Werevu wa kweli na ujinga huwa kwa wakuu na kwa wadogo.

¹Mainzi waliokufa huyaozesha kwa kuyachafua mafuta ya mtengeneza manukato, ujinga hufanya makuu kuliko werevu wa kweli na utukufu.

²Moyo wa mwerevu wa kweli huelekea kuumeni, lakini moyo wa mjinga huelekea kushotoni.

³Napo njiani po pote, mjinga anapokwenda, hupotelewa na akili, hivyo hujitokeza kwao wote kuwa mjinga.

⁴Roho ya mtawalaji ikikuinukia, usiondoke mahali pako, kwani upole hutuliza makosa makubwa.[#Sh. 37:1; Fano. 24:19.]

⁵Yako mabaya, niliyoyaona chini ya jua, ni kama kosa litokalo kwake mwenye ukuu:

⁶ni mjinga akitukuzwa sana, nao wenye mali wakikaa na kunyenyekezwa.[#Fano. 30:21-22.]

⁷Nikaona nao watumishi wanaopanda farasi, wakuu wakienda na kukanyaga nchi kama watumishi.

⁸Achimbaye mwina hutumbukia humo, naye abomoaye boma huumwa na nyoka.[#Fano. 26:27.]

⁹Avunjaye mawe huumizwa nayo, naye achanjaye kuni hujiponza papo hapo.

¹⁰Chuma kikiwa kimedugika, naye mwenyewe hakinoi, kipate makali, hana budi kutumia nguvu zaidi; hapo napo werevu wa kweli hufaa kwa kufanikiwa.

¹¹Nyoka akiuma mtu, akiwa hajatabanwa, bado, basi, mwenye kutabana hanacho, anachokipata.[#Sh. 58:5-6.]

¹²Maneno ya kinywa chake mwerevu wa kweli hupendeza, lakini midomo ya mjinga hummeza.

¹³Mwanzo wa maneno ya kinywa chake ni ujinga, nao mwisho ni kusema upuzi mbaya.

¹⁴Yeye mjinga husema mengi; lakini hakuna mtu ayajuaye yatakayokuwa, tena yuko nani awezaye kumweleza yatakayokuwa nyuma yake?[#Mbiu. 5:3; 8:7.]

¹⁵Masumbuko, anayoyasumbuka mjinga, humchokesha, kwa kuwa hajui hata njia ya kwenda mjini.

¹⁶Utaona mabaya, wewe nchi, mfalme wako akiwa kijana, nao wakuu wako wakila na mapema.[#Yes. 3:4.]

¹⁷Utaona mema, wewe nchi, mfalme wako akiwa mwana wa watu wenye macheo, nao wakuu wako wakila hapo panapopasa, wapate nguvu za kiume, wasile kwa kujilewesha.

¹⁸Kwa ajili yao wajengao kwa uvivu kipaa huinama, kwa ulegevu wa mikono nyumba huvuja.[#Fano. 19:15.]

¹⁹Watu hufanya karamu, wapate kucheka, nayo mvinyo huwafurahisha walioko huku nchini, nazo fedha hupata yote.[#Amu. 9:13; Sh. 104:15.]

²⁰Mfalme usimtukane hata kwa mawazo yako! Wala chumbani mwako, unamolala, usimtukane mwenye mali! Kwani ndege wa angani watayapeleka, uliyoyasema, naye mwenye mabawa atayatangaza hayo maneno.[#2 Mose 22:28.]