Mariamu ampaka Yesu mafuta huko Bethania

¹Siku sita kabla ya Pasaka, Yesu alienda Bethania, makao ya Lazaro, aliyekuwa amemfufua kutoka kwa wafu.

²Wakaandaa karamu kwa heshima ya Yesu. Martha akawahudumia, wakati Lazaro alikuwa miongoni mwa waliokaa mezani pamoja na Yesu.

³Kisha Mariamu akachukua chupa ya painti moja yenye manukato ya nardo safi ya thamani kubwa, akayamimina miguuni mwa Yesu na kuifuta kwa nywele zake. Nyumba nzima ikajaa harufu nzuri ya manukato.[#12:3 painti moja ni kama nusu lita; #12:3 aina ya mafuta yaliyokuwa yanatengenezwa kutokana na mimea yenye mizizi inayotoa harufu nzuri]

⁴Ndipo Yuda Iskariote mwana wa Simoni, mmoja wa wanafunzi wa Yesu, ambaye baadaye angemsaliti Yesu, akasema,

⁵“Kwa nini manukato haya hayakuuzwa kwa dinari mia tatu, na fedha hizo wakapewa maskini?”[#12:5 Dinari 300 ni sawa na mshahara wa kibarua wa siku 300.]

⁶Yuda hakusema hivi kwa kuwa aliwajali maskini, bali kwa kuwa alikuwa mwizi; ndiye alikuwa akitunza mfuko wa fedha, na akawa akiiba zile fedha.

⁷Yesu akasema, “Mwacheni. Aliyanunua manukato hayo ili ayaweke kwa ajili ya siku ya maziko yangu.

⁸Maskini mtakuwa nao siku zote, lakini mimi hamtakuwa nami siku zote.”

Njama ya kumuua Lazaro

⁹Umati mkubwa wa Wayahudi walipojua kwamba Yesu alikuwa huko Bethania, walikuja si tu kwa ajili ya Yesu, lakini pia kumwona Lazaro ambaye Yesu alikuwa amemfufua.

¹⁰Kwa hiyo viongozi wa makuhani wakapanga njama ya kumuua Lazaro pia,

¹¹kwa kuwa kutokana na habari za kufufuliwa kwake, Wayahudi wengi walikuwa wanamfuata Yesu na kumwamini.

Yesu aingia Yerusalemu kwa shangwe

¹²Siku iliyofuata umati mkubwa wa watu waliokuwa wamekuja kwenye Sikukuu walisikia kwamba Yesu angekuja Yerusalemu.

¹³Basi wakachukua matawi ya mitende, wakatoka kwenda kumlaki, huku wakipaza sauti wakisema,

“Hosana!”

“Amebarikiwa yeye ajaye kwa Jina la Bwana!”

“Amebarikiwa mfalme wa Israeli!”

¹⁴Yesu akamkuta mwana-punda, akampanda, kama ilivyoandikwa,

¹⁵“Usiogope, ewe Binti Sayuni;

tazama, mfalme wako anakuja,

amepanda mwana-punda!”

¹⁶Wanafunzi wake Yesu mwanzoni hawakuelewa mambo haya. Lakini Yesu alipotukuzwa, ndipo walipokumbuka kuwa mambo haya yalikuwa yameandikwa kwa ajili yake na alitendewa yeye.

¹⁷Wale waliokuwepo Yesu alipomwita Lazaro kutoka kaburini na kumfufua kutoka kwa wafu waliendelea kushuhudia.

¹⁸Na kwa sababu walikuwa wamesikia kwamba alikuwa ametenda muujiza huu, umati wa watu wakaenda kumlaki.

¹⁹Hivyo Mafarisayo walipoona hayo, wakaambiana, “Mnaona, hamwezi kufanya lolote. Angalieni, ulimwengu wote unamfuata yeye!”

Yesu atabiri kifo chake

²⁰Basi palikuwa Wayunani fulani miongoni mwa wale waliokuwa wameenda kuabudu wakati wa Sikukuu.

²¹Hawa wakaenda kwa Filipo, aliyekuwa raia wa Bethsaida huko Galilaya, wakiwa na ombi. Wakamwambia, “Tungependa kumwona Yesu.”

²²Filipo akaenda akamweleza Andrea, nao wote wawili wakamwambia Yesu.

²³Yesu akawajibu, “Saa imewadia ya Mwana wa Adamu kutukuzwa.

²⁴Amin, amin nawaambia, mbegu ya ngano isipoanguka ardhini na kufa, hubakia kama mbegu peke yake. Lakini ikifa, huzaa mbegu nyingi.

