Mungu amwita Isaya kuwa nabii

¹Mnamo mwaka aliofariki mfalme Uzia, nilimwona Bwana ameketi katika kiti cha enzi kilicho juu na cha fahari. Pindo la vazi lake lilienea hekaluni mote,[#6:1 Yaani mwaka 740 K.K. (rejea 2Fal 15:7; 2Nya 26:23).; #6:1 Katika mahali patakatifu sana hekaluni kulikuwa na mahali pa kiti cha enzi cha Mungu asiyeonekana (Kut 25:21-22; Zab 99:1).]

²na juu yake walikuwa wamekaa malaika. Kila mmoja alikuwa na mabawa sita: mawili ya kufunika uso, mawili ya kufunika mwili na mawili ya kurukia.[#6:2 Au, “maserafi”, neno la Kiebrania lenye maana ya “enye kumetameta” au “wenye kuwakawaka” na linatumiwa tu hapa katika Biblia kuwataja viumbe hao wa mbinguni. Maneno “Mabawa mawili … ya kufunika mwili”, Kiebrania neno kwa neno, “mabawa mawili ya kufunika miguu”, yamkini ni msemo wa kuonesha heshima na adabu mbele ya Mungu.]

³Waliitana kila mmoja na mwenzake hivi:

“Mtakatifu, mtakatifu, mtakatifu,

ni Mwenyezi-Mungu wa majeshi!

Dunia yote imejaa utukufu wake.”

⁴Sauti yao iliitikisa misingi ya milango ya hekalu, nalo likajaa moshi.

⁵Basi, mimi nikasema, “Ole wangu! Mimi nimeangamia, maana, midomo yangu ni najisi, na watu ninaoishi nao ni najisi kama mimi. Hata hivyo, kwa macho yangu mwenyewe, nimemwona Mfalme, Mwenyezi-Mungu wa majeshi.”

⁶Basi, mmoja wa hao malaika akaruka kunijia, akiwa ameshika mkononi koleo lililokuwa na kaa la moto alilolitwaa madhabahuni.

⁷Naye akinigusa nalo mdomoni, akasema: “Tazama, kaa hili limekugusa mdomo; umeondolewa hatia yako, umesamehewa dhambi yako.”

⁸Kisha nikamsikia Mwenyezi-Mungu akisema, “Nimtume nani? Ni nani atakayekuwa mjumbe wetu?” Nami nikajibu, “Niko hapa! Nitume mimi.”[#6:8 Matumizi ya wingi hapa “wetu” ni ngumu; lakini huenda Mungu anajumuisha hapa wakazi wake wa mbinguni (rejea 1Fal 22:19; taz pia Zab 82:1).]

⁹Naye akaniambia, “Nenda ukawaambie watu hawa:

‘Mtasikiliza sana, lakini hamtaelewa;

mtatazama sana, lakini hamtaona.’”

¹⁰Kisha akaniambia,

“Zipumbaze akili za watu hawa,

masikio yao yasisikie,

macho yao yasione;

ili wasije wakaona kwa macho yao,

wakasikia kwa masikio yao,

wakaelewa kwa akili zao,

na kunigeukia, nao wakaponywa.”

¹¹Mimi nikauliza,

“Bwana, mpaka lini?”

Naye akanijibu,

“Mpaka hapo miji itakapobaki tupu bila wakazi,

nyumba bila watu,

na nchi itakapoharibiwa kabisa.

¹²Nami Mwenyezi-Mungu nitawapeleka watu mbali,

na kuifanya nchi yote kuwa mahame.

¹³Hata wakibaki watu asilimia kumi,

nao pia watateketezwa.

Hao watakuwa kama mvinje au mwaloni

ambao kisiki chake kimebaki baada ya kukatwa.”

(Kisiki hicho ni mbegu takatifu ya chanzo kipya.)