Kuhusu talaka

¹Yesu alitoka hapo akaenda mkoani Yudea, hata ng'ambo ya mto Yordani. Umati wa watu ukamwendea tena, naye akawafundisha tena kama ilivyokuwa desturi yake.

²Basi, Mafarisayo wakamwendea, na kwa kumjaribu wakamwuliza, “Je, ni halali mume kumpa mkewe talaka?”

³Yesu akawajibu, “Mose aliwapa maagizo gani?”

⁴Nao wakasema, “Mose aliagiza mume kumpatia mkewe hati ya talaka na kumwacha.”

⁵Yesu akawaambia, “Mose aliwaandikia amri hiyo kwa sababu ya ugumu wa mioyo yenu.

⁶Lakini tangu kuumbwa ulimwengu, Mungu aliumba mwanamume na mwanamke.

⁷Hivyo mwanamume atawaacha baba yake na mama yake, ataungana na mke wake,

⁸nao wawili watakuwa mwili mmoja. Kwa hiyo, wao si wawili tena bali mwili mmoja.

⁹Basi, alichounganisha Mungu, binadamu asitenganishe.”

¹⁰Walipoingia tena ndani ya nyumba, wanafunzi wake walimwuliza juu ya jambo hilo.

¹¹Naye akawaambia, “Anayemwacha mkewe na kuoa mwingine, anazini dhidi ya mkewe.[#10:11-12 Taz Mat 5:32; 19:9; Luka 16:18; 1Kor 7:10-11. Kwa jumla, mtazamo na msimamo wa Yesu kuhusu uzinzi ni tofauti sana na ule wa Wayahudi ambao walifikiri uzinzi unatendwa na mwanamke dhidi ya mwanamume na sio pia mwanamume dhidi ya mwanamke (Kumb 22:22).]

¹²Na mwanamke anayemwacha mumewe na kuolewa na mwingine anazini.”

Yesu anawabariki watoto wadogo

¹³Watu walimletea Yesu watoto wadogo ili awaguse, lakini wanafunzi wakawakemea.[#10:13 Yamaanisha awape baraka (10:16; taz pia Mwa 48:14-16).]

¹⁴Yesu alipoona hivyo, alikasirika akawaambia, “Waacheni hao watoto waje kwangu, wala msiwazuie, kwa maana ufalme wa Mungu ni kwa ajili ya watu walio kama watoto hawa.

¹⁵Nawaambieni kweli, mtu yeyote asiyeupokea ufalme wa Mungu kama mtoto mdogo hataingia humo.”[#10:15 Kuhusu kuwa kama mtoto mdogo taz Mat 18:3; na rejea Marko 9:37 juu ya kuwapokea watoto wa namna hiyo.]

¹⁶Kisha akawapokea watoto hao, akawawekea mikono, akawabariki.

Mtu aliyekuwa tajiri

¹⁷Yesu alipoanza tena safari yake, mtu mmoja alimjia mbio, akapiga magoti mbele yake, akamwuliza, “Mwalimu mwema, nifanyeje niupate uhai wa milele?”

¹⁸Yesu akamjibu, “Mbona unaniita mwema? Hakuna aliye mwema ila Mungu peke yake.

¹⁹Unazijua amri: ‘Usizini, Usiue, Usiibe, Usitoe ushahidi wa uongo, Usidanganye, Waheshimu baba yako na mama yako.’”[#10:19 Taz Kut 20:12-16; Kumb 5:16-20. Ingawaje “usidaganye” haimo katika idadi ya amri kumi kama zijulikanavyo, inachukuliwa kuwa namna nyingine ya ile amri ya usiibe. Rejea Kumb 24:14; Yak 5:4.]

²⁰Naye akamjibu, “Mwalimu, hayo yote nimeyazingatia tangu ujana wangu.”

²¹Yesu akamtazama, akampenda, akamwambia, “Umepungukiwa na kitu kimoja: nenda ukauze kila kitu ulicho nacho, uwape maskini hizo fedha, nawe utakuwa na hazina mbinguni, kisha uje unifuate.”

