Yesu anaingia Yerusalemu kwa shangwe

¹Walipokuwa wanakaribia Yerusalemu walifika Bethfage na Bethania, karibu na mlima wa Mizeituni. Hapo aliwatuma wawili wa wanafunzi wake,[#11:1 Mahali penyewe hasa si dhahiri. Bethania: Huo ulikuwa mji yapata kilomita 3 kusini-mashariki ya mji wa Yerusalemu (taz Yoh 11:18). Mlima wa Mizeituni: Huki kilikuwa kilima upande wa mashariki wa mji Yerusalemu na ambacho kimehusishwa kwanza na kutekwa kwa mji wa Yerusalemu (2Sam 15:13-30) na baadaye pia kikawa kama ishara ya matumaini ya ushindi wa Mungu nyakati za mwisho (Zek 14:4).]

²akawaambia, “Nendeni katika kijiji kilicho mbele yenu. Mtakapokuwa mnaingia humo, mtakuta mwanapunda amefungwa, ambaye bado hajatumiwa na mtu. Mfungueni mkamlete.[#11:2 Matumizi yake hapa huenda yalihusishwa na hali ya unyenyekevu ya mfalme (Zek 9:9; Mat 21:5; Yoh 12:15).]

³Kama mtu akiwauliza, ‘Mbona mnafanya hivyo?’ Mwambieni, ‘Bwana anamhitaji na atamrudisha hapa mara.’”[#11:3 Taz 5:19. Wengine wanatafsiri Bwana hapa kwa neno “Mwenyewe” yaani kwa maana ya mwenye punda huyo.]

⁴Basi, wakaenda, wakamkuta mwanapunda barabarani amefungwa mlangoni. Walipokuwa wakimfungua,

⁵baadhi ya watu waliokuwa wamesimama hapo wakawauliza, “Kwa nini mnamfungua huyo mwanapunda?”

⁶Wanafunzi wakajibu kama Yesu alivyokuwa amewaambia; nao wakawaacha waende zao.

⁷Wakampelekea Yesu huyo mwanapunda. Wakatandika mavazi yao juu ya huyo mwanapunda na Yesu akaketi juu yake.

⁸Watu wengi wakatandaza mavazi yao barabarani; wengine wakatandaza matawi ya miti waliyoyakata mashambani.[#11:8 Kutandaza mavazi barabarani wakati wa tukio hilo ilikuwa kitendo cha kumkaribisha Yesu (rejea 2Fal 9:13) na chakumbusha maandamano ya sikukuu za Waisraeli.]

⁹Watu wote waliotangulia na wale waliofuata, wakapaza sauti zao wakisema, “Sifa! Abarikiwe huyo ajaye kwa jina la Bwana![#11:9 Tafsiri ya neno la Kiebrania “Hosana” ambalo awali lilikuwa na maana ya ombi. “Okoa tafadhali”, lakini baadaye neno likatumika katika mazingira ya kushangilia ushindi na kuimba sifa (taz Zab 118:25-26).]

¹⁰Ubarikiwe ufalme ujao wa baba yetu Daudi. Sifa kwa Mungu juu mbinguni!”

¹¹Yesu aliingia mjini Yerusalemu akaenda moja kwa moja mpaka hekaluni, akatazama kila kitu kwa makini. Lakini kwa vile ilikwisha kuwa jioni, akaenda Bethania pamoja na wale kumi na wawili.[#11:11 Yahusu jengo mahsusi lililokuwa kitovu cha maisha ya kidini ya Wayahudi. Jengo lenyewe lilijengwa na Herode Mkuu ambaye aliishi yapata mwaka wa 37 K.K. mpaka mwaka wa 4 B.K. Baadaye, mnamo mwaka wa 70 B.K., jengo hilo liliteketezwa na Waroma (taz Luka 19:41-44).]

Yesu anaulaani mtini

¹²Kesho yake, walipokuwa wanatoka Bethania, Yesu aliona njaa.

¹³Basi, akaona kwa mbali mtini wenye majani mengi. Akauendea ili aone kama ulikuwa na tunda lolote. Alipoufikia, aliukuta bila tunda lolote ila tu majani matupu, kwa vile hayakuwa majira yake ya matunda.[#11:13 Kidogo msemo huu unatatanisha: (a) Kama haukuwa wakati wa matunda mbona Yesu anatafuta matunda humo? (b) Na kama si wakati wa matunda kwa nini upatilizwe? Huenda kitendo hicho cha mtini na matunda ni ishara ya kitu kingine: yahusu wakuu wa Wayahudi waliokataa kupokea mafundisho ya Yesu na hawana matunda, hali walitakiwa kuwa nayo kila wakati. Kwa hiyo wanahukumiwa adhabu. Katika A.K. taifa la Israeli lililinganishwa na mtini: Yer 8:13; Hos 9:10,16-17; na pia katika A.J. (Luka 13:6-9).]

