ndivyo anavyosema Mwenyezi-Mungu: Panga mambo yako sawasawa katika nyumba yako kwa kuwa utakufa, hutapona.”[#38:1-20 Simulizi la aya 1-8 (ambalo linamalizika katika aya 21-22) linatofautiana na simulizi sawa na hilo katika 2Fal 20:1-11. Utenzi wa sifa katika aya 9-20 haupo katika 2Fal 20. Utenzi huu unafanana na Zab 6 ambayo ina maombi ya mwandishi wa Zaburi na kumalizia na sifa na shukrani kwa kuwa Mungu ametekeleza ahadi yake.]

²Hezekia akageukia upande wa ukuta na kumwomba Mwenyezi-Mungu,

³akisema, “Ee Mwenyezi-Mungu, nakusihi ukumbuke jinsi nilivyokutumikia kwa uaminifu na kwa moyo wangu wote, na kutenda yaliyo sawa mbele yako.” Hezekia akalia kwa uchungu sana.

⁴Kisha neno la Mwenyezi-Mungu lilimjia Isaya:

⁵“Nenda ukamwambie Hezekia, Mwenyezi-Mungu, Mungu wa baba yako Daudi, anasema hivi: Nimesikia ombi lako na nimeyaona machozi yako. Basi, nakuongezea miaka kumi na mitano ya kuishi.

⁶Nitakuokoa wewe pamoja na mji huu mikononi mwa mfalme wa Ashuru na kuulinda.”

²¹Basi, Isaya akasema, “Chukueni andazi la tini mkaliweke kwenye jipu lake, apate kupona.”[#38:21 Rejea 2Fal 20:7-8. Sura 38 aya 21-22 zimehamishiwa na kupelekwa mara baada ya aya ya sita na kabla ya aya ya saba ili kuwe na mtiririko wenye kueleweka vizuri zaidi (taz 2Fal 26:6-9).]

²²Hezekia akauliza, “Ni ishara gani itakayonijulisha kwamba mimi nitakwenda katika nyumba ya Mwenyezi-Mungu?”

⁷Isaya akamjibu, “Hii itakuwa ishara kwako kutoka kwa Mwenyezi-Mungu kwamba Mwenyezi-Mungu atafanya kama alivyoahidi.

⁸Nitafanya kivuli kwenye ngazi iliyojengwa na Ahazi, kirudi nyuma hatua kumi.” Nacho kivuli kikarudi nyuma hatua kumi.

⁹Kisha mfalme Hezekia alipopona, akatunga wimbo huu wa shukrani:

¹⁰“Nilisema: nikiwa mbichi kabisa,

inanibidi niage dunia.

Mimi nimepangiwa kwenda kuzimu

siku zote zilizonibakia.

¹¹Nilisema sitamwona tena Mwenyezi-Mungu,

katika nchi ya walio hai;

wala sitamwona mtu yeyote tena,

miongoni mwa wakazi wa ulimwengu.

¹²Makao yangu yameng'olewa kwangu,

kama hema la mchungaji;

kama, mfumanguo nimefungasha maisha yangu;

Mungu amenikatilia mbali;

kabla hata mwisho wa siku amenikomesha.

¹³Usiku kucha nililia kuomba msaada;

kama simba, anavunjavunja mifupa yangu;

mchana na usiku ananikomesha.

¹⁴“Ninalia kama mbayuwayu,

nasononeka kama njiwa.

Macho yangu yamefifia kwa kuangalia juu.

Ee Bwana, nateseka;

uwe wewe usalama wangu!

¹⁵Lakini niseme nini:

yeye mwenyewe aliniambia,

naye mwenyewe ametenda hayo.

Usingizi wangu wote umenitoroka

kwa sababu ya uchungu moyoni mwangu.

¹⁶“Ee Bwana, Sisi twaishi kutokana na yote uliyotenda,

kwa hayo yote mimi binafsi pia ninaishi.

Nirudishie afya, uniwezeshe kuishi.

¹⁷Nilipata mateso makali kwa faida yangu;

lakini umeyaokoa maisha yangu

kutoka shimo la uharibifu,

maana umezitupa dhambi zangu nyuma yako.

¹⁸Huko kuzimu mtu hawezi kukushukuru wewe;

waliokufa hawawezi kukushukuru wewe.

Wala washukao huko shimoni

hawawezi tena kutumainia uaminifu wako.

¹⁹Walio hai ndio wanaokushukuru,

kama na mimi ninavyofanya leo.

Kina baba huwajulisha watoto wao uaminifu wako.

²⁰“Mwenyezi-Mungu ataniokoa.

Nasi tutamsifu kwa nyimbo za vinubi

siku zote za maisha yetu,

nyumbani kwake Mwenyezi-Mungu.”