Teka haraka, pokonya upesi

¹Mwenyezi-Mungu aliniambia hivi: “Chukua ubao mkubwa, uandike juu yake maneno yanayosomeka kwa urahisi: ‘TEKA-HARAKA-POKONYA-UPESI.’”[#8:1 Tafsiri yamkini ya makala ngumu ya Kiebrania.; #8:1 Katika Kiebrania ni “Maher-shalal-hash-bazi” ambalo ni jina la mmoja wa watoto wa Isaya (8:3).]

²Basi, nikajipatia mashahidi wawili waaminifu ambao wangenishuhudia: Kuhani Uria na Zekaria, mwana wa Yeberekia.[#8:2 Uria alikuwa kuhani wakati wa mfalme Ahazi (2Fal 16:10-16) naye Zekaria huenda alikuwa baba mkwe wa Ahazi (2Fal 18:2).]

³Nililala na mke wangu ambaye pia ni nabii, akapata mimba, akajifungua mtoto wa kiume. Mwenyezi-Mungu akaniambia, “Mpe mtoto huyo jina ‘Teka-haraka-pokonya-upesi.’[#8:3 Mkewe Isaya naye pia ni nabii. Wafafanuzi wengi wa Maandiko wanahisi kwamba huyu ni sawa na yule anayeitwa “msichana” katika 7:14. Ikiwa ni huyohuyo, basi haikupita muda mrefu sana kati ya kuzaliwa kwa Imanueli (7:14) na huyo “Maher-shalal-hash-baz” na majina yao yanagusia mazingira yaleyale ya uvamizi wa mwaka 732 uliofanywa na Waashuru dhidi ya Israeli (yaani utawala wa kaskazini) na Siria.]

⁴Maana kabla mtoto huyu hajafikia umri wa kuweza kutamka: ‘Baba’ au ‘Mama,’ utajiri wa Damasko na nyara walizoteka huko Samaria zitapelekwa kwa mfalme wa Ashuru.”

Mfalme wa Ashuru anakuja

⁵Mwenyezi-Mungu aliongea nami tena, akaniambia,

⁶“Kwa kuwa watu hawa wameyakataa maji ya Shiloa yatiririkayo polepole, wakafa moyo mbele ya mfalme Resini na mfalme Peka mwana wa Remalia,[#8:6 Mfereji uliotengenezwa kuleta maji mjini Yerusalemu kutoka chemchemi ya Gihoni.]

⁷basi, mimi Bwana nitawaletea mafuriko makuu ya maji ya mto Eufrate yaani mfalme wa Ashuru na nguvu zake zote; yatafurika na kupita kingo zake.

⁸Utaingia nchini Yuda kwa nguvu na kufurika na kupanda mpaka shingoni; utaenea juu ya nchi yako yote, ee Emanueli!”[#8:8 Taz 7:14.]

Mipango ya bure ya watu

⁹Unganeni enyi watu wa mataifa nanyi mtafedheheshwa!

Sikilizeni enyi nchi za mbali duniani!

Jiwekeni tayari na kufedheheshwa;

naam, kaeni tayari na kufedheheshwa.

¹⁰Shaurianeni pamoja lakini itakuwa bure;

fanyeni mipango lakini haitafaulu,

maana Mungu yu pamoja nasi.

Onyo kwa nabii

¹¹Mwenyezi-Mungu alinionya kwa nguvu nisifuate njia za watu hawa, akaniambia,

¹²“Usijumuike nao katika njama zao, wala usiogope yale wanayoyaogopa wala kuwa na hofu.

¹³Nitambue mimi peke yangu, Mwenyezi-Mungu wa majeshi, kuwa mtakatifu; utaniogopa na kunicha mimi peke yangu.

¹⁴Mimi nitakuwa kimbilio, nitakuwa pia kama jiwe la kujikwaa, mwamba wa kuziangusha falme za Israeli na Yuda; nitakuwa mtego wa kuwatega na kuwanasa wakazi wa Yerusalemu.

¹⁵Watu wengi watajikwaa, wataanguka na kupondeka; watanaswa katika mtego huo na kuchukuliwa mateka.”

Onyo juu ya kushauriana na mizimu

¹⁶Nitalihifadhi agizo hilo na kulifunga fundisho hilo miongoni mwa wafuasi wangu.[#8:16 Maaguzi ya nabii yaliandikwa katika vitabu mviringo na kutiwa mhuri. Wafuasi wake Isaya walihifadhi maaguzi hayo hadi wakati yalipotimia (taz pia Isa 29:11; Yer 32:8-15).]

¹⁷Nitamngojea Mwenyezi-Mungu ambaye amejificha mbali na wazawa wa Yakobo; nitamtumainia.

¹⁸Mimi pamoja na watoto alionipa Mwenyezi-Mungu ni ishara na alama katika Israeli kwa jina la Mwenyezi-Mungu wa majeshi akaaye mlimani Siyoni.[#8:18 Taz maelezo ya 7:3,14; 8:3.]

¹⁹Baadhi watawaambieni: “Nendeni mkatake shauri kwa mizimu na mizuka iliayo kama ndege; kwani ni kawaida watu kutaka shauri kwa miungu yao, na kutaka shauri kwa wafu kwa ajili ya walio hai.”[#8:19 Juu ya marufuku ya kushauriana na mizimu taz Kumb 18:10-14.]

²⁰Hakika anayesema hivyo hajapata kuona mwanga. Lakini nyinyi shikilieni lile agizo na fundisho la Mungu.

Taabu

²¹Watu watatangatanga nchini wamefadhaika sana na wenye njaa. Na wakiwa na njaa, hasira zitawawaka na kumlaani mfalme wao kadhalika na Mungu wao. Watatazama juu mbinguni[#8:21-22 Picha tunayopewa hapa ni ya kutisha na isiyo na matumaini kabisa. Kisehemu hiki kinafanana na Isa 5:30.]

²²na kuiangalia dunia, lakini wataona tu taabu, giza na mauzauza ya shida. Hakuna atakayeliepa giza hilo kuu.