²²Aliposikia hayo, alisikitika, akaenda zake akiwa na huzuni, kwa maana alikuwa na mali nyingi.

²³Yesu akatazama pande zote, akawaambia wanafunzi wake, “Jinsi gani itakavyokuwa vigumu kwa matajiri kuingia katika ufalme wa Mungu!”

²⁴Wanafunzi walishangazwa na maneno yake. Yesu akawaambia tena, “Watoto wangu, ni vigumu sana kuingia katika ufalme wa Mungu!

²⁵Ni rahisi zaidi ngamia kupenya katika tundu la sindano, kuliko tajiri kuingia katika ufalme wa Mungu.”[#10:25 Msemo wa methali ulio na maana ya jambo lisilowezekana (aya 27).]

²⁶Wanafunzi wake wakashangaa sana wakaulizana, “Ni nani basi, atakayeweza kuokoka?”

²⁷Yesu akawatazama, akawaambia, “Kwa binadamu haiwezekani, lakini kwa Mungu si hivyo, maana kwa Mungu mambo yote huwezekana.”

²⁸Petro akamwambia, “Na sisi je? Tumeacha yote, tukakufuata!”

²⁹Yesu akasema, “Kweli nawaambieni, kila mtu aliyeacha nyumba, au ndugu, au dada, au mama, au baba, au watoto au mashamba kwa ajili yangu na kwa ajili ya Habari Njema,

³⁰atapokea mara mia zaidi wakati huu wa sasa: nyumba, ndugu, dada, mama, watoto na mashamba pamoja na mateso; na katika wakati ujao atapokea uhai wa milele.[#10:30 Marko ndiye peke yake anayeongeza hapa “mateso” kama mojawapo ya tuzo watakazopata wafuasi waaminifu wa Yesu (taz Mat 19:29; Luka 18:30).]

³¹Lakini wengi walio wa kwanza watakuwa wa mwisho, na walio wa mwisho watakuwa wa kwanza.”

Yesu anasema mara ya tatu kuhusu kifo na ufufuo wake

³²Basi, walikuwa njiani kwenda juu Yerusalemu, na Yesu alikuwa anawatangulia. Wanafunzi wake walijawa na hofu, na watu waliofuata waliogopa. Yesu akawachukua tena kando wale kumi na wawili, akaanza kuwaambia yale yatakayompata:

³³“Sikilizeni! Tunakwenda Yerusalemu, na huko Mwana wa Mtu atakabidhiwa kwa makuhani wakuu na waalimu wa sheria, nao watamhukumu auawe na kumkabidhi kwa watu wa mataifa.[#10:33 Hapa kwa maana ya wakuu wa Waroma.]

³⁴Nao watamdhihaki; watamtemea mate, watampiga mijeledi na kumuua. Lakini baada ya siku tatu atafufuka.”

Ombi la Yakobo na Yohane

³⁵Yakobo na Yohane, wana wa Zebedayo, walimwendea Yesu wakamwambia, “Mwalimu, tunataka utufanyie kitu tutakachokuomba.”[#10:35 Taz 1:19,29; 3:17; 5:37; 9:2; 13:3; 14:33.]

³⁶Yesu akawauliza, “Mnataka niwafanyie nini?”

³⁷Wakamjibu, “Uturuhusu kuketi mmoja upande wako wa kulia na mwingine upande wako wa kushoto katika utukufu wako.”[#10:37 Wafuasi wa Yesu walitazamia kwamba Yesu angeanzisha utawala wa kidunia ambao ungekuwa na nyadhifa mbalimbali na heshima. Upande wa kulia … upande wa kushoto: nafasi za heshima na mamlaka (taz Zab 110:1).]

³⁸Yesu akawaambia, “Hamjui mnaomba nini! Je, mnaweza kunywa kikombe nitakachokunywa, au kubatizwa kama nitakavyobatizwa?”[#10:38 Taz Luka 12:50; Yoh 18:11. Msemo wa mfano wenye maana ya mateso na kifo cha Yesu (rejea 14:36; Yoh 18:11). Ubatizo hapa ni lugha ya mfano ikiwa na maana ya kifo (taz Luka 12:50).]

