¹Afadhali maskini aishiye kwa unyofu,

kuliko mtu mpotovu wa maneno na mpumbavu.

²Haifai mtu kuwa bila akili;

mwenda harakaharaka hujikwaa.

³Mtu akijiangamiza kwa upumbavu wake,

huielekeza hasira yake dhidi ya Mwenyezi-Mungu.

⁴Mali huvuta marafiki wengi wapya,

lakini maskini huachwa bila rafiki.

⁵Shahidi mwongo hataacha kuadhibiwa;[#19:5 Methali inakataza utumiaji vibaya wa maneno, aghalabu kuacha kusema ukweli na kusema kinyume chake. Rejea pia Meth 6:19; 19:9; 12:17-18; 25:18. Amri ya Mungu pia imekataza kusema uongo (Kut 20:16).]

asemaye uongo hataepa adhabu.

⁶Watu wengi hujipendekeza kwa wakuu;

kila mtu hutaka kuwa rafiki ya mtu mkarimu.

⁷Maskini huchukiwa na ndugu zake;

marafiki zake ndio zaidi: humkimbia!

Hata awabembeleze namna gani hatawapata.

⁸Ajipatiaye hekima anaipenda nafsi yake;

anayezingatia busara atastawi.

⁹Shahidi mwongo hatakosa kuadhibiwa;

asemaye uongo ataangamia.

¹⁰Haifai kwa mpumbavu kuishi kwa anasa,[#19:10 Inawezekana madhumuni ya msemo huo ni kuonesha kwamba maisha ya jamii yanapaswa kulingana na mpango au utaratibu wa hekima uliowekwa na Mungu hivyo kwamba mpumbavu hana nafasi katika mpango huo (1:29-32). Tena mtumwa hakutakiwa kutawala wakuu isipokuwa kama huyo mkuu alikuwa mpumbavu au aliwatendea vibaya watu wake wakaasi.]

tena ni vibaya zaidi mtumwa kuwatawala wakuu.

¹¹Mwenye busara hakasiriki upesi;

kusamehe makosa ni fahari kwake.

¹²Ghadhabu ya mfalme ni kama ngurumo ya simba,

lakini wema wake ni kama umande juu ya majani.

¹³Mtoto mpumbavu ni balaa kwa baba yake;

na ugomvi wa mke ni kama matone ya mvua yasiyoisha.

¹⁴Nyumba na mali ni urithi apatao mtu kwa wazee wake,

lakini mke mwenye busara hutoka kwa Mwenyezi-Mungu.

¹⁵Uzembe ni kama usingizi mzito;

mtu mvivu atateseka kwa njaa.

¹⁶Anayeshika amri anasalimisha maisha yake;

anayepuuza agizo atakufa.

¹⁷Anayemsaidia maskini anamkopesha Mwenyezi-Mungu;[#19:17 Methali inatilia mkazo wajibu wa kumsaidia maskini (14:21,31; 17:5; 21:13; 22:9,16).]

Mwenyezi-Mungu atamlipa kwa tendo lake jema.

¹⁸Mrudi mwanao kungali bado na tumaini,

lakini usimwadhibu kiasi cha kumwangamiza.

¹⁹Mtu wa hasira kali lazima apate adhabu;

ukimwachia mara moja itakubidi kumwachia tena.

²⁰Sikiliza shauri na kupokea mafundisho,

upate hekima ya kukufaa siku zijazo.

²¹Kichwani mwa mtu mna mipango mingi,

lakini anachokusudia Mwenyezi-Mungu ndicho kitakachofanyika.

²²Kinachotakiwa kwa mtu ni uaminifu;

afadhali mtu maskini kuliko mtu mwongo.

²³Kumcha Mwenyezi-Mungu kunaleta uhai;[#19:23 Rejea 9:10 na 1:7 maelezo.]

amchaye hujaliwa pumziko la kutosheleza,

wala hatapatwa na baa lolote.

²⁴Mvivu ni kama mtu atiaye mkono katika sahani ya chakula,

lakini hana nguvu ya kuuinua hadi mdomoni.

²⁵Mwadhibu mwenye mzaha naye mjinga atapata akili;

mwonye mwenye busara naye atapata maarifa.

²⁶Anayemdhulumu baba yake na kumfukuza mama yake,[#19:26 Heshima kwa wazazi ni jambo linalotakiwa katika Biblia na tamaduni za mataifa mengi zinashikilia hivyo. Kuhusu amri ya kuwaheshimu wazazi taz Kut 20:12; Kumb 5:16.]

ni mtoto asiyefaa na mpotovu.

²⁷Mwanangu, ukiacha kusikiliza mafundisho,

utapotea mara mbali na maneno ya hekima.

²⁸Shahidi asiyefaa kitu huidhihaki haki;

na kinywa cha mwovu hubugia uovu.

²⁹Adhabu iko tayari kwa wenye mzaha,

mijeledi imetayarishwa kuchapa migongo ya wapumbavu.