Yesu azungumza na mwanamke Msamaria

¹Yesu alipata habari kuwa Mafarisayo walisikia kwamba yeye alikuwa akipata wanafunzi kuliko Yohana na kuwabatiza,

²ingawa kwa kweli si Yesu mwenyewe aliyekuwa akibatiza, ila ni wanafunzi wake.

³Bwana alipojua mambo haya, aliondoka Yudea akarudi tena Galilaya.

⁴Wakati huo ilimlazimu apitie Samaria.

⁵Akafika kwenye mji mmoja wa Samaria uitwao Sikari, karibu na lile shamba ambalo Yakobo alimpa mwanawe Yusufu.

⁶Kisima cha Yakobo kilikuwa huko. Naye Yesu alikuwa amechoka kwa kuwa alikuwa ametoka safarini. Akaketi karibu na hicho kisima. Ilikuwa yapata saa sita mchana.

⁷Mwanamke mmoja Msamaria alipokuja kuteka maji, Yesu akamwambia, “Naomba maji ninywe.”

⁸(Wakati huo wanafunzi wake walikuwa wameenda mjini kununua chakula.)

⁹Yule mwanamke Msamaria akamjibu, “Wewe ni Myahudi na mimi ni Msamaria. Yawezekanaje uniombe maji ya kunywa?” (Wayahudi walikuwa hawashirikiani kabisa na Wasamaria.)

¹⁰Yesu akamjibu, “Kama ungeijua karama ya Mungu, na ni nani anakuomba maji ya kunywa, ungemwomba yeye, naye angekupa maji ya uzima.”

¹¹Yule mwanamke akamjibu, “Bwana, wewe huna chombo cha kutekea maji na kisima hiki ni kirefu. Hayo maji ya uzima utayapata wapi?

¹²Kwani wewe ni mkuu kuliko baba yetu Yakobo ambaye alitupatia kisima hiki, ambacho yeye pamoja na watoto wake na mifugo yake walikitumia?”

¹³Yesu akamjibu, “Kila mtu anayekunywa maji ya kisima hiki ataona kiu tena.

¹⁴Lakini yeyote anywaye maji nitakayompa hataona kiu kamwe. Maji nitakayompa yatakuwa ndani yake chemchemi ya maji, yakibubujika uzima wa milele.”

¹⁵Yule mwanamke akamwambia, “Bwana, tafadhali nipe maji hayo ili nisipate kiu tena, wala nisije tena hapa kuteka maji!”

¹⁶Yesu akamjibu, “Nenda ukamwite mumeo, uje naye hapa.”

¹⁷Yule mwanamke akajibu, “Sina mume.”

Yesu akamwambia, “Umesema kweli kuwa huna mume.

¹⁸Kwa maana umeshakuwa na wanaume watano, na mwanaume unayeishi naye sasa si mume wako! Umesema ukweli.”

¹⁹Yule mwanamke akasema, “Bwana, naona bila shaka wewe ni nabii.

²⁰Baba zetu waliabudu kwenye mlima huu, lakini ninyi Wayahudi mnasema ni lazima tukaabudu huko Yerusalemu.”

²¹Yesu akamjibu, “Mwanamke, niamini: wakati unakuja ambapo hamtamwabudu Baba katika mlima huu, wala huko Yerusalemu.

²²Ninyi Wasamaria mnaabudu msichokijua. Sisi Wayahudi tunamwabudu Mungu tunayemjua kwa sababu wokovu unatoka kwa Wayahudi.

²³Lakini saa yaja, tena ipo, ambapo wale waabuduo halisi watamwabudu Baba katika roho na kweli. Kwa maana Baba anawatafuta watu wanaomwabudu kwa namna hii.

²⁴Mungu ni Roho, na wote wanaomwabudu imewapasa kumwabudu katika roho na kweli.”

²⁵Yule mwanamke akamwambia, “Ninafahamu kwamba Masiya” (aitwaye Kristo) “anakuja. Yeye akija, atatueleza mambo yote.”

²⁶Yesu akamwambia, “Mimi ninayezungumza nawe, ndiye.”

²⁷Wakati huo wanafunzi wake wakarudi, wakashangaa sana kumwona akizungumza na mwanamke. Lakini hakuna aliyemuuliza, “Unataka nini kwake?” Au, “Kwa nini unazungumza naye?”

