Mapumziko: Hekima inakopatikana

¹Kuna machimbo ya fedha,

na mahali dhahabu inaposafishwa.

²Chuma hupatikana ardhini,

nayo shaba huyeyushwa kutoka mawe ya madini.

³Mwanadamu hukomesha giza;

huyatafuta hadi sehemu iliyo mbali,

kwa ajili ya kuchimbua mawe yenye madini

katika giza jeusi sana.

⁴Huchimba shimo jembamba mbali na makao ya watu,

mahali paliposahaulika na nyayo za wanadamu;

mbali na wanadamu huningʼinia na kubembea.

⁵Ardhi, ambako chakula hutoka,

chini hugeuzwa kwa moto;

⁶yakuti samawi hutoka katika miamba yake,

nalo vumbi lake lina vipande vya dhahabu.

⁷Hakuna ndege awindaye aijuaye njia ile iliyofichika,

wala hakuna jicho la mwewe lililoiona.

⁸Wanyama wa porini wanaotamba hawajawahi kupakanyaga,

wala simba azungukaye huko.

⁹Mikono ya mwanadamu hushambulia miamba ya gumegume,

na kuiacha wazi mizizi ya milima.

¹⁰Hutoboa shimo refu la kupenya chini kwa chini kwenye miamba;

macho yake huona hazina zake zote.

¹¹Hutafuta vyanzo vya mito

na kuvileta vitu vilivyofichika katika nuru.

¹²Lakini hekima inaweza kupatikana wapi?

Ufahamu unakaa wapi?

¹³Mwanadamu hatambui thamani yake;

haiwezi kupatikana katika nchi ya walio hai.

¹⁴Kilindi husema, “Haiko ndani yangu”;

bahari nayo husema, “Haiko pamoja nami.”

¹⁵Haiwezi kununuliwa kwa dhahabu safi kuliko zote,

wala thamani yake haiwezi kupimwa kwa fedha.

¹⁶Haiwezi kununuliwa kwa dhahabu ya Ofiri,

kwa shohamu ya thamani kubwa au yakuti samawi ya thamani kubwa.

¹⁷Dhahabu wala mawe maangavu haviwezi kulinganishwa nayo,

wala haiwezi hubadilishwa kwa vito vya dhahabu.

¹⁸Marijani na yaspi hazistahili kutajwa;

thamani ya hekima ni zaidi ya akiki nyekundu.

¹⁹Yakuti manjano ipatikanayo Kushi haiwezi kulinganishwa nayo,

wala haiwezi kununuliwa kwa dhahabu safi.

²⁰Ni wapi basi hekima itokako?

Ufahamu hukaa wapi?

²¹Imefichika machoni pa kila kitu kilicho hai,

imesitiriwa hata kwa ndege wa angani.

²²Uharibifu na Mauti husema,

“Ni uvumi wake tu uliotufikia masikioni mwetu.”

²³Mungu anaifahamu njia ya kuiendea hekima

na ndiye peke yake anayefahamu inakokaa,

²⁴kwa maana yeye huitazama miisho ya dunia

na huona kila kitu chini ya mbingu.

²⁵Alipoufanyia upepo nguvu zake

na kuyapima maji,

²⁶alipofanya maagizo kwa ajili ya mvua

na njia ya mwali wa radi,

²⁷ndipo alipoitazama hekima na kuikadiria thamani yake,

akaithibitisha na kuihakikisha.

²⁸Naye Mungu akamwambia mwanadamu,

“Kumcha Bwana: hiyo ndiyo hekima,

nako kujitenga na uovu ndio ufahamu.”