Zaburi 4

Sala ya jioni ya kuomba msaada

¹Nijibu nikuitapo,

Ee Mungu wangu mwenye haki!

Nipumzishe katika shida zangu;

nirehemu, usikie ombi langu.

²Enyi watu, mtabadilisha utukufu wangu

kuwa aibu hadi lini?

Mtapenda udanganyifu

na kufuata miungu ya uongo hadi lini?

³Fahamuni hakika kwamba Bwana amewatenga

wale wamchao kwa ajili yake;

Bwana atanisikia nimwitapo.

⁴Katika hasira yako, usitende dhambi.

Tulieni kimya mkiwa vitandani mwenu,

mkiichunguza mioyo yenu.

⁵Toeni dhabihu zilizo haki;

mtegemeeni Bwana .

⁶Wengi wanauliza, “Ni nani awezaye

kutuonesha jema lolote?”

Ee Bwana , tuangazie nuru ya uso wako.

⁷Wewe umejaza moyo wangu kwa furaha kubwa

kuliko watu waliopata nafaka na divai kwa wingi.

⁸Nitajilaza chini na kulala kwa amani,

kwa kuwa wewe peke yako, Ee Bwana ,

waniwezesha kukaa kwa salama.