Wajibu kwa Mungu

¹Mwanangu, ukija kumtumikia BWANA,

Weka tayari roho yako kwa kujaribiwa.

²Ujitengeneze moyo ustahimili, wala isitaharuki siku ya kuteswa.

³Uambatane naye wala usijitenge tena, ili mwisho wako ukuzwe.

⁴Kila utakalopelekewa ulipokee kwa kuchangamka moyo, uyavumilie mabadiliko ya unyonge wako.

⁵Maana dhahabu hujaribiwa motoni, na watu wateule kalibuni mwa unyonge.[#Mit 3:5-6; 1 Pet 1:7; #Mit 6:18; Yn 14:15,21,23]

⁶Basi umwamini Yeye, naye atakusaidia; ukazinyoshe njia zako, na kulikaza taraja lako katika Yeye.

⁷Enyi mnaomcha BWANA,

Zingojeeni rehema zake,

Msigeuke upande msije mkaanguka.

⁸Enyi mnaomcha BWANA,

Mwaminini Yeye sana,

Thawabu yenu haitawapotea.

⁹Enyi mnaomcha BWANA,

Sasa tarajieni mema,

Na furaha ya daima na rehema.

¹⁰Angalieni vizazi vya kale mkaone;

Nani aliyemtumaini BWANA akaaibika?

Nani aliyekaa hali ya kumcha akaachwa?

Nani aliyemwita akadharauliwa?

¹¹Mradi BWANA yu mwenye huruma na rehema,

Husamehe dhambi na kuokoa wakati wa shida.

¹²Ole wao wenye mioyo ya woga,

Wenye mikono iliyolegea,

Wakosaji waendao njia mbili.

¹³Ole wake aliye dhaifu wa moyo,

Kwa maana amekosa imani,

Kwa hiyo hatahifadhika.

¹⁴Ole wenu ninyi nanyi,

Enyi mliopotewa na saburi,

Mtafanyaje BWANA atakapowajia?

¹⁵Wale wamchao BWANA

Hawatayaasi maneno yake;

Wampendao watazishika amri zake.

¹⁶Wale wamchao BWANA

Watatafuta mapenzi yake;

Nao wampendao watashiba torati.

¹⁷Wale wamchao BWANA

Watajitengeneza mioyo;

Na kunyenyekea machoni pake;

¹⁸Tutaanguka katika mikono ya BWANA,

Wala si katika mikono ya wanadamu;

Kwa maana kama ilivyo enzi yake,

Ndivyo zilivyo na rehema zake;

Na kama lilivyo jina lake,

Ndivyo yalivyo na matendo yake.