Onyo la kuharibiwa kwa Yerusalemu

¹Ufunuo juu ya bonde la maono.

Sasa una nini, wewe,

Hata umepanda pia juu ya madari ya nyumba?

²Ewe uliyejaa makelele,

Mji wa ghasia, mji wenye furaha;

Watu wako waliouawa hawakuuawa kwa upanga,

Wala hawakufa vitani.

³Wakuu wako wote wamekimbia pamoja,

Wamefungwa wasiutumie upinde.

Wote walioonekana wamefungwa pamoja,

Wamekimbia mbali sana.

⁴Kwa sababu hiyo nasema, Geuza uso wako usinitazame, nipate kulia kwa uchungu; usijishughulishe kunifariji, kwa ajili ya kuharibika kwake binti ya watu wangu.

⁵Kwa maana siku ya kutaabika, siku ya kukanyagwa, siku ya fujo inakuja, itokayo kwa Bwana, BWANA wa majeshi, katika bonde la Maono; inabomoa kuta; na kuililia milima.[#Est 3:15; Omb 1:5]

⁶Na Elamu wameshika podo, pamoja na magari ya vita, na watu wenye kupanda farasi; na Kiri wameifunua ngao.[#Isa 21:2; Yer 49:35]

⁷Hata ikawa mabonde yako mateule yamejaa magari ya vita, nao wapandao farasi wamejipanga katika malango.

⁸Kisha alikiondoa kifuniko cha Yuda, nawe siku hiyo ulivitazama vyombo vya vita katika nyumba ya mwituni.[#1 Fal 7:2]

⁹Nanyi mlipaona mahali palipobomoka katika mji wa Daudi ya kuwa ni pengi, nanyi mliyakusanya maji ya birika la chini.[#2 Fal 20:20; 2 Nya 32:4; Wim 4:4]

¹⁰Nanyi mlizihesabu nyumba za Yerusalemu, mkazibomoa nyumba ili kuutia nguvu ukuta.

¹¹Nanyi mlifanya birika la maji katikati ya kuta mbili, la kuwekea maji ya birika la kale; lakini hamkumwangalia yeye aliyeyafanya hayo, wala kumjali yeye aliyeyatengeneza zamani.[#Neh 3:16]

¹²Siku hiyo Bwana, BWANA wa majeshi, akawaita watu walie na kuomboleza, na kung'oa nywele zao, na kuvaa nguo za magunia;

¹³na kumbe! Furaha, na kuchekelea, na kuchinja ng'ombe, na kuchinja kondoo, na kula nyama, na kunywa mvinyo; tule, tunywe, kwa maana kesho tutakufa.[#Isa 5:12; Amo 6:3; Lk 17:26-29; Isa 56:12; 1 Kor 15:32]

¹⁴Na yeye BWANA wa majeshi akafunua haya masikioni mwangu, Ni kweli, uovu huu hautatakaswa wala kuwatokeni hata mfe; asema Bwana, BWANA wa majeshi.[#1 Sam 3:14; Eze 24:13]

Shutuma kwa maofisa wa kujipendekeza

¹⁵Bwana, BWANA wa majeshi, asema hivi, Haya! Nenda kwa huyu mtunza hazina, yaani, Shebna, aliye juu ya nyumba, ukamwambie,[#2 Fal 18:37; Isa 36:3; 1 Fal 4:6]

¹⁶Unafanyaje hapa? Nawe una nani hapa? Hata ukachimba kaburi hapa; ukamchimbia kaburi huko juu, na kumchongea makao katika jabali!

¹⁷Tazama, BWANA atakutupa kwa nguvu, kama mtu mwenye nguvu; naam, atakuzongazonga.

¹⁸Hakika atakukunja na kukutupa kama mpira, mpaka nchi iliyo mbali; huko utakufa, na magari ya utukufu wako yatakuwa huko huko, ewe uliye aibu ya nyumba ya bwana wako.

¹⁹Nami nitakusukuma na kukutoa katika mahali pako, naye atakushusha utoke hapa usimamapo.

²⁰Na itakuwa katika siku ile nitamwita mtumishi wangu Eliakimu, mwana wa Hilkia;[#2 Fal 18:18]

²¹nami nitamvika vazi lako, nitamtia nguvu kwa mshipi wako, nami nitamkabidhi yeye mamlaka yako; naye atakuwa baba kwa wenyeji wa Yerusalemu, na kwa nyumba ya Yuda.[#Ayu 29:16]

²²Na ufunguo wa nyumba ya Daudi nitauweka begani mwake; yeye atafungua wala hapana atakayefunga; naye atafunga wala hapana atakayefungua.[#Ufu 3:7]

²³Nami nitamkaza kama msumari mahali palipo imara; naye atakuwa kiti cha utukufu kwa nyumba ya baba yake.[#Ezr 9:8]

²⁴Nao wataangika juu yake utukufu wote wa nyumba ya baba yake; wazao wake na watoto wao, kila chombo kidogo tangu vyombo vya vikombe hata vyombo vya makopo vyote pia.

²⁵Katika siku ile, asema BWANA wa majeshi, ule msumari uliokazwa katika mahali palipo imara utalegea; nao utakatwa na kuanguka chini, na ule mzigo uliokuwa juu yake utakatiliwa mbali; maana BWANA amesema haya.