Zaburi 79

Maombi kwa ajili ya wokovu wa taifa

¹Ee Mungu, mataifa yameuvamia urithi wako,

wamelinajisi Hekalu lako takatifu,

wameifanya Yerusalemu kuwa magofu.

²Wametoa maiti za watumishi

kuwa chakula cha ndege wa angani

na nyama ya watakatifu wako

kwa wanyama wa nchi.

³Wamemwaga damu kama maji

kuzunguka Yerusalemu yote,

wala hakuna yeyote wa kuwazika.

⁴Tumekuwa kitu cha aibu kwa majirani zetu,

cha dharau na mzaha kwa wale wanaotuzunguka.

⁵Hata lini, Ee Bwana ? Je, wewe utakasirika milele?

Wivu wako utawaka kama moto hadi lini?

⁶Mwaga ghadhabu yako kwa mataifa yasiyokukubali,

juu ya falme za hao wasioliitia jina lako,

⁷kwa maana wamemrarua Yakobo

na kuharibu nchi ya makao yake.

⁸Usituhesabie dhambi za baba zetu,

huruma yako na itujie hima,

kwa maana tu wahitaji mno.

⁹Ee Mungu Mwokozi wetu, utusaidie,

kwa ajili ya utukufu wa jina lako;

tuokoe na kutusamehe dhambi zetu

kwa ajili ya jina lako.

¹⁰Kwa nini mataifa waseme,

“Yuko wapi Mungu wenu?”

Mbele ya macho yetu,

dhihirisha kati ya mataifa

kwamba unalipiza kisasi damu iliyomwagwa

ya watumishi wako.

¹¹Kilio cha huzuni cha wafungwa kifike mbele zako;

kwa nguvu za mkono wako

hifadhi wale waliohukumiwa kufa.

¹²Walipize majirani zetu mara saba

aibu walizovurumisha kwako, Ee Bwana.

¹³Ndipo sisi watu wako, kondoo wa malisho yako,

tutakusifu milele;

tutasimulia sifa zako

kizazi hadi kizazi.