Zaburi 80

Maombi kwa ajili ya kuponywa kwa taifa

¹Ee Mchungaji wa Israeli tusikie,

wewe umwongozaye Yusufu kama kundi;

wewe uketiye kwenye kiti cha enzi

katikati ya makerubi, angaza

²mbele ya Efraimu, Benyamini na Manase.

Uamshe nguvu zako,

uje utuokoe.

³Ee Mungu, uturejeshe,

utuangazie uso wako,

ili tuweze kuokolewa.

⁴Ee Bwana Mungu wa majeshi,

hata lini hasira yako itawaka

dhidi ya maombi ya watu wako?

⁵Umewalisha kwa mkate wa machozi,

umewafanya wanywe machozi bakuli tele.

⁶Tumekuwa chanzo cha ugomvi kwa majirani zetu,

na adui zetu wanatudhihaki.

⁷Ee Mungu wa majeshi, uturejeshe;

utuangazie uso wako,

nasi tuweze kuokolewa.

⁸Ulileta mzabibu kutoka Misri,

ukawafukuza mataifa, ukaupanda.

⁹Uliandaa shamba kwa ajili yake,

mizizi ikawa imara, ukajaza nchi.

¹⁰Milima ilifunikwa kwa kivuli chake,

matawi yake yakafunika mierezi mikubwa.

¹¹Matawi yake yalienea hadi Baharini,[#80:11 pengine ni Bahari ya Mediterania]

machipukizi yake hadi kwenye Mto.

¹²Mbona umebomoa kuta zake

ili wote wapitao karibu

wazichume zabibu zake?

¹³Nguruwe mwitu wanauharibu,

na viumbe wa kondeni hujilisha humo.

¹⁴Turudie, Ee Mungu wa majeshi!

Tazama chini kutoka mbinguni na uone!

Linda mzabibu huu,

¹⁵mche ulioupanda kwa mkono wako wa kuume,

mwana uliyemlea

kwa ajili yako mwenyewe.

¹⁶Mzabibu wako umekatwa, umechomwa moto,

unapowakemea, watu wako huangamia.

¹⁷Mkono wako na utulie juu ya mtu aliye katika mkono wako wa kuume,

mwana wa mtu uliyemlea kwa ajili yako mwenyewe.

¹⁸Ndipo hatutakuacha tena,

utuhuishe, nasi tutaliitia jina lako.

¹⁹Ee Bwana Mungu wa majeshi, uturejeshe;

utuangazie uso wako,

ili tuweze kuokolewa.