Ole wa wale wanaotegemea Misri

¹Ole wao wale wanaoshuka Misri kutafuta msaada,

wale wanaotegemea farasi,

wanaoweka tumaini katika wingi wa magari yao ya vita,

na katika nguvu nyingi za wapanda farasi,

lakini hawamwangalii yeye Aliye Mtakatifu wa Israeli,

wala hawatafuti msaada kwa Bwana .

²Hata hivyo yeye pia ana hekima na anaweza kuleta maafa,

wala hayatangui maneno yake.

Yeye atainuka dhidi ya nyumba ya mwovu,

dhidi ya wale ambao huwasaidia watenda maovu.

³Lakini Wamisri ni wanadamu, wala si Mungu,

farasi wao ni nyama, wala si roho.

Bwana atakaponyoosha Mkono wake,

yeye anayesaidia atajikwaa,

naye anayesaidiwa ataanguka,

wote wawili wataangamia pamoja.

⁴Hili ndilo Bwana analoniambia:

“Kama vile simba angurumavyo,

simba mkubwa juu ya mawindo yake:

hata ingawa kundi lote la wafugaji

huitwa pamoja dhidi yake,

hatiwi hofu na kelele zao,

wala kusumbuliwa na ghasia zao;

ndivyo Bwana wa majeshi atakavyoshuka

kufanya vita juu ya Mlima Sayuni

na juu ya vilele vyake.

⁵Kama ndege warukao,

Bwana wa majeshi ataukinga Yerusalemu;

ataukinga na kuuokoa,

atapita juu yake na kuufanya salama.”

⁶Mrudieni yeye ambaye nyumba ya Israeli imemwasi sana.

⁷Kwa kuwa katika siku ile kila mmoja wenu atazikataa sanamu za fedha na za dhahabu zilizotengenezwa kwa mikono yenu yenye dhambi.

⁸“Ashuru itaanguka kwa upanga ambao si wa mwanadamu;

upanga usio wa kibinadamu utawaangamiza.

Watakimbia mbele ya upanga

na vijana wao wa kiume watafanyizwa kazi kwa lazima.

⁹Ngome zao zitaanguka kwa sababu ya hofu;

kwa kuona bendera ya vita,

majemadari wao watashikwa na hofu ya ghafula,”

asema Bwana ,

ambaye moto wake uko Sayuni,

nalo tanuru lake liko Yerusalemu.