²⁵Mtu yeyote anayependa maisha yake atayapoteza, naye ayachukiaye maisha yake katika ulimwengu huu atayaokoa hata kwa uzima wa milele.

²⁶Mtu yeyote akinitumikia lazima anifuate, nami mahali nilipo ndipo mtumishi wangu atakapokuwa. Mtu akinitumikia, Baba yangu atamheshimu.

²⁷“Sasa roho yangu imefadhaika sana. Niseme nini? ‘Baba, niokoe katika saa hii’? Lakini ni kwa kusudi hili nimeufikia wakati huu.

²⁸Baba, litukuze jina lako.”

Ndipo ikaja sauti kutoka mbinguni, ikasema, “Nimelitukuza, nami nitalitukuza tena.”

²⁹Umati ule wa watu waliokuwa mahali pale waliisikia ile sauti, nao wakasema hiyo ilikuwa sauti ya radi; wengine wakasema malaika ameongea naye.

³⁰Yesu akawaambia, “Sauti hii imesikika kwa faida yenu, wala si kwa faida yangu.

³¹Sasa ni saa ya hukumu kwa ajili ya ulimwengu huu, sasa mkuu wa ulimwengu huu atatupwa nje.

³²Lakini mimi, nikiinuliwa kutoka nchi, nitawavuta watu wote waje kwangu.”

³³Yesu aliyasema haya akionesha ni kifo gani atakachokufa.

³⁴Umati ule wa watu wakapaza sauti, wakasema, “Tumesikia kutoka Sheria kwamba Kristo adumu milele; hivyo wewe wawezaje kusema, ‘Mwana wa Adamu hana budi kuinuliwa juu’? Huyu ‘Mwana wa Adamu’ ni nani?”[#12:34 maana yake Masiya , yaani Aliyetiwa mafuta.]

³⁵Ndipo Yesu akawaambia, “Bado kitambo kidogo nuru ingali pamoja nanyi. Nendeni maadamu mna nuru, msije mkakumbwa na giza. Mtu anayetembea gizani hajui anakoenda.

³⁶Wekeni tumaini lenu katika nuru hiyo ili mpate kuwa wana wa nuru.” Baada ya kusema haya, Yesu aliondoka, akajificha wasimwone.

Wayahudi waendelea kutokuamini

³⁷Hata baada ya Yesu kufanya miujiza hii yote mbele yao, bado hawakumwamini.

³⁸Hili lilikuwa ili kutimiza lile neno la nabii Isaya lililosema:

“Bwana, ni nani aliyeamini ujumbe wetu,

na mkono wa Bwana umefunuliwa kwa nani?”

³⁹Kwa hivyo hawakuamini, kwa sababu Isaya anasema mahali pengine:

⁴⁰“Amewafanya vipofu,

na kuifanya mioyo yao kuwa migumu,

ili wasiweze kuona kwa macho yao,

wala kuelewa kwa mioyo yao,

wasije wakageuka nami nikawaponya.”

⁴¹Isaya alisema haya alipoona utukufu wa Yesu na kunena habari zake.

⁴²Lakini wengi miongoni mwa viongozi wa Wayahudi walimwamini, lakini kwa sababu ya Mafarisayo hawakukiri waziwazi kwa maana waliogopa kufukuzwa katika masinagogi.

⁴³Wao walipenda sifa za wanadamu kuliko sifa zinazotoka kwa Mungu.

Amwaminiye Yesu hatabaki gizani

⁴⁴Yesu akapaza sauti akasema, “Yeyote aniaminiye, haniamini mimi peke yangu, bali pia yeye aliyenituma.

⁴⁵Yeyote anionaye mimi amemwona yeye aliyenituma.

⁴⁶Mimi nimekuja kama nuru ulimwenguni, ili kila mtu aniaminiye asibaki gizani.

⁴⁷“Mimi simhukumu mtu yeyote anayesikia maneno yangu na asiyatii, kwa maana sikuja kuuhukumu ulimwengu, bali kuuokoa.

⁴⁸Yuko anayehukumu yule anayenikataa mimi na kuyakataa maneno yangu; yale maneno niliyoyasema yenyewe yatamhukumu siku ya mwisho.

⁴⁹Kwa maana sisemi kwa ajili yangu mwenyewe, bali Baba aliyenituma aliniamuru ni nini cha kusema na jinsi ya kukisema.

⁵⁰Nami ninajua amri zake huongoza hadi kwenye uzima wa milele. Hivyo lolote nisemalo, ndilo lile Baba aliloniambia niseme.”