¹“Ita sasa, uone kama kuna wa kukuitikia.

Ni yupi kati ya watakatifu utakayemwita?

²Ama kweli hangaiko humuua mpumbavu,

na wivu humwangamiza mjinga.

³Nimepata kuona mpumbavu akifana,

lakini ghafla nikayalaani makao yake.

⁴Watoto wake hawana usalama;

hudhulumiwa mahakamani,

na hakuna mtu wa kuwatetea.

⁵Mazao yake huliwa na wenye njaa,

hata nafaka iliyoota kati ya miiba;

wenye tamaa huuonea shauku utajiri wake.

⁶Kwa kawaida mateso hayatoki mavumbini

wala matatizo hayachipui udongoni.

⁷Bali binadamu huzaliwa apate taabu,[#5:7 Au, kwa tafsiri nyingine yamkini, “binadamu ndiye mwenye kusababisha taabu”.]

kama cheche za moto zirukavyo juu.

⁸“Kama ningekuwa wewe ningemgeukia Mungu,

ningemwekea yeye Mungu kisa changu,

⁹yeye atendaye makuu yasiyochunguzika,

atendaye maajabu yasiyohesabika.

¹⁰Huinyeshea nchi mvua,

hupeleka maji mashambani.

¹¹Huwainua juu walio wanyonge,

wenye kuomboleza huwapa usalama.

¹²Huvunja mipango ya wenye hila,

matendo yao yasipate mafanikio.

¹³Huwanasa wenye hekima kwa werevu wao,[#5:12-13 Rejea 1Kor 3:19 ambapo msemo huu unakaririwa; taz pia 5:2-7.]

mipango ya wajanja huikomesha mara moja.

¹⁴Hao huona giza wakati wa mchana,

adhuhuri hupapasapapasa kama vile usiku.

¹⁵Lakini Mungu huwaokoa yatima wasiuawe,

huwanyakua fukara mikononi mwa wenye nguvu.

¹⁶Hivyo maskini wanalo tumaini,

nao udhalimu hukomeshwa.

¹⁷“Heri mtu yule ambaye Mungu anamrudi![#5:17 Kukubali kuonywa na Mungu ni fadhila ambayo inapendelewa sana na maandishi ya Methali. Rejea Meth 3:1-12; 13:1; 15:5,10,12,32; taz pia Zab 94:12 na Ebr 12:5-6.]

Hivyo usidharau Mungu Mwenye Nguvu anapokuadhibu.

¹⁸Kwani yeye huumiza na pia huuguza;[#5:18 Lugha inayomfananisha Mungu na daktari au muuguzi anayeponya majeraha; sawa kabisa na lugha ya Hos 6:1.]

hujeruhi, na kwa mkono wake huponya.

¹⁹Atakuokoa katika maafa zaidi ya mara moja;[#5:19 Kiebrania kina “atakuokoa katika sita … na katika saba”. Msemo huo ni wa kimfano yaani, atakuokoa tena na tena au daima, tarakimu saba ikiwa ni utimilifu wa jambo. Taz Mwa 4:23-24 maelezo.]

katika balaa la mwisho, uovu hautakugusa.

²⁰Wakati wa njaa atakuokoa na kifo,

katika mapigano makali atakuokoa.

²¹Utakingwa salama na mashambulio ya ulimi,

wala hutaogopa maangamizi yajapo.

²²Maangamizi na njaa vijapo, utacheka,

wala hutawaogopa wanyama wakali wa nchi.

²³Nawe utaafikiana na mawe ya shambani,

na wanyama wakali watakuwa na amani nawe.

²⁴Utaona nyumbani mwako mna usalama;

utakagua mifugo yako utaiona yote ipo.

²⁵Utaona pia wazawa wako watakuwa wengi,

wengi kama nyasi mashambani.

²⁶Utafariki ukiwa mkongwe mtimilifu,

kama mganda wa ngano ya kupurwa iliyoiva vizuri.

²⁷Basi huu ndio utafiti wetu; tena ni ukweli;

uusikie na kuuelewa kwa faida yako.”