Nzige: onyo juu ya siku ya Mwenyezi-Mungu

¹Pigeni tarumbeta huko Siyoni;

pigeni baragumu juu ya mlima mtakatifu!

Tetemekeni enyi wakazi wa Yuda,

maana siku ya Mwenyezi-Mungu inakuja,

naam, siku hiyo iko karibu!

²Hiyo ni siku ya giza na huzuni;

siku ya mawingu na giza nene.

Jeshi kubwa la nzige linakaribia

kama giza linalotanda milimani.

Namna hiyo haijapata kuweko kamwe

wala haitaonekana tena

katika vizazi vyote vijavyo.

³Kama vile moto uteketezavyo

jeshi hilo laharibu kila kitu mbele yake

na kuacha nyuma kila kitu kinateketezwa;

kabla hawajapita, nchi ni kama bustani ya Edeni,

lakini wakisha pita, ni jangwa tupu.

Hakuna kiwezacho kuwaepa!

⁴Wanaonekana kama farasi,

wanashambulia kama farasi wa vita,

⁵Wanaporukaruka kwenye vilele vya milima,

wanarindima kama magari ya farasi,

wanavuma kama mabua makavu motoni.

Wamejipanga kama jeshi kubwa

tayari kabisa kufanya vita.

⁶Wakaribiapo, watu hujaa hofu,

nyuso zao zinawaiva.

⁷Wanashambulia kama mashujaa wa vita;

kuta wanazipanda kama wanajeshi.

Wote wanakwenda mbele moja kwa moja,

bila hata mmoja wao kubadilisha njia.

⁸Hakuna amsukumaye mwenziwe;

kila mmoja anafuata mkondo wake.

Wanapita kati ya vizuizi vya silaha,

wala hakuna kiwezacho kuwazuia.

⁹Wanauvamia mji,

wanapiga mbio ukutani;

wanaziparamia nyumba na kuingia,

wanapenya madirishani kama wezi.

¹⁰Nchi inatetemeka mbele yao,

mbingu zinatikisika.

Jua na mwezi vyatiwa giza,

nazo nyota zinaacha kuangaza.

¹¹Mwenyezi-Mungu anaamuru jeshi lake kwa sauti;

askari wake ni wengi mno,

wanaomtii hawahesabiki.

Siku ya Mwenyezi-Mungu kweli ni kuu na ya kutisha sana!

Nani atakayeweza kuistahimili?

Wito wa toba

¹²“Lakini hata sasa,”

nasema mimi Mwenyezi-Mungu,

“Nirudieni kwa moyo wote,

kwa kufunga, kulia na kuomboleza.

¹³Msirarue mavazi yenu kuonesha huzuni

bali nirudieni kwa moyo wa toba.”

Mrudieni Mwenyezi-Mungu, Mungu wenu;

yeye amejaa neema na huruma;

hakasiriki upesi, ni mwingi wa fadhili;

daima yu tayari kuacha kuadhibu.

¹⁴Huenda Mwenyezi-Mungu, Mungu wenu, atabadili nia[#2:14 Rejea Amo 5:15; Yona 3:9; Sef 2:3. Uamuzi wa kusamehe ni wa Mungu peke yake. Tendo la binadamu la kutubu haliwezi kuhimiza uamuzi wa kimungu, ila linampa binadamu tumaini la kupata huruma yake Mungu (rejea 2Sam 12:22; Omb 3:29).]

na kuwapeni baraka ya mazao,

mkamtolea sadaka za nafaka na kinywaji.

¹⁵Pigeni tarumbeta huko Siyoni!

Toeni amri watu wafunge;

itisheni mkutano wa kidini.

¹⁶Wakusanyeni watu wote,

wawekeni watu wakfu.

Waleteni wazee,

wakusanyeni watoto,

hata watoto wanyonyao.

Bwana arusi na bibi arusi

na watoke vyumbani mwao.