¹⁴Hapo akauambia mtini, “Tangu leo hata milele mtu yeyote asile matunda kwako.” Nao wanafunzi wake walisikia maneno hayo.

Yesu anaingia hekaluni

¹⁵Basi, wakafika Yerusalemu. Yesu akaingia hekaluni akaanza kuwafukuza nje watu waliokuwa wanauza na kununua vitu humo. Akazipindua meza za wale waliokuwa wakibadilishana fedha, na viti vya wale waliokuwa wakiuza njiwa.

¹⁶Hakumruhusu mtu yeyote kupitia hekaluni akichukua kitu.

¹⁷Kisha akawafundisha, “Imeandikwa: ‘Nyumba yangu itaitwa nyumba ya sala kwa ajili ya mataifa yote!’ Lakini nyinyi mmeifanya kuwa pango la wanyang'anyi!”[#11:17 Isa 56:7.; #11:17 Yer 7:11.]

¹⁸Makuhani wakuu na waalimu wa sheria waliposikia hayo, walianza kutafuta njia ya kumwangamiza. Lakini walimwogopa kwa sababu umati wa watu ulishangazwa na mafundisho yake.

¹⁹Ilipokuwa jioni, Yesu na wanafunzi wake waliondoka mjini.

Fundisho juu ya mtini ulionyauka

²⁰Asubuhi na mapema, walipokuwa wanapita, waliuona ule mtini umenyauka wote, hata mizizi.

²¹Petro aliukumbuka, akamwambia Yesu, “Mwalimu, tazama! Ule mtini ulioulaani, umenyauka!”

²²Yesu akawaambia, “Mwaminini Mungu.

²³Nawaambieni kweli, mtu akiuambia mlima huu: ‘Ng'oka ukajitose baharini,’ bila kuona shaka moyoni mwake, ila akaamini kwamba mambo yote anayosema yanafanyika, atafanyiwa jambo hilo.[#11:23 Madhumuni ya maneno hayo ni kutilia mkazo kwamba, kwa imani, mambo yasiyowezekana huwezekana. Kuhusu maneno kama hayo juu ya imani, taz Mat 17:20; 1Kor 13:2.]

²⁴Kwa hiyo nawaambieni, mnaposali na kuomba kitu, aminini kwamba mmekipokea, nanyi mtapewa.

²⁵Mnaposimama kusali, msameheni kila mtu aliyewakosea chochote, ili Baba yenu aliye mbinguni awasamehe nyinyi makosa yenu.”[#11:25 Hati nyingine za kale zina aya 26. “Lakini msipowasamehe wengine hata Baba yenu aliye mbinguni hatawasamehe nyinyi makosa yenu” (taz Mat 6:14-15).]

Suala kuhusu mamlaka ya Yesu

²⁷Basi, wakafika tena Yerusalemu. Yesu alipokuwa akitembea hekaluni, makuhani wakuu, waalimu wa sheria na wazee walimwendea,[#11:27-28 Swali la waalimu wa sheria na makuhani juu ya mamlaka ya Yesu limetokana na mambo hayo aliyotenda Yesu kama inavyosimuliwa katika aya 1-26.]

²⁸wakamwuliza, “Unafanya mambo haya kwa mamlaka gani? Nani aliyekupa mamlaka ya kufanya mambo haya?”

²⁹Lakini Yesu akawaambia, “Nitawaulizeni swali moja; mkinijibu, nami pia nitawaambia ninafanya mambo haya kwa mamlaka gani.

³⁰Je, mamlaka ya Yohane ya kubatiza yalitoka mbinguni ama kwa watu? Nijibuni.”

³¹Wakaanza kujadiliana, “Tukisema, ‘Yalitoka mbinguni’, atatuuliza, ‘Basi, mbona hamkumsadiki?’

³²Na tukisema, ‘Yalitoka kwa watu…’” (Waliogopa umati wa watu maana wote waliamini kwamba Yohane alikuwa kweli nabii.)

³³Basi, wakamjibu Yesu, “Sisi hatujui.” Naye Yesu akawaambia, “Nami pia sitawaambieni ninafanya mambo haya kwa mamlaka gani.”