Sala ya mtu mwema

¹Ee Mwenyezi-Mungu, unitetee,

maana nimeishi bila hatia,

nimekutumainia wewe bila kusita.

²Unijaribu, ee Mwenyezi-Mungu, na kunipima;

uchunguze moyo wangu na akili zangu.

³Fadhili zako ziko mbele ya macho yangu,[#26:3 Mtunzi wa Zaburi daima (mbele ya macho yangu) ana tumaini kubwa kuhusu wema wake Mungu.]

ninaishi kutokana na uaminifu wako.

⁴Sijumuiki na watu wapotovu;

sishirikiani na watu wanafiki.

⁵Nachukia mikutano ya wabaya;

wala sitajumuika na waovu.

⁶Nanawa mikono yangu kuonesha sina hatia,[#26:6 Katika ibada hekaluni, makuhani walipaswa kunawa mikono na miguu kabla ya kutoa tambiko (Kut 30:18-21).]

na kuizunguka madhabahu yako, ee Mwenyezi-Mungu,

⁷nikiimba wimbo wa shukrani,

na kusimulia matendo yako yote ya ajabu.

⁸Ee Mwenyezi-Mungu, napenda makao yako,

mahali unapokaa utukufu wako.

⁹Usiniangamize pamoja na wenye dhambi,

wala usinitupe pamoja na wauaji,

¹⁰watu ambao matendo yao ni maovu daima,

watu ambao wamejaa rushwa.

¹¹Lakini mimi ninaishi kwa unyofu;

unihurumie na kunikomboa.

¹²Mimi nimesimama mahali palipo imara;[#26:12 Lugha ya mfano kuashiria hali sahihi na imara mbele ya Mungu.]

nitamsifu Mwenyezi-Mungu katika kusanyiko kubwa.