Utabiri juu ya Tiro

¹Ufunuo juu ya Tiro. Toeni sauti za uchungu, enyi merikebu za Tarshishi, kwa maana umeharibika kabisa, hata hapana nyumba, hapana mahali pa kuingia; toka nchi ya Kitimu wamefunuliwa habari.[#Yer 25:22; Eze 26:1–28:19; Yoe 3:4-8; Amo 1:9-10; Zek 9:1-4; Mt 11:21-22; Lk 10:13-14]

²Tulieni, enyi mkaao kisiwani; wewe ambaye wafanya biashara wa Sidoni, wavukao bahari, walikujaza.

³Vitu vilivyopandwa, vya Shihori, mavuno ya Nile, yaliyokuja juu ya maji mengi, ndilo pato lake, naye alikuwa soko la mataifa.[#Eze 27:3]

⁴Tahayari, Ee Sidoni; kwa maana bahari imenena, hiyo ngome ya bahari ilisema, Sikuona uchungu, wala sikuzaa, wala sikulea vijana, wala sikulea wanawali.

⁵Habari itakapofika Misri wataona uchungu sana kwa sababu ya habari ya Tiro.[#Isa 19:16]

⁶Piteni mpaka Tarshishi, enyi mkaao kisiwani, toeni sauti ya uchungu.

⁷Je! Huu ndio mji wenu wa furaha, ambao mwanzo wake ulikuwako tangu siku za kale, ambao miguu yake ilimchukua akae mbali sana?[#Isa 22:2]

⁸Ni nani aliyefanya shauri hili juu ya Tiro, uliotia watu mataji, ambao wafanya biashara wake walikuwa wana wa wafalme, na wachuuzi wake ni watu wakuu wa dunia?[#Isa 2:12; Eze 28:2; 1 Tim 3:4]

⁹BWANA wa majeshi ndiye aliyefanya shauri hili, ili kuharibu kiburi cha utukufu wote, na kuwaaibisha watu wa duniani wote pia.

¹⁰Pita katika nchi yako, kama Nile, Ee binti wa Tarshishi, hapana tena mshipi wa kukuzuia.

¹¹Amenyosha mkono wake juu ya bahari, amezitikisa falme; Bwana ametoa amri katika habari za Kanaani, kuziangamiza ngome zake.

¹²Naye akasema, Usizidi kufurahi, ewe bikira uliyeaibishwa, binti wa Sidoni, haya, ondoka, uende hadi Kitimu; huko nako hutapata raha.[#Omb 1:6; Hag 2:22; Ufu 18:22]

¹³Tazama, nchi ya Wakaldayo; watu hao hawako tena; Mwashuri ameiweka tayari kwa hayawani wa jangwani; wamesimamisha ngome zao za vita, wameyaharibu majumba yake ya enzi, akaufanya kuwa uharibifu.[#Zab 71:3]

¹⁴Pigeni yowe, enyi merikebu za Tarshishi; maana ngome yenu imefanywa ukiwa.[#Isa 2:16; Eze 27:25; Ufu 18:22]

¹⁵Basi, itakuwa katika siku ile, Tiro utasahauliwa miaka sabini, kadiri ya siku za mfalme mmoja; hata mwisho wa miaka sabini, Tiro utakuwa kama vile ulivyo wimbo wa kahaba.

¹⁶Twaa kinubi, tembea mjini,

Ewe kahaba uliyesahauliwa;

Piga vizuri, imba nyimbo nyingi,

Upate kukumbukwa tena.

¹⁷Hata itakuwa mwisho wa miaka sabini, BWANA ataizuru nchi ya Tiro, naye atarudi apate ujira wake, atafanya ukahaba pamoja na falme zote za ulimwengu juu ya uso wa dunia.[#Mwa 10:15,19; Yos 11:8; Ufu 17:2]

¹⁸Na biashara yake na ujira wake utakuwa wakfu kwa BWANA, hautawekwa hazinani wala hautawekwa akiba; bali mapato ya biashara yake yatakuwa mali zao wakaao mbele za BWANA, wapate kula na kushiba, na kuvaa mavazi ya fahari.[#Kum 28:65,66; Zab 45:12; Omb 1:3; Zek 14:20,21]