Zaburi 45

Wimbo wa arusi ya kifalme

¹Moyo wangu umesisimuliwa na jambo jema

ninapomsimulia mfalme mabeti yangu;

ulimi wangu ni kalamu ya mwandishi stadi.

²Wewe ni bora kuliko watu wengine wote

na midomo yako imepakwa neema,

kwa kuwa Mungu amekubariki milele.

³Jifunge upanga wako pajani mwako, ee mwenye nguvu,

jivike fahari na utukufu.

⁴Katika fahari yako, songa mbele kwa ushindi,

kwa ajili ya kweli, unyenyekevu na haki,

mkono wako wa kuume na uoneshe matendo ya kutisha.

⁵Mishale yako mikali na ichome mioyo ya adui za mfalme,

mataifa na yaanguke chini ya nyayo zako.

⁶Ee Mungu, kiti chako cha enzi

kitadumu milele na milele,

fimbo ya utawala wa haki

itakuwa fimbo ya utawala wa ufalme wako.

⁷Unaipenda haki na kuchukia uovu;

kwa hiyo Mungu, Mungu wako,

amekuweka juu ya wenzako,

kwa kukupaka mafuta ya furaha.

⁸Mavazi yako yote yana harufu nzuri

ya manemane, udi na mdalasini;

kutoka majumba ya kifalme

yaliyopambwa kwa pembe za ndovu,

sauti za vinanda vya nyuzi

zinakufanya ufurahi.

⁹Binti za wafalme ni miongoni mwa wanawake wako waheshimiwa;

kuume kwako yupo bibi arusi malkia aliyevaa dhahabu ya Ofiri.

¹⁰Sikiliza, ewe binti, fikiri na utege sikio:

Sahau watu wako na nyumba ya baba yako.

¹¹Mfalme ameshangazwa na uzuri wako;

mheshimu, kwa kuwa yeye ni bwana wako.

¹²Binti Tiro atakuletea zawadi,

watu wenye utajiri watatafuta upendeleo wako.

¹³Ufahari wote una binti mfalme katika chumba chake;

vazi lake limefumwa kwa nyuzi za dhahabu.

¹⁴Anaongozwa kwa mfalme,

akiwa amevalia mavazi yaliyotariziwa,

mabikira wenzake wanamfuata

na wanaletwa kwako.

¹⁵Wanaingizwa ndani kwa shangwe na furaha,

na kuingia katika jumba la mfalme.

¹⁶Wana wenu watachukua nafasi za baba zenu,

mtawafanya wakuu katika nchi yote.

¹⁷Nitadumisha kumbukumbu lako katika vizazi vyote,

kwa hiyo mataifa watakusifu milele na milele.