Yerusalemu utakombolewa baadaye

¹Neno la Mwenyezi-Mungu kuhusu Israeli. Mwenyezi-Mungu aliyezitandaza mbingu, aliyeiweka misingi ya dunia na kumpa mwanadamu uhai asema hivi:[#12:1 Hapa Israeli si ufalme wa kaskazini ila yahusu watu wote wa Mungu (rejea 1 Nya 21:1; 2Nya 29:24), yaani watu wa Yuda na watu wa Israeli ambao walirudi kutoka uhamishoni.; #12:1—13:6 Kiini cha wazo la sehemu hii ya mwisho ya kitabu cha Zekaria ni juu ya siku ya Mwenyezi-Mungu (14:1). Katika siku hiyo wale wanaoushambulia Yerusalemu wataangamizwa (12:9) na wazawa wa Daudi watarekebishwa (12:10) na kuwekwa katika hali njema zaidi. Taz Amo 5:18-20 maelezo.]

²“Nitaufanya mji wa Yerusalemu kuwa kama kikombe cha divai; na mataifa yaliyo kandokando yake yatakunywa na kuyumbayumba kama walevi. Mji wa Yerusalemu utakaposhambuliwa, hata miji yote ya Yuda itashambuliwa.[#12:2 Hapa ni picha au mfano unaotumika mara kwa mara kuashiria hasira ya Mungu (Zab 75:8; Isa 51:17-23; Yer 25:15-29; Eze 23:31-34).]

³Siku hiyo nitaufanya mji wa Yerusalemu kuwa kama jiwe zito kwa watu wote: yeyote atakayelinyanyua atajiumiza mwenyewe. Watu wa mataifa yote duniani wataushambulia mji huo.

⁴Siku hiyo, nasema mimi Mwenyezi-Mungu, nitamtia hofu kila farasi, na mpandafarasi wake nitamfanya kuwa mwendawazimu. Farasi wa mataifa mengine nitawapofusha. Lakini kabila la Yuda nitalilinda.

⁵Ndipo viongozi wa Yuda watakapoambiana, ‘Wakazi wa Yerusalemu wamepata nguvu yao kwa Mwenyezi-Mungu wa majeshi, Mungu wao’.

⁶“Siku hiyo, viongozi wa Yuda nitawafanya kama chungu cha moto mkali katika msitu; naam, kama mwenge uwakao kati ya miganda. Watayateketeza mataifa yote yaliyo kandokando yao. Lakini watu wa Yerusalemu wataendelea kuishi salama katika mji wao.

⁷“Nami Mwenyezi-Mungu nitawasaidia kwanza jamaa za Yuda kusudi wazawa wa Daudi na wakazi wa Yerusalemu wasijione kuwa maarufu zaidi ya watu wengine wa kabila la Yuda.

⁸Siku hiyo, mimi Mwenyezi-Mungu nitawalinda wakazi wa mji wa Yerusalemu; walio wanyonge zaidi miongoni mwao watakuwa na nguvu kama mfalme Daudi. Wazawa wa Daudi watashika usukani kuwaongoza watu wa Yuda kama malaika wangu mimi Mwenyezi-Mungu, naam, kama mimi Mungu mwenyewe.

⁹“Siku hiyo, nitayaangamiza mataifa yote yanayotaka kuushambulia mji wa Yerusalemu.

¹⁰Wazawa wa Daudi na wakazi wa mji wa Yerusalemu nitawajaza roho ya huruma na maombi, nao watamtazama yeye waliyemtoboa; watamlilia kama mtu amliliavyo mtoto wake wa pekee, au kama mtu amliliavyo kwa uchungu mzaliwa wake wa kwanza.[#12:10 Yahusu mtawala fulani au nabii fulani ambaye hao watu walimuua; lakini hatuna habari nyingine zinazotuwezesha kumtambulisha kwa uhakika. Baadhi wanamhusisha hapa yule mchungaji wa 11:7-14, wengine wanafikiri huyu ni sawa na yule “mtumishi wa Mwenyezi-Mungu” katika Isa 52:13-53:12; rejea pia Zek 13:3. A.J. linakariri maneno hayo katika Yoh 19:37 na Ufu 1:7 kumhusu Yesu Kristo, mahali ambapo tunapewa ufafanuzi wa “Masiha” mteule wa Mungu.]

¹¹Siku hiyo kutakuwa na maombolezo makuu mjini Yerusalemu kama maombolezo ya kumwombolezea Hadad-rimoni katika mbuga za Megido.[#12:11 mungu wa rutuba wa Wafoinike (2Fal 5:18). Kwa heshima yake watu waliomboleza rasmi katika bonde la Megido (rejea Eze 8:14 ambapo jina la mungu ambaye walimwombolezea ni “Tamuzi”).; #12:11 Megido ni mahali ambapo vita vikubwa vikubwa vilifanyika (Amu 5:19; 2Fal 23:29-30). Taz pia Ufu 16:16 maelezo.]

¹²Nchi itaomboleza, kila ukoo utaomboleza peke yake, wanaume peke yao na wanawake peke yao; ukoo wa Daudi peke yake; ukoo wa Nathani peke yake;

¹³ukoo wa Lawi peke yake na ukoo wa Shimei peke yake.

¹⁴Jamaa zote zilizosalia zitaomboleza; wanaume peke yao na wanawake peke yao.