Mungu na taifa lake teule

¹Nasema ukweli tupu; nimeungana na Kristo nami sisemi uongo. Dhamiri yangu ikiongozwa na Roho Mtakatifu inanithibitishia jambo hili pia.[#9:1 Taz 2:14-15 ambapo Paulo anaeleza “dhamira” kama sheria iliyoandikwa ndani ya moyo wa binadamu. Hapa Paulo anasema kwamba Roho Mtakatifu anatenda kama mwalimu wake akiongea na dhamiri yake na kuunda mawazo yake ya ndani.; #9:1—11:36 Katika sura hizi za 9-11 Paulo anazungumzia mada ya uhusiano wa taifa la Israeli na mpango wa Mungu wa wokovu. Paulo anafafanua kusitasita kwa Wayahudi kupokea Injili kama sehemu ya mpango mpana na kwamba jambo hilo linakuza si tu upendo na utawala mkuu wa Mungu. Kutokuamini kwao ni jambo la muda tu na hali hiyo itaongoza mwishowe katika wokovu wa watu wa mataifa na pia wa Wayahudi.]

²Nataka kusema hivi: nina huzuni kubwa na maumivu yasiyopimika moyoni mwangu

³kwa ajili ya ndugu zangu walio wa taifa langu! Kama ingekuwa kwa faida yao, ningekuwa radhi kulaaniwa na kutengwa na Kristo.[#9:3 Yaani Wayahudi. Paulo (jina lake la Kiyahudi lilikuwa Saulo) alikuwa Myahudi.]

⁴Hao ndio watu wa Israeli ambao Mungu aliwateua wawe watoto wake, akawashirikisha utukufu wake; alifanya nao maagano, akawapa sheria yake, imani ya kweli na ahadi zake.[#9:4 Paulo anajenga hoja yake juu ya Mungu alivyowatendea Waisraeli walipotoka Misri wakielekea Kanaani (taz Kut 19:4-6 n.k.). Agano la Mungu na Waisraeli lina sehemu mbili: agano na Abrahamu na wazawa wake (Mwa 12:1-3) na agano lake na Mose mlimani Sinai, agano ambalo lilielezwa katika sheria (Kut 19-20).]

⁵Wao ni wajukuu wa mababu, naye Kristo, kadiri ya ubinadamu wake, ametoka katika ukoo wao. Mungu atawalaye juu ya yote, na atukuzwe milele! Amina.

⁶Sisemi kwamba ahadi ya Mungu imebatilika; maana si watu wote wa Israeli ni wateule wa Mungu.

⁷Wala si wazawa wote wa Abrahamu ni watoto wake wa kweli. Ila, kama yasemavyo Maandiko Matakatifu: “Wazawa wake watatokana na Isaka.”

⁸Ndiyo kusema, si wale waliozaliwa kimaumbile ndio watoto wa Mungu, bali wale waliozaliwa kutokana na ahadi ya Mungu ndio watakaoitwa watoto wake.[#9:8 Yahusu wazawa wa Abrahamu kwa kupitia Ishmaeli ambaye alikuwa mtoto wake Abrahamu na Hagari (taz Gal 4:22-23).]

⁹Maana ahadi yenyewe ni hii: “Wakati maalumu nitarudi, naye Sara atapata mtoto.”

¹⁰Tena si hayo tu, ila pia Rebeka naye alipata mapacha kwa baba mmoja, yaani Isaka, babu yetu.[#9:10 Taz habari za Yakobo na Esau katika Mwa 25:19-34; 27:1-40.]

¹¹Lakini, ili Mungu aonekane kwamba anao uhuru wa kuchagua, hata kabla wale ndugu hawajazaliwa na kabla hawajaweza kupambanua jema na baya,

¹²Rebeka aliambiwa kwamba yule mtoto wa kwanza atamtumikia yule wa nyuma. Hivyo uchaguzi wa Mungu unategemea jinsi anavyoita mwenyewe, na si matendo ya binadamu.

¹³Kama Maandiko Matakatifu yasemavyo: “Yakobo nilimpenda, lakini Esau nilimchukia.”

¹⁴Basi, tuseme nini? Je, Mungu amekosa haki? Hata kidogo!

¹⁵Maana alimwambia Mose: “Nitamhurumia mtu yeyote ninayetaka kumhurumia; nitamwonea huruma mtu yeyote ninayetaka.”

¹⁶Kwa hiyo, yote hutegemea huruma ya Mungu, na si bidii au mapenzi ya mtu.

¹⁷Maana Maandiko Matakatifu yasema hivi kwa Farao: “Nilikufanya mfalme ili kwa njia yako, uwezo wangu ujulikane, na jina langu litangazwe popote duniani.”

