Zaburi 7

Sala ya mtu anayedhulumiwa

¹Ee Bwana , Mungu wangu, ninakukimbilia wewe,

uniokoe na kunikomboa na wote wanaonifuatia,

²la sivyo watanirarua kama simba

na kunichana vipande vipande, asiwepo wa kuniokoa.

³Ee Bwana , Mungu wangu, kama nimetenda haya

na kuna hatia mikononi mwangu,

⁴au ikiwa nimemtenda uovu aliye na amani nami,

au nimemnyangʼanya adui yangu pasipo sababu,

⁵basi adui anifuatie na kunipata,

auponde uhai wangu ardhini

na kunilaza mavumbini.

⁶Amka kwa hasira yako, Ee Bwana ,

inuka dhidi ya ghadhabu ya adui zangu.

Amka, Mungu wangu, uamue haki.

⁷Kusanyiko la watu na likuzunguke.

Watawale kutoka juu.

⁸Bwana na awahukumu makabila ya watu.

Nihukumu Ee Bwana ,

kwa kadiri ya haki yangu,

kwa kadiri ya uadilifu wangu,

Ewe Uliye Juu Sana.

⁹Ee Mungu mwenye haki,

uchunguzaye mawazo na mioyo,

komesha ghasia za waovu

na ufanye wenye haki waishi kwa amani.

¹⁰Ngao yangu ni Mungu Aliye Juu Sana,

anayewaokoa wanyofu wa moyo.

¹¹Mungu ni mwamuzi mwenye haki,

Mungu anayeghadhibika kila siku.

¹²Mtu asipotubu,

Mungu ataunoa upanga wake,

ataupinda na kuufunga uzi upinde wake.

¹³Ameandaa silaha zake kali,

ameweka tayari mishale yake ya moto.

¹⁴Yeye aliye na mimba ya uovu

na anayechukua mimba ya ghasia huzaa uongo.

¹⁵Yeye anayechimba shimo na kulifukua

hutumbukia katika shimo alilochimba mwenyewe.

¹⁶Ghasia anazozianzisha humrudia mwenyewe,

ukatili wake humrudia kichwani.

¹⁷Nitamshukuru Bwana kwa ajili ya haki yake,

na nitaliimbia sifa jina la Bwana Aliye Juu Sana.