¹Mwenyezi-Mungu akaendelea kumwambia Yobu:[#40—41 Tafsiri hii inafuata mfululizo wa aya katika Biblia ya Kiebrania, yaani sura ya 40 ina aya 32 na sura ya 41 ina aya 26. Katika baadhi ya tafsiri sura ya 40 ina aya 24. Ndiyo kusema tafsiri hizo zinaanza sura ya 41:1 pale ambapo Biblia ya Kiebrania (na tafsiri hii) ina sura ya 40:25.]

²“Je, wewe mwenye kuchunguza makosa utashindana na Mungu Mwenye Nguvu?

Wewe unayebishana nami Mungu, basi jibu mambo hayo!”

³Kisha Yobu akamjibu Mwenyezi-Mungu:[#40:3-5 Jibu la kwanza la Yobu lina shabaha ya kuonesha udogo wake mbele yake Mungu.]

⁴“Mimi sifai kitu nitakujibu nini?

Naufunga mdomo wangu.

⁵Nilithubutu kusema na sitasema tena.

Nilisisitiza lakini sitaendelea kusema zaidi.”

⁶Hapo Mwenyezi-Mungu akamjibu kutoka kimbunga:

⁷“Jikaze kama mwanamume.

Nitakuuliza, nawe utanijibu.

⁸Je, unataka kweli kubatilisha hukumu yangu,

kuniona nina hatia ili wewe usiwe na hatia?

⁹Je, una nguvu kama mimi Mungu?

Waweza kunguruma kwa sauti kama yangu?

¹⁰“Basi, jioneshe kuwa na fahari na ukuu,

ujipambe kwa utukufu na fahari.

¹¹Wamwagie watu hasira yako kuu;

mwangalie kila mwenye kiburi na kumwangusha.

¹²Mwangalie kila mwenye kiburi na kumporomosha,

uwakanyage waovu mahali walipo.

¹³Wazike wote pamoja ardhini;

mfunge kila mmoja kwa kifungo cha kifo.

¹⁴Hapo nitakutambua,

kwamba nguvu yako mwenyewe imekupa ushindi.

¹⁵“Liangalie lile dude Behemothi,[#40:15 Mnyama wa hadithi za kale ambaye anasimuliwa kwa sifa zinazofanana na za kiboko.]

nililoliumba kama nilivyokuumba wewe.

Hilo hula nyasi kama ng'ombe,

¹⁶lakini mwilini lina nguvu ajabu,

na misuli ya tumbo lake ni imara.

¹⁷Huufanya mkia wake mgumu kama mwerezi,

mishipa ya mapaja yake imeshonwa pamoja.

¹⁸Mifupa yake ni mabomba ya shaba,

viungo vyake ni kama pao za chuma.

¹⁹“Hilo ni la kwanza la ajabu kati ya viumbe vyangu!

Ni mimi Muumba wake niwezaye kulishinda.

²⁰Milima wanamocheza wanyama wote wa porini

hutoa chakula chake.

²¹Hujilaza chini ya vichaka vya miiba,

na kujificha kati ya matete mabwawani.

²²Hujisitiri katika vivuli vya vichaka vya miiba

na vya miti iotayo kando ya vijito.

²³Mto ukifurika haliogopi,

halitishiki hata mto Yordani ukilifurikia kinywani.

²⁴Nani awezaye kuliziba macho na kuliteka?

Nani awezaye kulitoboa pua kwa mtego?

²⁵Je, waweza kuvua dude Lewiyathani kwa ndoana,[#40:25 Au, “mamba”. Taz Yobu 3:8.; #40:25 Baadhi ya tafsiri zinaanza sura 40:1 hapa.]

au kuufunga ulimi wake kwa kamba?

²⁶Je, unaweza kulitia kamba puani mwake,

au kulitoboa taya kwa kulabu?

²⁷Je, wadhani litakusihi uliachilie?

Je, litazungumza nawe kwa upole?

²⁸Je, litafanya mapatano nawe,

ulichukue kuwa mtumishi wako milele?

²⁹Je, utacheza nalo kama ndege,

au kulifunga kamba licheze na wajakazi wako?

³⁰Wadhani wavuvi watashindania bei yake?

Je, wafanyabiashara watathubutu kulikata na kugawana?

³¹Je, waweza kuichoma ngozi yake kwa mikuki,

au kichwa chake kwa mfumo wa kuvua samaki?

³²Jaribu tu kuligusa, uone cha mtema kuni;

Kamwe hutarudia tena kufanya hivyo!