¹Ee Yerusalemu, vua nguo za matanga na huzuni,[#Isa 52:1; 61:3,10; Ufu 21:2]

Uvae uzuri wa utukufu utokao kwa Mungu milele.

²Jifunge nguo ya haki itokayo kwa Mungu,

Jipige kilemba kichwani cha utukufu wake Aliye wa Milele.

³Maana Mungu ataidhihirisha nuru yako duniani kote,

⁴Na jina lako litaitwa na Mungu daima,

Amani ya haki, na Utukufu wa utauwa.

⁵Ondoka, Ee Yerusalemu, usimame juu;

Tazama upande wa mashariki, uangalie.

Toka machweo ya jua hata mawio yake wanao wanakusanyika

Kwa neno lake Yeye Aliye Mtakatifu,

Wakifurahi kwa kuwa Mungu amewakumbuka.

⁶Waliondoka kwako kwa miguu, wakikokotwa na adui zao,

Lakini Mungu anawarejeza kwako wameinuliwa juu kwa heshima

Kama katika kiti cha enzi.

⁷Maana kwa maagizo ya Mungu

Kila kilima kirefu kitashushwa,

Na milima ya milele.

Na mabonde yote yatajazwa,

Hata nchi iwe sawa,

Ili Israeli aende salama

Katika utukufu wa Mungu.

⁸Nayo misitu, na miti yote itoayo harufu nzuri,

Imemtia Israeli kivuli kwa amri ya Mungu;

⁹Kwa kuwa Mungu atamwongoza Israeli kwa furaha

Katika mwangaza wa utukufu wake,

Kwa ile rehema na haki itokayo kwake.