³⁹Wakamjibu, “Tunaweza.” Yesu akawaambia, “Kikombe nitakachokunywa mtakinywa kweli, na mtabatizwa kama nitakavyobatizwa.[#10:39 Taz Mat 20:23 maelezo. Yakobo mwanawe Zebedayo aliuawa na Herode Agripa mwaka 42 B.K. (Mate 12:2), na kulingana na mapokeo ya Kikristo naye Yohane aliuawa mwanzoni mwa karne ya pili katika utawala wa mfalme mkuu wa Roma Trayano.]

⁴⁰Lakini ni nani atakayeketi kulia au kushoto kwangu si wajibu wangu kupanga bali nafasi hizo watapewa wale waliotayarishiwa.”

⁴¹Wale wanafunzi wengine kumi waliposikia hayo, walianza kuchukizwa na Yakobo na Yohane.

⁴²Hivyo, Yesu akawaita, akawaambia, “Mnajua kwamba wale wanaofikiriwa kuwa watawala wa mataifa huwatawala watu wao kwa mabavu, na wakuu hao huwamiliki watu wao.

⁴³Lakini kwenu isiwe hivyo, ila anayetaka kuwa mkubwa kati yenu, sharti awe mtumishi wenu.

⁴⁴Anayetaka kuwa wa kwanza, sharti awe mtumishi wa wote.

⁴⁵Maana Mwana wa Mtu hakuja kutumikiwa, ila kutumikia, na kutoa maisha yake kuwa fidia ya watu wengi.”[#10:45 Rejea Isa 53:5-6,11-12; Yoh 10:11; 1Tim 2:5-6. Fidia: Mwanzoni neno “fidia” lilikuwa na maana ya kitu kilichotolewa au kilichotakiwa kutolewa ili kukomboa kitu fulani au hata mtu (taz kwa mfano Kut 21:8,30; Lawi 25:47-52; Hes 3:45-51) na baadaye neno hilo lilitumika kuhusu kukombolewa kwa watu wa Mungu na Yesu Kristo (k.m. Rom 3:23-25a; 1Tim 2:5-6; 1Pet 1:18-19). Kuhusu Yesu kutoa maisha yake kuwa fidia ya watu wengi taz Isa 52:13—53:12 sehemu ambayo inajulikana kama ya Mtumishi wa Bwana anayeteseka.]

Yesu anamponya kipofu Bartimayo

⁴⁶Basi, wakafika Yeriko, naye Yesu alipokuwa anatoka katika mji huo akiwa na wanafunzi wake pamoja na umati mkubwa wa watu, kipofu, mwana wa Timayo aitwaye Bartimayo, alikuwa ameketi kando ya barabara, anaomba maskini.[#10:46 Mji katika bonde la Mto Yordani yapata kilomita 10 magharibi mwa mto Yordani na kaskazini mwa Bahari ya Chumvi.]

⁴⁷Aliposikia kwamba ni Yesu wa Nazareti aliyekuwa anapita mahali hapo, alianza kupaza sauti, “Yesu, Mwana wa Daudi, nihurumie!”[#10:47 Maneno haya ni jina la sifa la Masiha; taz Mat 9:27 maelezo.]

⁴⁸Watu wengi walimkemea ili anyamaze, lakini yeye akazidi kupaza sauti, “Mwana wa Daudi, nihurumie!”

⁴⁹Yesu alisimama, akasema, “Mwiteni.” Basi, wakamwita huyo kipofu, wakamwambia, “Jipe moyo! Simama, anakuita.”

⁵⁰Naye akatupilia mbali vazi lake, akaruka juu, akamwendea Yesu.

⁵¹Yesu akamwuliza, “Unataka nikufanyie nini?” Huyo kipofu akamwambia, “Mwalimu, naomba nipate kuona.”

⁵²Yesu akamwambia, “Nenda, imani yako imekuponya.” Mara huyo kipofu akaweza kuona, akamfuata Yesu njiani.[#10:52 Au, Imani yako imekuokoa: Mat 9:22; Marko 5:34.]