Yesu alisha wanaume 4,000

¹Katika siku hizo, umati mkubwa wa watu walikusanyika tena. Kwa kuwa walikuwa hawana chakula, Yesu akawaita wanafunzi wake akawaambia,

²“Ninahurumia umati huu wa watu, kwa sababu sasa wamekuwa nami kwa muda wa siku tatu na hawana chakula.

³Nikiwaaga waende nyumbani bila kula, watazimia njiani kwa sababu baadhi yao wametoka mbali.”

⁴Wanafunzi wake wakamjibu, “Lakini hapa nyikani tutapata wapi mikate ya kutosha kuwalisha?”

⁵Yesu akawauliza, “Mna mikate mingapi?”

Wakajibu, “Tuna mikate saba.”

⁶Akawaambia watu waketi chini. Akaichukua ile mikate saba na kushukuru, baadaye akaimega na kuwapa wanafunzi wake ili wawagawie watu. Wanafunzi wake wakafanya hivyo.

⁷Walikuwa pia na visamaki vichache, Yesu akavibariki, akawaamuru wanafunzi wake wawagawie watu.

⁸Wale watu walikula na kutosheka. Baadaye wanafunzi wakakusanya vipande vilivyosalia, wakajaza vikapu saba.

⁹Watu waliokula walikuwa wapata elfu nne. Baada ya kuwaaga,

¹⁰aliingia kwenye mashua pamoja na wanafunzi wake, akaenda sehemu za Dalmanutha.

Mafarisayo waomba ishara

¹¹Mafarisayo wakaja, wakaanza kumhoji Yesu. Ili kumtega, wakamwomba awaoneshe ishara kutoka mbinguni.

¹²Akahuzunika moyoni, akawaambia, “Kwa nini kizazi hiki kinataka ishara? Amin nawaambieni, hakitapewa ishara yoyote.”

¹³Kisha akawaacha, akarudi kwenye mashua, akavuka hadi ngʼambo.

Chachu ya Mafarisayo na ya Herode

¹⁴Wanafunzi walikuwa wamesahau kuchukua mikate ya kutosha. Walikuwa na mkate mmoja tu kwenye mashua.

¹⁵Yesu akawaonya: “Jihadharini na chachu ya Mafarisayo na ya Herode.”

¹⁶Wakajadiliana wao kwa wao, na kusema, “Anasema hivi kwa sababu hatukuleta mikate.”

¹⁷Yesu, akifahamu majadiliano yao, akawauliza: “Mbona mnajadiliana kuhusu kutokuwa na mikate? Je, bado hamtambui wala hamwelewi? Je, mbona mioyo yenu ni migumu kiasi hicho?

¹⁸Je, mna macho lakini mnashindwa kuona, na mna masikio lakini mnashindwa kusikia? Je, hamkumbuki?

¹⁹Nilipoimega ile mikate mitano kwa watu elfu tano, mlikusanya vikapu vingapi vilivyojaa mabaki?”

Wakamjibu, “Kumi na viwili.”

²⁰“Je, nilipoimega ile mikate saba kwa watu elfu nne, mlikusanya vikapu vingapi vilivyojaa mabaki?”

Wakamjibu, “Saba.”

²¹Ndipo akawauliza, “Je, bado hamwelewi?”

Yesu amponya kipofu huko Bethsaida

²²Wakafika Bethsaida na baadhi ya watu wakamleta mtu mmoja kipofu wakamsihi Yesu amguse.

²³Yesu akamshika mkono huyo kipofu akampeleka nje ya kijiji. Baada ya kuyatemea mate macho ya yule kipofu na kumwekea mikono, Yesu akamuuliza, “Unaona chochote?”

²⁴Yule kipofu akaangalia, akasema, “Ninaona watu, wanaonekana kama miti inayotembea.”

²⁵Yesu akamwekea tena mikono machoni. Kisha macho yake yakafunguka, kuona kwake kukarejea naye akaona kila kitu dhahiri.

²⁶Yesu akamtuma nyumbani mwake, akamwambia, “Hata kijijini usiingie.”

Petro amkiri Yesu kuwa Kristo

²⁷Yesu na wanafunzi wake wakaelekea vijiji vya Kaisaria-Filipi. Walipokuwa njiani, Yesu akawauliza, “Watu husema mimi ni nani?”

²⁸Wakamjibu, “Baadhi husema wewe ni Yohana Mbatizaji, wengine husema ni Eliya, na bado wengine husema wewe ni mmoja wa manabii.”

²⁹Akawauliza, “Je, ninyi mnasema mimi ni nani?”

Petro akajibu, “Wewe ndiwe Kristo.”

³⁰Yesu akawaonya wasimwambie mtu yeyote habari zake.

Yesu atabiri kifo chake

³¹Ndipo akaanza kuwafundisha wanafunzi wake kuwa Mwana wa Adamu lazima atapata mateso mengi na kukataliwa na wazee, viongozi wa makuhani, na walimu wa sheria, na kwamba itampasa auawe lakini baada ya siku tatu afufuliwe.

³²Aliyasema haya waziwazi. Ndipo Petro akamchukua kando na akaanza kumkemea.

³³Lakini Yesu akageuka na kuwaangalia wanafunzi wake, na akamkemea Petro. Akasema, “Rudi nyuma yangu, Shetani! Moyo wako hauwazi yaliyo ya Mungu, bali ya wanadamu.”

³⁴Ndipo akawaita umati ule wa watu pamoja na wanafunzi wake, akasema, “Mtu yeyote akitaka kunifuata, ni lazima ajikane mwenyewe, auchukue msalaba wake, anifuate.

³⁵Kwa maana yeyote anayetaka kuyaokoa maisha yake atayapoteza, lakini yeyote atakayeyapoteza maisha yake kwa ajili yangu na kwa ajili ya Injili atayaokoa.

³⁶Je, itamfaidi nini mtu kuupata ulimwengu wote, lakini akayapoteza maisha yake?

³⁷Au mtu atatoa nini badala ya nafsi yake?

³⁸Mtu yeyote akinionea aibu mimi na maneno yangu katika kizazi hiki cha uzinzi na dhambi, Mwana wa Adamu naye atamwonea aibu wakati atakapokuja katika utukufu wa Baba yake pamoja na malaika watakatifu.”