Nathani

¹Baada yake alitokea Nathani;

yeye alikuwa nabii siku za Daudi.

Daudi

²Kama vile mafuta ya tambiko ya amani yanavyochaguliwa na kutengwa kwa ajili ya Bwana,

ndivyo na Daudi alivyoteuliwa miongoni mwa watu wa Israeli.

³Alicheza na simba kana kwamba ni wanambuzi

na dubu kana kwamba ni wanakondoo.

⁴Wakati wa ujana wake aliliua jitu,

akawaondolea watu wake matukano yake.

Alirusha jiwe kwa kombeo lake,

likamwangusha Goliathi, mwenye majivuno.

⁵Maana alimsihi Bwana, Mungu Mkuu

naye akauimarisha mkono wake wa kulia,

apate kumuua adui mwenye nguvu vitani,

na kukuza nguvu za watu wake.

⁶Watu walimsifu kwa kuua maadui 10,000,

na kumshangilia kwa baraka za Bwana

wakati alipovikwa taji la kifalme.

⁷Aliwafagilia mbali maadui zake pande zote,

na kuwatokomeza kabisa Wafilisti;

alizivunjavunja nguvu zao mpaka leo.

⁸Katika yote aliyoyatenda Daudi,

alimshukuru na kumtukuza yule Mtakatifu Mungu Mkuu.

Alimpenda Muumba wake

na kumwimbia sifa kwa moyo wake wote.

⁹Aliwaweka waimbaji mbele ya madhabahu,

ili kwa sauti zao waimbe nyimbo tamu.

¹⁰Sikukuu alizifanya ziwe nzuri,

na kuzipangia nyakati zake mwaka mzima,

wakati watu waliposifu jina takatifu la Mungu,

na hekalu kujaa nyimbo nzuri tangu asubuhi.

¹¹Bwana alimwondolea Daudi dhambi zake,

na kuikuza nguvu yake milele;

alimjalia haki ya kuwa mfalme,

akaweka kiti cha enzi kitukufu katika Israeli.

Solomoni

¹²Baada ya Daudi alifuata mwanawe mwenye hekima

ambaye aliishi kwa amani kwa sababu yake.

¹³Solomoni alitawala wakati wa amani.

Mungu alimjalia amani pande zote,

ajenge nyumba kwa heshima ya jina lake,

na kutayarisha hekalu la kudumu milele.

¹⁴Kweli ulikuwa na hekima ewe Solomoni ulipokuwa kijana!

Ulitiririka busara kama mto!

¹⁵Ulijulikana duniani kwa maarifa yako,

na kuijaza methali na vitendawili.

¹⁶Jina lako lilijulikana mpaka visiwa vya mbali,

watu wakakupenda kwa kuwaletea amani.

¹⁷Kwa nyimbo, methali, mifano na maelezo yake,

nchi zilishikwa na mshangao.

¹⁸Kwa heshima ya jina la Bwana Mungu

ambaye anaitwa Mungu wa Israeli,

ulikusanya dhahabu kama bati, na fedha kama madini ya risasi.

¹⁹Lakini ukautoa mwili wako kwa wanawake,

ukawa mtumwa wa tamaa zako.

²⁰Uliitia doa heshima yako,

na kuutia unajisi ukoo wako,

hata ukawaletea wazawa wako adhabu,

wakahuzunishwa kwa sababu ya upumbavu wako.

²¹Hata ufalme ukagawanyika sehemu mbili,

ufalme pinzani ukatokea huko Efraimu.

²²Lakini Bwana hataacha kuwa na huruma,

wala kuruhusu kazi yake yoyote iharibike;

hatawafutilia mbali wazawa wa Daudi, mteule wake,

wala kuangamiza ukoo wa huyo aliyempenda.

Kwa hiyo alimwachia Yakobo mabaki,

na Daudi mzizi wa jamaa yake.

Rehoboamu na Yeroboamu

²³Solomoni akafariki kama wazee wake,

akamwacha mmoja wa watoto wake kuwa mtawala.

Huyo alikuwa Rehoboamu, mwingi wa upumbavu na mtovu wa busara,

ambaye maongozi yake yaliwafanya watu wakaasi.

Kulikuwa pia na Yeroboamu mwana wa Nebati,

aliyewasababisha Waisraeli kutenda dhambi,

na kuwaongoza Waefraimu katika njia ya dhambi.

²⁴Dhambi zao zilizidi kuwa nyingi mno,

hata zikasababisha waondolewe nchini mwao.

²⁵Maana walijaribu kutenda kila aina ya uovu,

mpaka Bwana alipowalipiza kisasi.