Ahadi za Mungu kwa watu wote

¹Neno lililomjia Yeremia kutoka kwa Mwenyezi-Mungu:[#30:1-9 Huduma ya Yeremia haikuhusu tu kung'oa na kuangamiza bali pia kupanda na kujenga (taz Yer 1:10). Katika baadhi ya sura zilizotangulia, hapa na pale tunakuta tangazo la wokovu Yer 3:4-17; 23:3-4, na ile barua kwa wahamishwa (Yer 29:10) ilitangaza mwisho wa uhamisho na kurudi kwa wahamishwa. Lakini sasa, ahadi hizo za kuokolewa na kurekebishwa zinaendelezwa zaidi katika sehemu ya kitabu cha Yeremia ijulikanayo kama: “Kitabu cha Faraja” (sura 30—33). Katika sehemu hii, nabii anaendelea na ujumbe wa Mungu katika mtindo wa kishairi, na maandishi ya kawaida yanatumiwa pale ambapo yahusu vitendo vya ishara (Taz Yer 13:1-11) ili kuwapasha watu wa Mungu ujumbe wa matumaini.]

²“Mimi Mwenyezi-Mungu, Mungu wa Israeli, nasema hivi: Yaandike katika kitabu maneno yote niliyokuambia.[#30:2 Rejea Yer 36:2,4,28,32.]

³Maana siku zaja ambapo nitawarudishia fanaka zao watu wangu wa Israeli na Yuda na kuwarudisha katika nchi niliyowapa wazee wao, nao wataimiliki. Mimi Mwenyezi-Mungu nimesema.”[#30:3 Msemo wa kawaida katika kitabu cha Kumbukumbu la Sheria. Rejea Kumb 6:18,23; 7:8; 8:1; 10:11; 11:9,21.]

⁴Haya ndiyo mambo aliyosema Mwenyezi-Mungu kuhusu watu wa Israeli na Yuda:

⁵“Mimi Mwenyezi-Mungu nasema hivi:

Kumesikika kilio cha hofu

sauti ya kutisha wala si ya amani.

⁶Jiulizeni sasa na kufahamu:

Je, mwanamume aweza kujifungua mtoto?

Mbona basi, namwona kila mwanamume

amejishika kiunoni kama mwanamke mwenye utungu

na nyuso zao zimegeuka rangi?

⁷Kweli, siku hiyo ni kubwa,[#30:7 Dokezo juu ya siku ya Bwana (rejea Yoe 2:1,11; Sef 1:14; Ufu 6:17). Nabii Amosi alisema juu ya siku hiyo kama siku ya giza na sio ya mwanga (Amo 5:18). Yeremia naye anasema kuhusu siku hiyo kuwa ya upendo wa Mwenyezi-Mungu ambao anaponya majeraha ya watu wake (Yer 30:17) na kuwakusanya miongoni mwa mataifa na kuwawezesha kurudi katika nchi ya wazee wao (32:8).]

hakuna nyingine kama hiyo;

ni siku ya huzuni kwa watu wa Yakobo;

hata hivyo, wataokolewa humo.

⁸“Siku hiyo itakapofika, nasema mimi Mwenyezi-Mungu wa majeshi, nitaivunja nira iliyo shingoni mwao na kukata minyororo yao.

⁹Nao hawatakuwa tena watumwa wa wageni, bali watanitumikia mimi Mwenyezi-Mungu, Mungu wao, na mfalme wa ukoo wa Daudi ambaye nitawateulia.

¹⁰“Mimi Mwenyezi-Mungu nasema hivi:

Usiogope ee Yakobo mtumishi wangu,

wala usifadhaike, ee Israeli;

maana nitakuokoa huko mbali uliko,

na wazawa wako kutoka uhamishoni.

Utarudi na kuishi kwa amani,

wala hakuna mtu atakayekuogopesha.

¹¹Maana mimi niko pamoja nawe, kukuokoa.

Mimi Mwenyezi-Mungu nimesema.

Nitayaangamiza kabisa mataifa yote,

ambayo nilikutawanya kati yao;

lakini wewe sitakuangamiza kabisa.

Nitakuadhibu kadiri unavyostahili

wala sitakuacha uende bila kukuadhibu.

Mimi Mwenyezi-Mungu nimesema.

¹²“Mimi Mwenyezi-Mungu nasema hivi:

Majeraha yako hayaponyeki,

vidonda vyako havitibiki.

¹³Hakuna atakayeshughulikia kisa chako,

jeraha lako halina dawa,

wewe hutaponyeshwa.

¹⁴Wapenzi wako wote wamekusahau;[#30:14 Taz Yer 22:20 maelezo.]

hawajali chochote juu yako,

nimekupiga pigo la adui;

umeadhibiwa bila huruma,

kwa kuwa kosa lako ni kubwa,

dhambi zako ni nyingi mno.

¹⁵Mbona unalia juu ya jeraha lako?

Maumivu yako hayaponyeki.

Nimekutendea hayo yote,

kwa sababu kosa lako ni kubwa,

dhambi zako ni nyingi mno.

¹⁶Lakini wote wanaokuangamiza, wataangamizwa,

na maadui zako wote watachukuliwa uhamishoni;

wanaokuteka nyara, watatekwa nyara,

wanaokuwinda nitawawinda.

¹⁷“Nitakurudishia afya yako,

na madonda yako nitayaponya,

japo wamekuita ‘Aliyetupwa’,

‘Mji Siyoni usio na wa kuutunza!’”

¹⁸Mwenyezi-Mungu asema hivi:

“Nitazirudisha tena fanaka za maskani ya Yakobo,

na kuyaonea huruma makao yake;

mji utajengwa upya juu ya magofu yake,

na ikulu ya mfalme itasimama pale ilipokuwa.

¹⁹Humo zitatoka nyimbo za shukrani

na sauti za wale wanaosherehekea.

Nitawaongeza na wala hawatakuwa wachache;

nitawafanya waheshimiwe wala hawatadharauliwa.

²⁰Watoto wao watakuwa kama walivyokuwa zamani,

jumuiya yao itaimarika mbele yangu,

nami nitawaadhibu wote wanaowakandamiza.

²¹Kiongozi wao atakuwa mmoja wao,

mtawala wao atatokea miongoni mwao.

Nitamleta karibu naye atanikaribia;

maana, nani anayethubutu kunikaribia kwa nguvu zake?

Mimi Mwenyezi-Mungu nimesema.

²²Nanyi mtakuwa watu wangu,

nami nitakuwa Mungu wenu.”

²³Tazama, dhoruba kali kutoka kwa Mwenyezi-Mungu!

Ghadhabu imezuka,

kimbunga cha tufani

kitamlipukia mtu mwovu kichwani.

²⁴Hasira ya Mwenyezi-Mungu haitarudi nyuma,

mpaka atakapotekeleza na kukamilisha

matakwa ya moyo wake.

Siku zijazo mtayaelewa vema mambo hayo.