Israeli kuangamizwa

¹Nilimwona Bwana akiwa amesimama kando ya madhabahu, naye akasema:

“Piga vichwa vya nguzo

ili vizingiti vitikisike.

Viangushe juu ya vichwa vya watu wote;

na wale watakaosalia nitawaua kwa upanga.

Hakuna yeyote atakayekimbia,

hakuna atakayetoroka.

²Wajapojichimbia chini hadi kwenye vina vya Kuzimu,[#9:2 Kuzimu kwa Kiebrania ni Sheol , yaani Shimo lisilo na mwisho.]

kutoka huko mkono wangu utawatoa.

Wajapopanda juu hadi kwenye mbingu,

kutoka huko nitawashusha.

³Wajapojificha juu ya kilele cha Karmeli,

huko nitawawinda na kuwakamata.

Wajapojificha uso wangu

katika vilindi vya bahari,

huko nako nitaamuru joka kuwauma.

⁴Wajapopelekwa uhamishoni na adui zao,

huko nako nitaamuru upanga uwaue.

Nitawakazia macho yangu kwa mabaya

wala si kwa mazuri.”

⁵Bwana, Bwana wa majeshi,

yeye agusaye dunia nayo ikayeyuka,

na wote wanaoishi ndani yake wakaomboleza:

nayo nchi yote huinuka kama Mto Naili,

kisha hushuka kama mto wa Misri;

⁶yeye ambaye hujenga jumba lake la kifalme katika mbingu

na kuisimika misingi yake juu ya dunia,

yeye aitaye maji ya bahari

na kuyamwaga juu ya nchi:

Bwana ndilo jina lake.

⁷“Je, Waisraeli,

ninyi si sawa kwangu kama Wakushi?”

asema Bwana .

“Je, sikuleta Israeli kutoka Misri,

Wafilisti kutoka Kaftori,

na Washamu kutoka Kiri?

⁸“Hakika macho ya Bwana Mwenyezi

yako juu ya ufalme wenye dhambi.

Nami nitauangamiza

kutoka uso wa dunia:

hata hivyo sitaiangamiza kabisa

nyumba ya Yakobo,”

asema Bwana .

⁹“Kwa kuwa nitatoa amri,

na nitaipepeta nyumba ya Israeli

miongoni mwa mataifa yote,

kama vile nafaka ipepetwavyo katika ungo,

na hakuna hata punje moja itakayoanguka chini.

¹⁰Watenda dhambi wote miongoni mwa watu wangu

watauawa kwa upanga,

wale wote wasemao,

‘Maafa hayatatupata wala kutukuta.’

Kurejeshwa kwa Israeli

¹¹“Katika siku ile

“Nitalisimamisha hema la Daudi lililoanguka.

Nitakarabati mahali palipobomoka

na kujenga upya magofu yake,

na kuijenga kama ilivyokuwa awali,

¹²ili wapate kuyamiliki mabaki ya Edomu,

na mataifa yote yale yanayobeba Jina langu,”

asema Bwana ambaye atafanya mambo haya.

¹³“Siku zinakuja,” asema Bwana ,

“wakati mvunaji atatanguliwa na mkulima,

naye mpanzi atatanguliwa na yeye akamuaye zabibu.

Divai mpya itadondoka kutoka milimani,

na kutiririka kutoka vilima vyote.

¹⁴Nitawarejesha tena watu wangu Israeli waliohamishwa;

wataijenga tena miji iliyoachwa magofu,

nao wataishi ndani yake.

Watapanda mizabibu na kunywa divai yake;

watalima bustani na kula matunda yake.

¹⁵Nitaipanda Israeli katika nchi yao wenyewe,

hawatangʼolewa tena

kutoka nchi niliyowapa,”

asema Bwana Mungu wenu.