¹⁷Kati ya madhabahu na lango la hekalu,[#2:17 Hiyo madhabahu au mahali pa kutambikia ni ile ya shaba ambapo watu waliteketeza kafara walizomtolea Mungu (2Nya 4:1).]

makuhani, wahudumu wa Mwenyezi-Mungu,

walie na kuomba wakisema:

“Wahurumie watu wako, ee Mwenyezi-Mungu.

Usiyaache mataifa mengine yatudharau

na kutudhihaki yakisema,

‘Yuko wapi basi Mungu wao?’”

Mungu ataifanikisha nchi

¹⁸Ndipo Mwenyezi-Mungu akaipenda nchi yake

akawahurumia watu wake.

¹⁹Alisikiliza, akajibu sala zao; akasema,

“Sasa nitawapeni tena nafaka,

sitawafanya mdharauliwe tena na mataifa.

²⁰Nitawaondoa hao adui watokao kaskazini,[#2:20 Kwa wingi, maadui wa Waisraeli kama vile Waashuru na Wababuloni waliwavamia walitoka kaskazini (Yer 1:14-15; 4:6; 6:1; Eze 26:7; 38:6,15; 39:2). Eneo hilo liliwatisha Waisraeli na lilikuwa mfano wa nguvu za kutisha.]

nitawafukuza mpaka jangwani;

askari wa mbele nitawatupa katika Bahari ya Chumvi

na wale wa nyuma katika Bahari ya Mediteranea.

Watatoa uvundo na harufu mbaya,

hao ambao wamefanya maovu makubwa.

²¹“Usiogope, ewe nchi,

bali furahi na kushangilia,

maana Mwenyezi-Mungu ametenda makuu.

²²Msiogope, enyi wanyama.

malisho ya nyikani yamekuwa mazuri,

miti inazaa matunda yake,

mizabibu na mitini zinazaa kwa wingi.

²³“Furahini, enyi watu wa Siyoni,

shangilieni kwa sababu ya Mwenyezi-Mungu, Mungu wenu,

maana amewapeni mvua za masika,

amewapeni mvua ya kutosha:

mvua za masika na mvua za vuli kama hapo awali.

²⁴Mahali pa kupuria patajaa nafaka,

mashinikizo yatafurika divai na mafuta.

²⁵Nitawarudishia miaka ile iliyoliwa na nzige,

kila kitu kilicholiwa na tunutu, parare na matumatu,

hilo jeshi kubwa nililowaletea!

²⁶Mtapata chakula kingi na kutosheka;

mtalisifu jina la Mwenyezi-Mungu, Mungu wenu,

aliyewatendea mambo ya ajabu.

Watu wangu, kamwe hawatadharauliwa tena.

²⁷Mtatambua kwamba mimi nimo miongoni mwenu,

enyi Waisraeli;

kwamba mimi Mwenyezi-Mungu,

ndimi Mungu wenu wala hakuna mwingine.

Watu wangu, kamwe hawatadharauliwa tena.

Siku ya Mwenyezi-Mungu

²⁸“Kisha hapo baadaye

nitaimimina roho yangu juu ya binadamu wote.

Watoto wenu wa kike na wa kiume watatabiri,

wazee wenu wataota ndoto,

na vijana wenu wataona maono.

²⁹Hata juu ya watumishi wa kiume na wa kike,

nitaimimina roho yangu wakati huo.

³⁰“Nitatoa ishara mbinguni na duniani;

kutakuwa na damu, moto na minara ya moshi.

³¹Jua litatiwa giza,

na mwezi utakuwa mwekundu kama damu,

kabla ya kufika siku ya Mwenyezi-Mungu,

siku iliyo kuu na ya kutisha.

³²Hapo watu wote watakaoomba kwa jina la Mwenyezi-Mungu wataokolewa.[#2:32 Rejea Mate 2:17-21 na maelezo yake.]

Maana katika mlima Siyoni na Yerusalemu,

watakuwako watu watakaosalimika,

kama nilivyosema mimi Mwenyezi-Mungu.