¹Mfanyakazi mlevi hatakuwa tajiri.

Anayepuuza mambo madogo ataanguka kidogokidogo.

²Pombe na wanawake huwapotosha wanaume wenye akili;

mwanamume afanyaye urafiki na malaya ni mpotovu kabisa.

³Huyo mwisho wake ni kuoza na kuliwa na wadudu;

maisha yake ya uzembe yataondolewa.

⁴Anayewatumainia wengine haraka mno, hana akili.

Na atendaye dhambi, anajidhuru mwenyewe.

⁵Anayefurahia uovu, atahukumiwa.

Kupiga domo kaya

⁶Anayechukia domo kaya, anajiepusha na uovu.

⁷Usirudie kitu ulichoambiwa,

nawe hutapata madhara yoyote.

⁸Usimwambie mtu awe rafiki au adui,[#19:8 Tafsiri nyingine yamkini: “Usimwambie mtu kitu awe rafiki au adui”.]

isipokuwa tu kama ni dhambi kwako kunyamaza.

⁹Maana huenda fulani alikusikia na kukuona,

na wakati ukitimia, atakuchukia.

¹⁰Je, umewahi kusikia kitu? Na kife pamoja nawe.

Lakini usiogope! Hilo halitakupasua!

¹¹Mpumbavu anayejaribu kuficha neno lolote,

atasikia machungu kama mama anayejifungua.

¹²Kama vile mshale uliompenya mtu pajani

ndivyo ilivyo neno ndani yake mpumbavu.

¹³Ukisikia rafiki amefanya kosa, mwulize.

Huenda si kweli; na kama ni kweli, hatarudia.

¹⁴Mwulize jirani; labda hakusema.

Na kama alisema, hatasema tena.

¹⁵Mwulize rafiki uliyoyasikia, labda hakuyasema.

Kwa hiyo usiamini kila kitu unachosikia.

¹⁶Maana mtu aweza akakosea bila kukusudia.

Nani ambaye hajawahi kukosa kwa ulimi wake?

¹⁷Ukisikia kitu juu ya jirani; mwulize, usimtishe!

Ipe nafasi sheria ya Mungu Mkuu ifanye kazi.

Hekima ya kweli

²⁰Hekima yote ni kumcha Bwana;

na hekima yote yahusu kutii sheria.

²²Lakini kujua uovu si hekima,

mashauri ya wenye dhambi sio busara.

²³Uko ujanja ambao ni chukizo tupu.

Lakini yuko mpumbavu ambaye hana tu hekima.

²⁴Afadhali mtu mcha Mungu asiye na akili

kuliko mtu mwerevu sana ambaye anavunja sheria.

²⁵Kuna walio wajanja sana na hawatendi mambo ya haki;

wako na wengine wanaopotosha wema kupata haki zake.

²⁶Wako watu walaghai wanaojidai wana huzuni,

lakini ndani wamejaa udanganyifu mtupu.

²⁷Hao huficha nyuso zao na kujidai hawasikii;

lakini kama hawaonekani watakuangamiza.

²⁸Na kama hawana nguvu ya kutenda dhambi,

watakapopata nafasi, wataitenda tu.

²⁹Mtu hujulikana kwa namna anavyoonekana,

na mwenye busara utamtambua ukikutana naye.

³⁰Mtu alivyovaa, anavyocheka na kutembea,

vyote vinamwonesha jinsi alivyo.