Mtoto amezaliwa kwetu

¹Lakini nchi ile iliyokuwa imekumbwa na huzuni haitabaki daima katika giza hilo kuu. Hapo awali Mungu alizifedhehesha nchi za Zebuluni na Naftali, lakini siku za usoni ataifanikisha sehemu hii ya baharini na nchi iliyo ng'ambo ya Yordani na hata Galilaya wanamoishi watu wa mataifa.[#9:1 Mfululizo wa aya hapa unahitilafiana na ule unaotumika katika Biblia ya Kiebrania. 9:1-21 zinawiana na 8:23—9:20 katika makala ya Kiebrania.; #9:1-6 Tofauti na aya za mwisho za sura iliyotangulia, hapa panafuata maelezo yenye kuleta matumaini ya mema (taz maelezo ya 4:2-6).; #9:1 Makabila ya Zebuluni na Naftali yalikuwa katika eneo la kaskazini-mashariki ya Galilaya. Makabila haya mawili ndiyo hasa yaliyoteseka zaidi wakati majeshi ya mfalme Tiglath-pileseri wa Ashuru yalipovamia Palestina mnamo mwaka 733 K.K. (2Fal 15:29).]

²Watu waliotembea gizani

wameona mwanga mkubwa.

Watu walioishi katika nchi ya giza kuu,

sasa mwanga umewaangazia.

³Wewe, ee Mungu, umelikuza taifa,

umeiongeza furaha yake.

Watu wanafurahi mbele yako,

wana furaha kama wakati wa mavuno,

kama wafurahivyo wanaogawana nyara.

⁴Maana nira nzito walizobeba,

nira walizokuwa wamefungwa,

na fimbo ya wanyapara wao,

umezivunjavunja kama wakati wa Wamidiani.

⁵Viatu vyote vya washambulizi vitani

na mavazi yote yenye madoa ya damu

yatateketezwa kama kuni za kuwasha moto.

⁶Maana mtoto amezaliwa kwa ajili yetu,

tumepewa mtoto wa kiume.

Naye atapewa mamlaka ya kutawala.

Ataitwa: “Mshauri wa Ajabu”.

“Mungu Mwenye Nguvu”,

“Baba wa Milele”,

“Mfalme wa Amani”.

⁷Utawala wake utastawi daima,

amani ya ufalme wake haitakoma.

Atachukua wadhifa wa mfalme Daudi

na kutawala juu ya ufalme wake;

ataustawisha na kuuimarisha,

kwa haki na uadilifu,

tangu sasa na hata milele.

Hayo atayafanya Mwenyezi-Mungu wa majeshi.

Adhabu ya Waisraeli

⁸Mwenyezi-Mungu ametoa tamko dhidi ya Yakobo

nalo litampata Israeli.

⁹Watu wote watatambua,

ukoo wote wa Efraimu

na wakazi wa Samaria.

Kwa kiburi na majivuno wanasema:

¹⁰“Kuta za matofali zimeanguka

lakini sisi tutazijenga kwa mawe yaliyochongwa!

Nyumba za boriti za mikuyu zimeharibiwa

lakini mahali pake tutajenga za mierezi.”

¹¹Basi, Mwenyezi-Mungu atawaletea wapinzani

na kuwachochea maadui zao.

¹²Waaramu upande wa mashariki,[#9:12 Hili ni jina lingine la watu wa Siria ambao ni maadui wa jadi wa Waisraeli upande wa kaskazini mwa Palestina.]

Wafilisti upande wa magharibi,

wamepanua vinywa vyao kuimeza Israeli.

Hata hivyo, hasira yake haijatulia,

bado ameunyosha mkono wake.

¹³Ingawa aliwaadhibu watu,

hawakumrudia Mwenyezi-Mungu wa majeshi.

¹⁴Basi kwa muda wa siku moja tu,

Mwenyezi-Mungu atakata katika Israeli vichwa na mikia,

tawi la mtende na nyasi:

¹⁵Vichwa ndio wazee na waheshimiwa,

mikia ndio manabii wafundishao uongo.

¹⁶Wale wanaoongoza watu hawa wamewapotosha,

na hao wanaoongozwa nao wamepotoka.

¹⁷Kwa hiyo, Mwenyezi-Mungu hawahurumii vijana wao,[#9:17 Kadiri ya makala nyingine ya kale. Kiebrania: “hapendezwi”.]

hana huruma juu ya yatima na wajane wao;

kwani hakuna hata mmoja amchaye Mungu,

kila mtu husema uongo.

Hata hivyo, hasira yake haijatulia,

bado ameunyosha mkono wake.

¹⁸Uovu huwaka kama moto

uteketezao mbigili na miiba;

huwaka kama moto msituni,

na kutoa moshi mzito upandao angani juu.

¹⁹Kwa ghadhabu ya Mwenyezi-Mungu wa majeshi

nchi imechomwa moto,

na watu ni kama kuni za kuuwasha.

Hakuna mtu anayemhurumia ndugu yake;

²⁰wananyang'anya upande mmoja na hawatosheki;

wanakula upande mwingine lakini hawashibi.

Kila mmoja anamshambulia mwenzake.

²¹Manase dhidi ya Efraimu,[#9:21 Makabila mawili ya kaskazini ambayo yalitokana na watoto wawili wa Yosefu (Mwa 46:19-22; 48:5-6). Uhasama huo unaotajwa hapa waweza kuhusu wakati wa Waamuzi (Amu 12:1-6), au wakati wa wafalme Shalumu na Peka (2Fal 15:13-16,23-25).]

Efraimu dhidi ya Manase

na wote wawili dhidi ya Yuda.

Hata hivyo, hasira ya Mwenyezi-Mungu haijatulia,

bado ameunyosha mkono wake.