Zaburi 69

Kilio cha kuomba msaada wakati wa dhiki

¹Ee Mungu, niokoe,

kwa maana maji yamenifika shingoni.

²Ninazama kwenye vilindi vya matope,

pasipo mahali pa kukanyaga,

Nimefika kwenye maji makuu,

mafuriko yamenigharikisha.

³Nimechoka kwa kuomba msaada,

koo langu limekauka.

Macho yangu yanafifia,

nikimtafuta Mungu wangu.

⁴Wale wanaonichukia bila sababu

ni wengi kuliko nywele za kichwa changu;

wengi ni adui kwangu bila sababu,

wale wanaotafuta kuniangamiza.

Ninalazimishwa kurudisha

kitu ambacho sikuiba.

⁵Ee Mungu, wewe unajua upumbavu wangu,

wala hatia yangu haikufichika kwako.

⁶Ee Bwana, Bwana wa majeshi,

wanaokutumaini wasiaibishwe

kwa ajili yangu;

wanaokutafuta wasifedheheshwe kwa ajili yangu,

Ee Mungu wa Israeli.

⁷Kwa maana nimestahimili dharau kwa ajili yako,

aibu imefunika uso wangu.

⁸Nimekuwa mgeni kwa ndugu zangu,

mgeni kwa wana wa mama yangu mwenyewe.

⁹Kwa kuwa wivu wa nyumba yako unanila,

matukano ya wale wanaokutukana yameniangukia.

¹⁰Ninapolia na kufunga,

lazima nivumilie matusi.

¹¹Ninapovaa gunia,

watu hunidharau.

¹²Wale wanaoketi mlangoni wananisimanga,

nimekuwa wimbo wa walevi.

¹³Lakini Ee Bwana , ninakuomba,

kwa wakati ukupendezao;

katika upendo wako mkuu, Ee Mungu,

unijibu kwa wokovu wako wa hakika.

¹⁴Uniokoe katika matope,

usiniache nizame;

niokoe na hao wanaonichukia,

kutoka kwa vilindi vya maji.

¹⁵Usiache mafuriko yanigharikishe

au vilindi vinimeze,

au shimo lifumbe kinywa chake juu yangu.

¹⁶Ee Bwana , unijibu, kwa wema wa upendo wako;

kwa huruma zako nyingi unigeukie.

¹⁷Usimfiche mtumishi wako uso wako,

uharakishe kunijibu, kwa sababu niko katika shida.

¹⁸Njoo karibu uniokoe,

nikomboe kwa sababu ya adui zangu.

¹⁹Unajua jinsi ninavyodharauliwa,

kufedheheshwa na kuaibishwa,

adui zangu wote unawajua.

²⁰Dharau zimenivunja moyo

na nimekata tamaa,

nimetafuta wa kunihurumia, lakini sikumpata,

wa kunituliza, lakini sikumpata.

²¹Waliweka nyongo katika chakula changu

na walinipa siki nilipokuwa na kiu.

²²Meza iliyoandaliwa mbele yao na iwe mtego,

nayo iwe upatilizo na tanzi.

²³Macho yao yatiwe giza ili wasiweze kuona,

nayo migongo yao iinamishwe daima.

²⁴Uwamwagie ghadhabu yako,

hasira yako kali na iwapate.

²⁵Mahali pao na pawe ukiwa,

wala asiwepo yeyote atakayeishi katika mahema yao.

²⁶Kwa kuwa wanawatesa wale uliowajeruhi,

na kuzungumza kuhusu maumivu ya wale uliowaumiza.

²⁷Walipize uovu juu ya uovu,

usiwaache washiriki katika wokovu wako.

²⁸Wafutwe kutoka kitabu cha uzima

na wasiorodheshwe pamoja na wenye haki.

²⁹Lakini mimi niko katika maumivu na dhiki;

Ee Mungu, wokovu wako na unihifadhi.

³⁰Nitalisifu jina la Mungu kwa wimbo,

nami nitamtukuza kwa kumtolea shukrani.

³¹Hili litampendeza Bwana kuliko ngʼombe dume,

zaidi ya fahali akiwa na pembe na kwato zake.

³²Maskini wataona na kufurahi:

ninyi mnaomtafuta Mungu, mioyo yenu na iishi!

³³Bwana huwasikia wahitaji

wala hadharau watu wake waliotekwa.

³⁴Mbingu na dunia zimsifu,

bahari na vyote viendavyo ndani yake,

³⁵kwa maana Mungu ataiokoa Sayuni

na kuijenga tena miji ya Yuda.

Kisha watu watafanya makao yao humo na kuimiliki,

³⁶watoto wa watumishi wake watairithi

na wale wote wanaolipenda jina lake

wataishi humo.