Zaburi 50

Ibada ya kweli

¹Mwenye Nguvu, Mungu, Bwana ,

asema na kuiita dunia,

tangu mawio ya jua

hadi mahali pake liendapo kutua.

²Kutoka Sayuni, penye uzuri mkamilifu,

Mungu anaangaza.

³Mungu wetu anakuja na hatakaa kimya,

moto uteketezao unamtangulia,

akiwa amezungukwa na tufani kali.

⁴Anaziita mbingu zilizo juu,

na nchi, ili aweze kuwahukumu watu wake:

⁵“Nikusanyieni watu wangu waliowekwa wakfu,

waliofanya agano nami kwa dhabihu.”

⁶Nazo mbingu zinatangaza haki yake,

kwa maana Mungu mwenyewe ni hakimu.

⁷“Sikieni, enyi watu wangu, nami nitasema,

ee Israeli, nami nitashuhudia dhidi yenu:

Mimi ndimi Mungu, Mungu wenu.

⁸Sikukemei kwa sababu ya dhabihu zako,

au sadaka zako za kuteketezwa,

ambazo daima ziko mbele zangu.

⁹Sina haja na fahali wa banda lako,

au mbuzi wa zizi lako.

¹⁰Kwa maana kila mnyama wa msituni ni wangu,

na pia makundi ya mifugo juu ya vilima elfu.

¹¹Ninamjua kila ndege mlimani,

nao viumbe wa kondeni ni wangu.

¹²Kama ningekuwa na njaa, nisingewaambia ninyi,

kwa maana ulimwengu ni wangu,

na vyote vilivyomo.

¹³Je, mimi hula nyama ya mafahali

au kunywa damu ya mbuzi?

¹⁴Toa sadaka za shukrani kwa Mungu,

timiza nadhiri zako kwake Yeye Aliye Juu Sana,

¹⁵na uniite siku ya taabu;

nami nitakuokoa, nawe utanitukuza.”

¹⁶Lakini kwake mtu mwovu, Mungu asema:

“Una haki gani kunena sheria zangu

au kuchukua agano langu mdomoni mwako?

¹⁷Unachukia mafundisho yangu

na kuyatupilia mbali maneno yangu.

¹⁸Unapomwona mwizi, unaungana naye,

unapiga kura yako pamoja na wazinzi.

¹⁹Unakitumia kinywa chako kunena maovu,

na kuuongoza ulimi wako kwa hila.

²⁰Unamsengenya ndugu yako bila kukoma,

na kumsingizia mwana wa mama yako.

²¹Mambo haya unayafanya, nami nimekaa kimya,

ukadhani Mimi ni kama wewe kabisa.

Lakini nitakukemea

na kuweka mashtaka mbele yako.

²²“Yatafakarini haya, ninyi mnaomsahau Mungu,

ama sivyo nitawararua vipande vipande,

wala hapatakuwa na yeyote wa kuwaokoa:

²³Atoaye dhabihu za shukrani ananiheshimu mimi,

naye aiandaa njia yake

ili nimwoneshe wokovu wa Mungu.”