²⁸Yule mwanamke akaacha mtungi wake, akarudi mjini, akawaambia watu,

²⁹“Njooni mkamwone mtu aliyeniambia kila kitu nilichotenda! Je, yawezekana huyu ndiye Kristo?”[#4:29 maana yake Masiya , yaani Aliyetiwa mafuta.]

³⁰Basi wakamiminika watu kutoka mjini, wakamwendea Yesu.

³¹Wakati huo wanafunzi wake walikuwa wakimsihi, “Rabi, kula.”

³²Lakini yeye akawajibu, “Mimi ninacho chakula ambacho ninyi hamkifahamu.”

³³Basi wanafunzi wakaanza kuulizana, “Kuna mtu ambaye amemletea chakula?”

³⁴Lakini Yesu akawajibu, “Chakula changu ni kufanya mapenzi ya Mungu ambaye amenituma na kuikamilisha kazi yake.

³⁵Je, ninyi hamsemi, ‘Bado miezi minne tuvune’? Inueni macho yenu myaangalie mashamba jinsi mazao yalivyo tayari kuvunwa!

³⁶Mvunaji tayari anapokea mshahara wake, naye anakusanya mazao kwa ajili ya uzima wa milele, ili yeye apandaye na yeye avunaye wafurahi pamoja.

³⁷Hivyo ule msemo, ‘Mmoja hupanda na mwingine huvuna,’ ni kweli kabisa.

³⁸Niliwatuma mkavune mazao ambayo hamkupanda. Wengine walifanya kazi ngumu, nanyi mmevuna faida ya taabu yao.”

Wasamaria wengi waamini

³⁹Wasamaria wengi katika mji ule wakamwamini Yesu kwa sababu ya ushuhuda wa yule mwanamke alipowaambia kwamba, “Ameniambia kila kitu nilichotenda.”

⁴⁰Hivyo wale Wasamaria walipomjia, wakamsihi akae kwao. Naye akakaa huko siku mbili.

⁴¹Kwa sababu ya neno lake, watu wengi wakaamini.

⁴²Wakamwambia yule mwanamke, “Sasa tunaamini, wala si kwa sababu ya maneno yako tu, bali kwa kuwa tumemsikia sisi wenyewe. Tumejua hakika kwamba huyu ndiye Kristo, Mwokozi wa ulimwengu.”

Yesu amponya mwana wa afisa

⁴³Baada ya zile siku mbili, Yesu aliondoka kwenda Galilaya.

⁴⁴(Basi Yesu mwenyewe alikuwa amesema kwamba nabii hapati heshima katika nchi yake mwenyewe.)

⁴⁵Alipofika Galilaya, Wagalilaya walimkaribisha, kwani walikuwa wameona yale aliyoyatenda huko Yerusalemu wakati wa Sikukuu ya Pasaka. Kwa maana wao pia walikuwa wamehudhuria hiyo Sikukuu.

⁴⁶Hivyo Yesu akafika tena Kana ya Galilaya, kule alikuwa amebadili maji kuwa divai. Kulikuwa na afisa mmoja wa mfalme, ambaye mwanawe alikuwa mgonjwa huko Kapernaumu.

⁴⁷Huyo mtu aliposikia kwamba Yesu alikuwa amewasili Galilaya kutoka Yudea, alimwendea na kumsihi aende akamponye mwanawe, aliyekuwa mgonjwa karibu ya kufa.

⁴⁸Yesu akamwambia, “Ninyi watu msipoona ishara na miujiza kamwe hamtaamini.”

⁴⁹Yule afisa wa mfalme akamwambia, “Bwana, tafadhali shuka kabla mwanangu hajafa.”

⁵⁰Yesu akamjibu, “Nenda zako, mwanao yu hai.”

Yule afisa akaamini yale maneno Yesu aliyomwambia, akaenda zake.

⁵¹Alipokuwa bado yuko njiani, akakutana na watumishi wake, wakamwambia kwamba mwanawe yu mzima.

⁵²Akawauliza saa ambayo alianza kupata nafuu. Wakamwambia, “Jana saa saba, ndipo homa iliisha.”

⁵³Ndipo baba wa huyo mtoto akakumbuka kuwa huo ndio wakati Yesu alikuwa amemwambia, “Mwanao yu hai.” Kwa hiyo yeye na wote wa nyumbani mwake wakamwamini Yesu.

⁵⁴Hii ilikuwa ishara ya pili ambayo Yesu alifanya aliporudi Galilaya kutoka Yudea.