Zaburi 93

Mungu ni mkuu

¹Bwana anatawala, amejivika utukufu;

Bwana amejivika utukufu

tena amejivika nguvu.

Dunia imewekwa imara,

haitaondoshwa.

²Kiti chako cha enzi kimekuwa thabiti tangu zamani;

wewe umekuwa tangu milele.

³Bahari zimepaza, Ee Bwana ,

bahari zimepaza sauti zake;

bahari zimepaza sauti za mawimbi yake.

⁴Yeye ni mkuu kuliko ngurumo ya maji makuu,

ni mkuu kuliko mawimbi ya bahari:

Bwana aishiye juu sana ni mkuu.

⁵Ee Bwana , sheria zako ni imara;

utakatifu umepamba nyumba yako

pasipo mwisho.