Zaburi 40

Wimbo wa sifa

¹Nilimngoja Bwana kwa saburi,

naye akanijia na kusikia kilio changu.

²Akanipandisha kutoka shimo la uharibifu,

kutoka matope na utelezi;

akaiweka miguu yangu juu ya mwamba

na kunipa mahali imara pa kusimama.

³Akaweka wimbo mpya kinywani mwangu,

wimbo wa sifa kwa Mungu wetu.

Wengi wataona na kuogopa

na kuweka tumaini lao kwa Bwana .

⁴Heri mtu yule amfanyaye Bwana kuwa tumaini lake,

asiyewategemea wenye kiburi,

wale wenye kugeukia miungu ya uongo.

⁵Ee Bwana Mungu wangu,

umefanya mambo mengi ya ajabu.

Mambo uliyopanga kwa ajili yetu

hakuna awezaye kukuhesabia;

kama ningesema na kuyaelezea,

yangekuwa mengi mno kuyatangaza.

⁶Dhabihu na sadaka hukuvitaka,

lakini umefungua masikio yangu;

sadaka za kuteketezwa na sadaka za dhambi

hukuzihitaji.

⁷Ndipo niliposema, “Mimi hapa, nimekuja:

imeandikwa kunihusu katika kitabu.

⁸Ee Mungu wangu,

natamani kuyafanya mapenzi yako;

sheria yako iko ndani ya moyo wangu.”

⁹Nimehubiri haki katika kusanyiko kubwa,

sikufunga mdomo wangu,

Ee Bwana , kama ujuavyo.

¹⁰Sikuficha haki yako moyoni mwangu;

ninasema juu ya uaminifu wako na wokovu wako.

Sikuficha upendo wako na kweli yako

mbele ya kusanyiko kubwa.

¹¹Ee Bwana , usinizuilie huruma zako,

upendo wako na kweli yako daima vinilinde.

¹²Kwa maana taabu zisizohesabika zimenizunguka,

dhambi zangu zimenikamata, hata nisiweze kuona.

Zimekuwa nyingi kuliko nywele za kichwa changu,

nao moyo unazimia ndani yangu.

¹³Ee Bwana , uwe radhi kuniokoa;

Ee Bwana , njoo hima unisaidie.

¹⁴Wote wanaotafuta kuniua,

waaibishwe na kufadhaishwa;

wote wanaotamani kuangamizwa kwangu,

wafukuzwe mbali kwa aibu.

¹⁵Wale wanaoniambia, “Aha! Aha!”

wafadhaishwe na iwe aibu yao.

¹⁶Lakini wote wanaokutafuta

washangilie na kukufurahia,

wale wanaoupenda wokovu wako siku zote waseme,

“Bwana atukuzwe!”

¹⁷Lakini mimi bado ni maskini na mhitaji;

Bwana na anifikirie.

Wewe ndiwe msaada wangu na Mwokozi wangu;

Ee Mungu wangu, usikawie.