¹Mwenyezi-Mungu wa majeshi asema, “Tazama, namtuma mjumbe wangu anitangulie kunitayarishia njia. Bwana mnayemtafuta atalijia hekalu lake ghafla. Mjumbe mnayemtazamia kwa hamu kubwa atakuja na kutangaza agano langu.”[#3:1 Mjumbe huyu ambaye anatayarisha njia ya Bwana (Isa 40:3) anatambuliwa kuwa ni Elia (taz 4:5) na Yohane Mbatizaji (Mat 11:3-14; Marko 1:2; Luka 1:76; 7:27).; #3:1 Tafsiri nyingine yamkini: “Mjumbe wa agano” ambapo hapa yamkini ni dokezo kiasi fulani kwa “Bwana” (Mwa 16:7-16; 18:1-2,17,22).]

²Lakini ni nani atakayestahimili siku hiyo atakapokuja? Ni nani atakayesimama kustahimili atakapotokea? Yeye ni kama moto mkali usafishao chuma; ni kama sabuni ya dobi.[#3:2 Rejea Isa 13:6; Eze 30:2-3; Yoe 1:15; 2:11; Amo 5:18-20; 8:9-14; Sef 1:14-18; Ufu 6:17.]

³Yeye atakuja kuhukumu kama mtu asafishaye na kutakasa fedha. Atawasafisha wazawa wa Lawi, kama mtu afuavyo dhahabu au fedha, mpaka wamtolee Mwenyezi-Mungu tambiko zinazokubalika.

⁴Hivyo, tambiko za watu wa Yuda na wa Yerusalemu zitampendeza Mwenyezi-Mungu kama za watu wa kale; kama katika miaka ya zamani.

⁵Mwenyezi-Mungu wa majeshi asema: “Kisha nitawakaribia ili kuwahukumu. Sitasita kutoa ushahidi dhidi ya wachawi, wazinzi, watoa ushahidi wa uongo, wanaowapunja waajiriwa, wanaowadhulumu wageni na wale wasionicha mimi.

Zaka na tambiko

⁶“Mimi ni Mwenyezi-Mungu, mimi sibadiliki. Lakini nyinyi, nyinyi wazawa wa Yakobo hamjatoweka bado.[#3:6 Rejea Hes 23:19; Ebr 13:8; Yak 1:17.]

⁷Tangu wakati wa wazee wenu, mmezidharau kanuni zangu wala hamkuzifuata. Basi, mimi Mwenyezi-Mungu, Mungu Mkuu nasema: nirudieni, nami nitawageukieni. Lakini nyinyi mnauliza, ‘Tutakurudia namna gani?’ Nami nawaulizeni,[#3:7 Rejea Isa 55:7; Zek 1:3; Yak 4:8. Taz pia Yer 3:1 maelezo.]

⁸Je, ni sawa mtu kumdanganya Mungu? La! Lakini nyinyi mnanidanganya! Walakini nyinyi mwauliza: ‘Tunakudanganya kwa namna gani?’ Naam! Mnanidanganya kuhusu zaka na tambiko zenu.

⁹Nyinyi na taifa lenu lote mmelaaniwa kwa sababu ya kunidanganya.

¹⁰Leteni ghalani mwangu zaka yote, ili nyumbani mwangu kuwe na chakula cha kutosha. Kisha mwaweza kunijaribu. Nijaribuni namna hiyo nanyi mtaona kama sitayafungua madirisha ya mbinguni na kuwatiririshia baraka tele.[#3:10 Kuhusu zaka na matoleo mengine rejea Lawi 27:30; Hes 18:21-24; Kumb 12:6; 14:22-29; Neh 13:12. Taz pia Zab 50:7-15; Isa 43:23.]

¹¹Wadudu waharibifu nitawakemea wasiyaharibu tena mazao yenu. Mizabibu yenu mashambani haitaacha kuzaa matunda. Mimi Mwenyezi-Mungu wa majeshi nimesema.

¹²Ndipo mataifa yote yatawaita nyinyi watu waliobarikiwa, maana nchi yenu itakuwa nchi ya furaha. Mimi Mwenyezi-Mungu, Mungu Mkuu nimesema.”

¹³Mwenyezi-Mungu asema hivi: “Maneno yenu yamekuwa mzigo kwangu. Hata hivyo mnasema, ‘Tumesema nini dhidi yako?’

¹⁴Nyinyi mmesema, ‘Kumtumikia Mungu hakuna faida. Kuna faida gani kuyatii maagizo ya Mwenyezi-Mungu wa majeshi, au kujaribu kumwonesha kuwa tumekosa mbele yake kwa kutembea kama watu wanaoomboleza?

¹⁵Tuonavyo sisi, ni kwamba, wenye kiburi ndio wenye furaha daima. Watu waovu, licha ya kustawi, hata wanapomjaribu Mungu, hawapati adhabu.’”

¹⁶Ndipo watu wanaomcha Mwenyezi-Mungu walipozungumza wao kwa wao, naye Mwenyezi-Mungu akasikia mazungumzo yao. Mbele yake kikawekwa kitabu ambamo iliandikwa kumbukumbu ya wale wanaomcha na kumheshimu.[#3:16 Ili kulikabili tatizo au suala la mateso ya watu waadilifu na kufana kwa watu waovu, jibu ni kwamba Mungu anacho kitabu ambacho kimeandikwa wale wanaomheshimu. Rejea Kut 32:32; Zab 69:28; Dan 12:1; Ufu 3:5; 13:8; 17:8. Taz pia utangulizi wa kitabu cha Yobu.]

¹⁷Iliandikwa hivi: Mwenyezi-Mungu asema: “Hao watakuwa watu wangu. Watakuwa urithi wangu maalumu siku ile nitakapoinuka kufanya ninalokusudia. Sitawadhuru kama vile baba asivyomdhuru mwanawe anayemtumikia.

¹⁸Hapo ndipo mtakapotambua tena tofauti iliyopo kati ya waadilifu na waovu; naam, kati ya mtu anayemtumikia Mungu na asiyemtumikia.”