Zaburi 91

Mungu mlinzi wetu

¹Yeye akaaye mahali pa salama pake Yeye Aliye Juu Sana,

atadumu katika uvuli wake Mwenyezi.

²Nitasema kumhusu Bwana , “Yeye ndiye kimbilio langu na ngome yangu,

Mungu wangu, ninayemtumaini.”

³Hakika yeye ataniokoa na mtego wa mwindaji,

na maradhi ya kuambukiza ya kuua.

⁴Atakufunika kwa manyoya yake,

chini ya mabawa yake utapata kimbilio,

uaminifu wake utakuwa ngao na kinga yako.

⁵Hutaogopa vitisho vya usiku,

wala mshale urukao mchana,

⁶wala maradhi ya kuambukiza

yanayonyemelea gizani,

wala tauni iharibuyo adhuhuri.

⁷Ijapo watu elfu wataangukia kando yako,

kumi elfu mkono wako wa kuume,

lakini haitakukaribia wewe.

⁸Utatazama tu kwa macho yako

na kuona adhabu ya waovu.

⁹Ukimfanya Aliye Juu Sana kuwa makao yako;

naam, Bwana ambaye ni kimbilio langu;

¹⁰basi hakuna madhara yatakayokupata wewe,

hakuna maafa yatalikaribia hema lako.

¹¹Kwa kuwa atawaagiza malaika wake kwa ajili yako,

wakulinde katika njia zako zote.

¹²Watakuchukua mikononi mwao,

ili usijikwae mguu wako kwenye jiwe.

¹³Utawakanyaga simba na nyoka wakali,

simba mkubwa na nyoka utawaponda kwa miguu.

¹⁴Bwana asema, “Kwa kuwa ananipenda, nitamwokoa;

nitamlinda, kwa kuwa analikiri Jina langu.

¹⁵Ataniita, nami nitamjibu;

nitakuwa pamoja naye katika taabu,

nitamwokoa na kumheshimu.

¹⁶Kwa siku nyingi nitamshibisha

na kumwonesha wokovu wangu.”