¹⁸Ni wazi basi, kwamba Mungu humhurumia yeyote anayetaka kumhurumia, na akipenda kumfanya mtu awe mkaidi, hufanya hivyo.[#9:18-20 Hapa Paulo anataka kutilia mkazo kwamba Mungu anaweza kufanya apendavyo na kwamba kila kitu kiko chini ya mamlaka yake.]

Ghadhabu na huruma ya Mungu

¹⁹Labda utaniuliza: “Ikiwa mambo yako hivyo, Mungu anawezaje kumlaumu mtu? Nani awezaye kuyapinga mapenzi yake?”

²⁰Lakini, ewe binadamu, u nani hata uthubutu kumhoji Mungu? Je, chungu chaweza kumwuliza mfinyanzi wake: “Kwa nini umenitengeneza namna hii?”[#9:20 Vyungu, mabakuli n.k. vilikuwa vyombo vilivyofinyangwa, yaani watu walitumia namna ya udongo kuviunda. Katika shughuli ya kuviunda, mfinyanzi aliweza kurudia mara kwa mara kuunda chombo chake kama hakikutokea alivyotaka. Picha hiyo Paulo anaiona kuwa mwafaka kabisa kuelezea kazi ya Mungu kuhusu viumbe vyake (taz Isa 29:16; 45:9. Taz pia Yer 18:6; Hek 15:7; Sira 33:13).]

²¹Mfinyanzi anaweza kuutumia udongo apendavyo na kufinyanga vyungu viwili kwa udongo uleule; kimoja kwa matumizi ya heshima, na kingine kwa matumizi ya kawaida.

²²Hivyo ndivyo ilivyo kwa Mungu. Alitaka kuonesha ghadhabu yake na kujulisha uwezo wake. Basi, alikuwa na saburi sana, akiwavumilia wale ambao walikuwa lengo la ghadhabu yake, ambao walistahili kuangamizwa.

²³Alitaka pia kudhihirisha wingi wa utukufu wake ambao alitumiminia sisi tulio lengo la huruma yake; sisi ambao alikwisha kututayarisha kuupokea utukufu wake.[#9:23 Matumizi ya “utukufu” hapa huenda yanamaanisha kujionesha kwake Mungu pamoja na utukufu wake na kama Mungu mwenye huruma kwa watu wake.]

²⁴Maana sisi ndio hao aliowaita, si kutoka miongoni mwa Wayahudi tu bali pia kutoka kwa watu wa mataifa mengine.

²⁵Maana ndivyo asemavyo katika kitabu cha Hosea:

“Wale waliokuwa ‘Si watu wangu’

nitawaita: ‘Watu wangu!’

Naye ‘Sikupendi’

ataitwa: ‘Mpenzi wangu!’

²⁶Na pale walipoambiwa:

‘Nyinyi si wangu’

hapo wataitwa:

‘Watoto wa Mungu aliye hai.’”

²⁷Naye nabii Isaya, kuhusu Israeli anapaza sauti: “Hata kama wazawa wa Israeli ni wengi kama mchanga wa pwani, ni wachache tu watakaookolewa;[#9:27 Taz Isa 10:22-23 kadiri ya tafsiri ya Septuajinta. Na kuhusu “wachache” taz Rom 11:5 maelezo.]

²⁸maana, Bwana ataitekeleza upesi hukumu yake kamili juu ya ulimwengu wote.”

²⁹Ni kama Isaya alivyosema hapo awali: “Bwana wa majeshi asingalituachia baadhi ya watoto wa Israeli, tungalikwisha kuwa kama Sodoma, tungalikwisha kuwa kama Gomora.”[#9:29 Mungu aliteketeza kabisa miji hii kwa sababu ya dhambi za wakazi wake (taz Mwa 18:16—19:29).]

Israeli na Habari Njema

³⁰Basi tuseme nini? Watu wa mataifa ambao hawakutafuta wafanywe waadilifu, wamejaliwa kuwa waadilifu, kwa njia ya imani,

³¹hali watu wa Israeli ambao walitafuta sheria ya kuwafanya kuwa waadilifu, hawakuipata.

³²Kwa nini? Kwa sababu walitegemea matendo yao badala ya kutegemea imani. Walijikwaa juu ya jiwe la kujikwaa[#9:31-32 Hapa Paulo anasema juu ya Yesu Kristo. Taz pia Marko 12:10; 1Pet 2:6-8.]

³³kama yasemavyo Maandiko Matakatifu:

“Tazama, nitaweka huko Siyoni jiwe likwazalo,

mwamba utakaowafanya watu waanguke.

Lakini atakayemwamini hataaibishwa!”