Zaburi 106

Wema wa Mwenyezi Mungu kwa watu wake

¹Msifuni Mwenyezi Mungu.[#106:1 kwa Kiebrania ni Hallelu Yah ; pia 106:48.]

Mshukuruni Mwenyezi Mungu, kwa kuwa ni mwema;

fadhili zake zadumu milele.

²Ni nani awezaye kusimulia matendo makuu ya Mwenyezi Mungu

au kutangaza kikamilifu sifa zake?

³Heri wale wanaodumisha haki,

ambao daima wanafanya yaliyo mema.

⁴Ee Mwenyezi Mungu, unikumbuke unapowatendea mema watu wako,

uwe msaada wangu unapowaokoa,

⁵ili niweze kufurahia mafanikio ya wateule wako,

niweze kushiriki katika furaha ya taifa lako,

na kuungana na urithi wako katika kukusifu.

⁶Tumetenda dhambi, kama vile baba zetu walivyotenda,

tumekosa na tumetenda uovu.

⁷Baba zetu walipokuwa Misri,

hawakuzingatia maajabu yako,

wala hawakukumbuka wingi wa fadhili zako,

bali waliasi kando ya bahari,

ile Bahari ya Shamu.

⁸Hata hivyo aliwaokoa kwa ajili ya jina lake,

ili apate kudhihirisha uweza wake mkuu.

⁹Alikemea Bahari ya Shamu, nayo ikakauka,

akawaongoza katika vilindi vyake kama vile jangwani.

¹⁰Aliwaokoa mikononi mwa adui;

kutoka mikononi mwa adui aliwakomboa.

¹¹Maji yaliwafunika adui zao,

hakunusurika hata mmoja.

¹²Ndipo walipoamini ahadi zake,

nao wakaimba sifa zake.

¹³Lakini walisahau upesi aliyowatendea,

wala hawakungojea ushauri wake.

¹⁴Jangwani walitawaliwa na tamaa zao,

walimjaribu Mungu nyikani.

¹⁵Kwa hiyo aliwapa kile walichoomba,

lakini akatuma juu yao ugonjwa wa kudhoofisha.

¹⁶Kambini walimwonea wivu Musa,

na pia Haruni aliyekuwa amewekwa wakfu kwa Mwenyezi Mungu.

¹⁷Ardhi ilifunguka ikawameza Dathani,

ikawazika Abiramu na kundi lake.

¹⁸Moto uliwaka katikati ya wafuasi wao,

mwali wa moto uliwateketeza waovu.

¹⁹Huko Horebu walitengeneza ndama,

na kuabudu sanamu ya kusubu kwa chuma.

²⁰Waliubadilisha Utukufu wao

kwa sanamu ya fahali, ambaye hula majani.

²¹Walimsahau Mungu aliyewaokoa,

aliyetenda mambo makuu huko Misri,

²²miujiza katika nchi ya Hamu

na mambo ya kutisha huko Bahari ya Shamu.

²³Kwa hiyo alisema kwamba angewaangamiza:

kama Musa mteule wake,

asingesimama kati yao na Mungu

kuizuia ghadhabu yake kuwaangamiza.

²⁴Kisha waliidharau ile nchi nzuri,

hawakuiamini ahadi yake.

²⁵Walinung’unika ndani ya mahema yao,

wala hawakumtii Mwenyezi Mungu.

²⁶Kwa hiyo akaapa kwa mkono ulioinuliwa

kwamba atawafanya waanguke jangwani,

²⁷kuwatawanya wazao wao waanguke miongoni mwa mataifa,

na kuwatawanya katika nchi zote.

²⁸Walijifunga nira na Baali wa Peori,

wakala dhabihu zilizotolewa kwa miungu isiyo na uhai.

²⁹Waliichochea hasira ya Mwenyezi Mungu,

wakamkasirisha kwa matendo yao maovu,

nayo tauni ikazuka katikati yao.

³⁰Lakini Finehasi alisimama na kuingilia kati,

nayo tauni ikazuiliwa.

³¹Hili likahesabiwa kwake haki,

kwa vizazi visivyo na mwisho vijavyo.

³²Kwenye maji ya Meriba, walimkasirisha Mwenyezi Mungu,

janga likampata Musa kwa sababu yao;

³³kwa maana walimwasi Roho wa Mungu,

na maneno yasiyofaa yakatoka mdomoni kwa Musa.

³⁴Hawakuyaangamiza yale mataifa

kama Mwenyezi Mungu alivyowaagiza,

³⁵bali walijichanganya na mataifa

na wakazikubali desturi zao.

³⁶Waliabudu sanamu zao,

zikawa mtego kwao.

³⁷Wakawatoa wana wao

na binti zao dhabihu kwa mashetani.

³⁸Walimwaga damu isiyo na hatia,

damu za wana wao wa kiume na wa kike,

ambao waliwatoa dhabihu kwa sanamu za Kanaani,

nayo nchi ikanajisika kwa damu zao.

³⁹Wakajinajisi wenyewe kwa yale waliyotenda;

kwa matendo yao wenyewe wakajifanyia ukahaba.

⁴⁰Kwa hiyo Mwenyezi Mungu akawakasirikia watu wake

na akauchukia sana urithi wake.

⁴¹Akawakabidhi kwa mataifa

na adui zao wakawatawala.

⁴²Adui zao wakawadhulumu

na kuwatia chini ya mkono wao.

⁴³Mara nyingi aliwaokoa

lakini walizama kwenye uasi,

na wakajiharibu katika dhambi zao.

⁴⁴Lakini akaangalia mateso yao

aliposikia kilio chao;

⁴⁵kwa ajili yao akakumbuka agano lake,

na kutokana na upendo wake mkuu akapooza hasira yake.

⁴⁶Akawafanya wahurumiwe

na wote waliowashikilia mateka.

⁴⁷Ee Mwenyezi Mungu, Mungu wetu, tuokoe.

Tukusanye tena kutoka kwa mataifa,

ili tuweze kulishukuru jina lako takatifu,

na kushangilia katika sifa zako.

⁴⁸Atukuzwe Mwenyezi Mungu, Mungu wa Israeli,

tangu milele na hata milele.

Watu wote na waseme, “Amen!”

Msifuni Mwenyezi Mungu.