Jibu la Yobu

¹Ndipo Yobu akajibu:[#12:1—14:22 Sehemu hii ya hoja za Yobu inamalizia duru ya kwanza ya mazungumzo ambayo ilifunguliwa na Yobu katika sura ya 3, ikafuatiwa na hoja ya Elifazi (sura 4—5), kisha Bildadi (sura 8) na Sofari (sura 11). Hapa, basi, Yobu ataongea tena (sura 12—14) kabla rafiki zake kufuata tena na hoja zao katika duru ya pili. 12:2-6 Katika aya hizi Yobu anatamka kwamba rafiki zake hawampiti kwa jambo la ujuzi na hekima (taz pia 13:2).]

²“Sawa! Nyinyi ni watu wa hekima.

Hekima itakufa wakati ule mtakapokufa.

³Mimi nami ni mwelewa kama nyinyi.

Mimi si mtu duni kuliko nyinyi.

Yote mliyosema kila mtu anajua.

⁴Nimekuwa kichekesho kwa rafiki zangu:

mimi niliyemwomba Mungu na akanijibu;

mimi niliye mwadilifu na bila lawama,

nimekuwa kichekesho kwa watu.

⁵Mtu anayestarehe hudharau msiba;

kwake, msiba huwajia wale wanaoteleza.

⁶Makao ya wanyang'anyi yana amani;

wenye kumchokoza Mungu wako salama,

nguvu yao ni mungu wao.

⁷Lakini waulize wanyama nao watakufunza;

waulize ndege nao watakuambia.

⁸Au iulize mimea nayo itakufundisha;

sema na samaki nao watakuarifu.

⁹Nani kati ya viumbe hivyo,

asiyejua kwamba Mwenyezi-Mungu ametenda hayo?

¹⁰Uhai wa kila kiumbe hai umo mikononi mwake;

kadhalika na pumzi ya uhai wa binadamu.

¹¹Je, sikio haliyapimi maneno

kama ulimi uonjavyo chakula?

¹²Hekima iko kwa watu wazee,

maarifa kwao walioishi muda mrefu.

¹³Lakini hekima na uwezo ni vyake Mungu,

yeye ana maarifa na ujuzi.

¹⁴Akibomoa, hakuna awezaye kujenga upya;

akimfunga mtu, hakuna awezaye kumfungua.

¹⁵Akizuia mvua, twapata ukame;

akiifungulia, nchi hupata mafuriko.

¹⁶Yeye ana nguvu na hekima;

wanaodanganywa na wanaodanganya ni wake.

¹⁷Huwaacha washauri waende zao uchi,[#12:17 Tafsiri yamkini ya makala ngumu ya Kiebrania. Kuanzia hapa na kuendelea hadi 12:25 Yobu anasema juu ya kitendo cha Mungu cha kupindua bahati na fanaka za watu ambao waliheshimika na wenye nguvu katika jumuiya kama vile Yobu mwenyewe.]

huwafanya waamuzi kuwa wapumbavu.

¹⁸Huwavua wafalme vilemba vyao;

na kuwafunga viunoni kamba za wafungwa;

¹⁹Huwaacha makuhani waende uchi;

na kuwaangusha wenye nguvu.

²⁰Huwanyang'anya washauri kipawa chao cha kuongea,

huwapokonya wazee hekima yao.

²¹Huwamwagia wakuu aibu,

huwaondolea wenye uwezo nguvu zao.

²²Huvifunua vilindi vya giza,

na kuleta mwangani yaliyokuwa gizani.

²³Huyakuza mataifa kisha huyaangamiza,

huyafanya yapanuke kisha huyatawanya.

²⁴Huwaondolea viongozi wa watu ujuzi wao,

huwafanya watangetange nyikani kusiko na njia,

²⁵wakapapasapapasa gizani kusiko na mwanga;

na kuwafanya wapepesuke kama walevi.